އިންތިހާބު ބާއްވާ ދުވަސް ބަންދުކުރައްވާނެ ކަމަށް ރައީސް ވިދާޅުވެއްޖެ
4 މާރިޗު 2024 | ހޯމަ 00:41އިންތިހާބު ދިމާވަނީ އާދީއްތަ ދުވަހަކާއި
ރައީސް ދުވާފަހު ރައްޔިތުންނާއި ބައްދަލުކުރައްވަނީ
ރައްޔިތުންގެ މަޖިލީހުގެ އިންތިހާބު އޮންނަ ދުވަސް ބަންދު ކުރައްވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވީ ސަރުކާރުގެ ކެންޑިޑޭޓުން ތާއިދު ހޯދުމުގެ ގޮތުން ރަސްމީ ދަތުރުފުޅުގެ ނަމުގައި ކުރައްވަމުން ގެންދަވާ ދަތުރުފުޅުގައި ރ. ދުވާފަރަށް ވަޑައިގެންނެވެ.
ރައްޔިތުންގެ މަޖިލީހުގެ އިންތިޚާބު ބޭއްވުމަށް ހަމަޖެހިފައިވާ ދުވަހަކީ ސަރުކާރު ބަންދު ދުވަހެއްގެ ގޮތުގައި ކަނޑައަޅައިދިނުމަށް އިލެކްޝަންސް ކޮމިޝަނުން ވަނީ މިހާރު އެދިފައެވެ. އިލެކްޝަންސް ކޮމިޝަންގެ ނައިބު ރައީސް އިސްމާއީލް ހަބީބު ވިދާޅުވީ އިންތިހާބު ބާއްވަން ހަމަޖެހިފައިވާ އޭޕްރީލް 21 ވަނަ ދުވަހާ އަދި އެއާ ޖެހިގެން އަންނަ އޭޕްރީލް 22 ވަނަ ދުވަހަކީ ސަރުކާރު ބަންދު ދުވަހެއްގެ ގޮތުގައި ހަމަޖައްސައިދިނުމަށް އެދި ރައީސް އޮފީހަށް ސިޓީ ފޮނުވާފައިވާ ކަމަށެވެ.
އިންތިހާބު ދިމާވަނީ އާދީއްތަ ދުވަހަކަށްވުމުން، އެ ދުވާއި ގުޅޭގޮތުން ވާހަކަފުޅުދައްކަވަމުން ރައީސް ވިދާޅުވީ އިލެކްޝަންސް ކޮމިޝަނުން 21 އެޕްރީލްގައި އިންތިހާބު ބާއްވަން ނިންމުމުން، އެ ދުވަސް ބަންދު ކުރައްވާނެ ކަމަށެވެ.
އިންތިހާބުތަކާއި ބެހޭ އާންމު ގާނޫނަށް ގެނައި އިސްލާހުގައި ބުނާ ގޮތުން އިންތިހާބު ރޯދަ މަހާ ދިމާވެއްޖެ ނަމަ ބާއްވަން ޖެހޭނީ ރޯދަ މަސް ނިމޭތާ 10 ދުވަސް ފަހުންނެވެ. އެ މުއްދަތު އޭޕްރިލް 19 ވާ ހުކުރު ދުވަހަށް ހަމަވާއިރު އީސީން ބުނެފައިވަނީ ގާނޫނުގައި ބުނާ ތާރީހުތަކަށް މަސައްކަތްތައް ފެއްތުމުން އެންމެ އަވަހަށް އިންތިހާބު ބޭއްވޭނީ އާދީއްތަ ދުވަހު ކަމަށެވެ.
