މީހެއްގެ މުޅި ލޯ ބަދަލުކުރުމުގެ ފުރަތަމަ އޮޕަރޭޝަންކޮށްފި!

ސައެންސްއާއި ޓެކްނޮލޮޖީގެ ރޮނގުން ކުރިއަރަމުން އަންނަ އަދުގެ ދުނިޔޭގައި، ކޮންމެ ދުވަހަކީވެސް އާދަޔާ ޚިލާފު އެތައް ވާހަކައެއް އަޑު އިވިގެން ދާ ދުވަހެކެވެ. މި ދެންނެވި ކުރިއެރުންތަކުގެ އަސަރު، ޢާންމު މުޖުތަމައަށް އެންމެ ސީދާ ގޮތެއްގައި ފޯރަނީ ޞިއްޙީ ބޭސްވެރިކަމުގެ ދާއިރާއިން ކަމުގައި ދެންނެވުމަކުން ގޯހެއް ނެތެވެ. މި ހިނގާ ނޮވެމްބަރ މަހުގެ 9 ވަނަ ދުވަހަކީވެސް އެފަދަ ޚަބަރެއް ލިބުނު ދުވަހެކެވެ. އެ ދުވަހަކީ، އިންސާނާގެ ހަށިގަނޑުގައި ވާ އެންމެ މުހިންމު ގުނަވަން ކަމަށް ވާ ލޯ، ބަދަލު ކުރުމަށް، ނުވަތަ މުޅި ލޯ ޓްރާންސްޕްލާންޓް ކުރުމަށް އޮޕަރޭޝަންއެއް ކުރިކަން، ނިއުޔޯކްގެ ޑޮކްޓަރުންގެ ޓީމަކުން ޢިއުލާން ކުރި ދުވަހެވެ. ބަލި މީހާގެ މުޅި ލޯ ބަދަލު ކުރުމަށް ކުރި އޮޕަރޭޝަން ނިންމާލި ނަމަވެސް، ބަދަލު ކުރި ލޮލަށް އަދި ފެންނަ ގޮތެއް ނުވެއެވެ.

ލޯ ބަދަލު ކުރުމުގެ އޮޕަރޭޝަން ކުރީ މީގެ 6 މަސްދުވަސް ކުރިންނެވެ. އެއީ ބަލި މީހާގެ މޫނުގެ އެއްފަޅި ބަދަލު ކުރުމަށް ކުރި އޮޕަރޭޝަންއެއްގެ ތެރެއިންނެވެ. އޭގެ ފަހުން ފާއިތުވެ ދިޔަ ދުވަސްތަކުގެ ތެރޭގައި، ބަދަލު ކުރި ލޮލުގެ ޞިއްޙަތަށް އެކަށީގެންވާ ބަދަލުތަކެއް އައިސްފައި ވާ ކަމަށް، އެންވައިޔޫ ލެންގޯން ހެލްތުގެ ސަރޖިކަލް ޓީމުން ވަނީ ފާހަގަ ކޮށްފައެވެ. އެގޮތުން ލޮލުގެ ލޭނާރުތަކުގެ މަސައްކަތްތައް ރަނގަޅު ކަމަށާ، ރެޓީނާގެ ޙާލަތުވެސް ރަނގަޅު ކަމަށް ޓީމުން ވަނީ ހާމަ ކޮށްފައެވެ.

މި ދެންނެވި ސަރޖަރީއާ ހިސާބަށް، މިހާތަނަށް މުޅިންވެސް ހަދާފައި ވަނީ ލޮލުގެ ކޯނިއަރ ނުވަތަ ސާފުކޮށް ބޭރަށް ފެންނަން ހުންނަ ފަށަލަ ބަދަލު ކުރުމުގެ އޮޕަރޭޝަންތަކެވެ.

ބަދަލު ކުރި ލޯ ލައްވާފައި ވަނީ އެމެރިކާގެ އަސްކަރިއްޔާގައި ކުރިން ޚިދުމަތް ކޮށްފައި ވާ، ޢުމުރުން 46 އަހަރުގެ އޭރަން ޖޭމްސްއަށެވެ. އޭރަން ޖޭމްސްގެ މޫނުގެ އެއްފަޅި ބަދަލު ކުރަން ޖެހުނީ، މަސައްކަތުގެ މާޙައުލުގައި އޭނާއަށް ލިބުނު ސީރިއަސް އަނިޔާތަކަކާ ގުޅިގެންނެވެ. ކަރަންޓުގެ އެކްސިޑެންޓެއްގައި އޭރަން ޖޭމްސްގެ މޫނުގެ ވާތް ފަޅި އެއްކޮށް ހަލާކުވިއެވެ. ނޭފަތާއި، އަނގަޔާއި ވާތު ލޯވެސް ހަލާކުވިއެވެ. ޓްރާންސްޕްލާންޓް ސަރޖަރީ، 21 ގަޑިއިރަށް ދެމިގެން ދިޔައެވެ.

އޭރަން ޖޭމްސްގެ ކޭސް ބަލަމުން ދިޔަ ޑޮކްޓަރުން އެންމެ ފުރަތަމަ ނިންމާފައި އޮތީ، ބަލާ ބެލުމަށް މޫނުމަތިން އައިބެއް ނުފެންނާނެ ގޮތަށް، ލޮލުގެ ގޮބޮޅިގަނޑޭ މިކިޔާ ބައި ނުވަތަ، އައިބޯލް ބަދަލު ކުރުމަށް އެކަންޏެވެ.

ކޮންމެ ގޮތަކަށް ނަތީޖާ ނުކުތް ކަމުގައި ވީ ނަމަވެސް، އޭރަން ޖޭމްސްގެ ޙާލަތު ވަރަށް ގާތުން ބަލަމުން ދާނެ ކަމަށް ޑޮކްޓަރު ވަނީ ބުނެފައެވެ.

އަދުގެ ޙާލަތަށް ބަލާއިރު، އޭރަން ޖޭމްސްގެ ހަށިގަނޑަށް ލެއްވި ބަދަލު ލޮލާއި، އޭނާގެ ސިކުނޑިއާ ދެމެދު މަޢުލުމާތު ބަދަލެއް ނުކުރެއެވެ. ނުވަތަ އޮޕްޓިކް ނަރވް މެދުވެރިކޮށް، ސިގުނަލްތަކެއް ނުފޮނުވައެވެ. ނަމަވެސް، ލޮލުގެ ޑޯނަރާއި އޭރަން ޖޭމްސްގެ ލޮލުގެ ނާރުތަކާ ދެމެދު ގުޅުން ވަރުގަދަ ކުރުމުގެ ގޮތުން، އޮޕަރޭޝަން ޓީމުން ވަނީ، ޑޯނަރުގެ ބޯން މެރޯއިން ސްޓެމް ސެލްތައް ނަގާ، ޓްރާންސްޕްލާންޓް ސަރޖަރީގެ ތެރޭގައި، އޭރަން ޖޭމްސްގެ އޮޕްޓިކް ނަރވްއަށް އެ މާއްދާތައް ފޮނުވާލާފައެވެ. އުންމީދަކީ، އޭރަން ޖޭމްސްގެ ހަށިގަނޑުގައި ހަލާކުވެފައި ވާ ލޮލުގެ ސެލްތައް މަރާމާތުވެ، މަސައްކަތް ފެށިގެން ދިއުމެވެ.

އޭރަން ޖޭމްސްގެ ވާތު ލޯ ބަދަލު ކުރުމަށް ކުރި އޮޕަރޭޝަންއާއެކު، ލޮލުގެ ޞިއްޙަތާ ގުޅިގެން އައު ފުރުޞަތުތަކެއް ވަނީ ތަނަވަސްވެފައެވެ. އައު ތަޖުރިބާތަކެއް ކުރުމަށް، އެތައް ބަޔަކަށް ވަނީ ހިތްވަރު ލިއްބައިދީފައެވެ.

ލޮލުގެ ފަރުވާގެ ރޮނގުން ދިރާސާ ކުރަމުންދާ އެހެން ޓީމުތަކުންވެސް ވަނީ، އިލެކްޓްރޯޑްސް ލައްވައިގެން، ލޮލުގެ ނާރުތަކުގެ ނިޒާމާއި، ބަލި މިހާގެ ސިކުނޑި ގުޅާލުމަށް މަސައްކަތްކޮށްފައެވެ. ލޮލުގެ ފެނުން އިޔާދަ ކޮށްދިނުމަށް މަސައްކަތް ކޮށްފައެވެ.

ކުރިމަތިވި ނުރައްކާތެރި އެކްސިޑެންޓްއަށް ފަހުގައިވެސް، އޭރަން ޖޭމްސްގެ ކަނާތު ލޮލަށް ފެނެއެވެ. ނަމަވެސް، އޭނާގެ ވާތު ލޮލުގެ ފެނުން އަނބުރާ ނުލިބިދާނެ ކަން، އޭރަން ޖޭމްސް ހުރީ ޤަބޫލު ކޮށްގެންނެވެ.

ލޮލުގެ ފެނުން އަނބުރާ ލިބުމުގެ ފުރުޞަތު އޮތް ކަމަށް ޑޮކްޓަރު އަދިވެސް ޤަބޫލު ކުރެއެވެ.