އިސްރާއީލުގެ އޮކިއުޕޭޝަން ފޯސަސް (އައިއޯއެފް) އިން ޝަހީދުކޮށްލި ފަލަސްތީނުގެ މީހުންގެ އަދަދު އޮކްޓޯބަރު މަހުގެ ހަތް ވަނަ ދުވަހުން ފެށިގެން މިހާތަނަށް 30،631 އަށް އަރާފައިވާ ކަމަށް ޣައްޒާގެ ހެލްތު މިނިސްޓްރީން މިއަދު ބުނެފިއެވެ.

އަދި މި ހަމަލާތަކުގައި ޒަހަމްވި މީހުންގެ އަދަދު ވެސް ވަނީ 72،043 އަށް އަރާފައި ކަމަށް އެ މިނިސްޓްރީން ވަނީ ރިޕޯޓްކޮށްފައެވެ.

ބަނޑުހައިހޫނުކަމުގެ ތެރޭގައި އިންސާނީ އެހީ އަށް އެދޭ މީހުން ހިމެނޭ ގޮތަށް އިސްރާއީލުން ޣައްޒާގެ އެކި ސަރަހައްދުތަކުގައި އާންމުންނަށް ދަނީ ހަމަލާދެމުންނެވެ.

އެހީ އަށް އެދޭ މީހުންނާ ދެކޮޅަށް ހިންގި ޖަރީމާތަކުގެ ސަބަބުން އެމެރިކާގެ އިތުރުން ދުނިޔޭގެ އެކި ކަންކޮޅުތަކުގައި މުޒާހަރާކުރަމުން ދިޔަ އިރު، އެތައް މިލިއަން ބަޔަކު ވަނީ އެކަމާ ރުޅިވެރިކަމާއި މާޔޫސްކަން ފާޅުކޮށް، ޣައްޒާގެ އާންމުންނަށް ކުރިމަތިވެފައިވާ އިންސާނީ ހިތާމަވެރި ހާދިސާ ހުއްޓުވުމަށް ހަނގުރާމަ ހުއްޓާލުމަށް އެއްބަސްވުމަށް ބައިޑަންގެ ސަރުކާރަށް ގޮވާލާފައެވެ.

އަދި ގިނަ އަދަދެއްގެ ކުޑަކުދިން ވެސް ދަނީ މަލްނިއުޓްރިޝަންގެ ސަބަބުން މަރުވަމުންނެވެ.

އދ.ގެ ކުޑަކުދިންގެ ފަންޑުގެ ސަރަޙައްދީ ތަރުޖަމާނު ސަލީމް އޮވެއިސް ވަނީ މިނުރައްކާތެރި ޙާލަތާމެދު އިންޒާރުދެއްވާ، ކުޑަކުދިންނަށް އެހީވުމަށް ބައިނަލްއަޤްވާމީ ގޮތުން އަވަސް ފިޔަވަޅުތަކެއް އަޅަންޖެހޭކަން ފާހަގަކުރައްވާފައެވެ.

ޣައްޒާގައި ހިނގަމުންދާ ކަންކަމަކީ އިންސާނިއްޔަތާ ޚިލާފު ކަންކަން ކަމަށާއި ޣައްޒާގެ އުތުރަށް އެހީ ނުލިބުމުގެ ސަބަބުން ކުޑަކުދިންގެ ސިއްހީ ހާލަތު އިތުރަށް ގޯސްވާ ކަމަށް އޭނާ ވިދާޅުވި އެވެ.

ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ވެސް ވަނީ ޣައްޒާގައި ނުރައްކާތެރި މަލްނިއުޓްރިޝަން އުފެދިފައިވާ ކަމުގެ އިންޒާރު ދީފައެވެ.

ހާއްސަކޮށް ޣައްޒާގެ އުތުރުގެ ސަރަހައްދުތަކުގައި ހާލަތު ވަރަށް ބޮޑަށް ގޯސްވެފައިވާ ކަމަށް ޑަބްލިއުއެޗްއޯއިން ޣައްޒާއަށާއި ހުޅަނގު އައްސޭރިއަށް ކަނޑައަޅާފައި ހުންނަވާ މަންދޫބު ރިޗަޑް ޕީޕަރކޯން ވިދާޅުވިއެވެ.

އަލްޖަޒީރާއާ ހަވާލާދީ ޕީޕަރކޯން ވިދާޅުވީ ދެ އަހަރުން ދަށުގެ ކޮންމެ ހަ ކުއްޖަކުން އެކަކީ އެ ސަރަޙައްދުގައި ވަރަށް ބޮޑަށް ނުކުޅެދުންތެރިކަން ހުންނަ ކުއްޖެއް ކަމަށެވެ.

އިސްރާއީލުން ވަނީ ޣައްޒާގެ އާބާދީ، ހާއްސަކޮށް ޣައްޒާގެ އުތުރުގެ ރައްޔިތުން ބަނޑަށް ޖައްސައި، ޣައްޒާއަށް ބޮޑެތި ހުރަސްތަކެއް ކުރިމަތިކޮށްފައެވެ.

އިސްރާއީލު ހަނގުރާމައިގެ ސަބަބުން ޣައްޒާގެ އާބާދީގެ 85 އިންސައްތަ މީހުން ކާބޯތަކެއްޗާއި ސާފު ފެނާއި ބޭހުގެ ދަތިކަން ބޮޑުވެ ގެދޮރު ދޫކޮށް ގޮސްފައިވާއިރު، އެންކްލޭވްގެ އުމްރާނީ ވަސީލަތްތަކުގެ 60 އިންސައްތަ ވަނީ ހަލާކުވެ ނުވަތަ ބޭނުން ނުކުރެވޭވަރުވެފައި ކަމަށް އދ.އިން ބުނެއެވެ.

ބައިނަލްއަގްވާމީ ކޯޓް އޮފް ޖަސްޓިސްގައި އިސްރާއީލުގެ މައްޗަށް ވަނީ ޖަރީމާހިންގުމުގެ ތުހުމަތުކޮށްފައެވެ. މިދިޔަ ޖެނުއަރީ މަހު އެކޯޓުން ނެރުނު ވަގުތީ ހުކުމެއްގައި ވަނީ ޣައްޒާގައި ދިރިއުޅޭ އާންމުންނަށް އިންސާނީ އެހީތެރިކަން ފޯރުކޮށްދިނުމަށް ޖިނާއީ އަމަލުތައް ހުއްޓާލައި ފިޔަވަޅުތައް އެޅުމަށް ތެލްއަވީވްއަށް އަންގާފައެވެ.