ގެސްޓުންނަކީ އައްޗި ހެދުން ލައިގެން އައްޗި ކޮށް އުޅޭ ބައެއް ކަމުގެ ޝަކުވާ ރައީސް އަށް

ގެސްޓުންނަކީ އައްޗި ހެދުން ލައިގެން އައްޗި ކޮށް އުޅޭ ބައެއް ކަމަށް ބުނެ ހުށަހެޅި ޝަކުވާ އެއް ރައީސް އިއްވަވައިފިއެވެ.

އއ އަތޮޅުގެ މީހުން ދިރިއުޅޭ ރަށްތަކަށް ކުރެއްވި ދަތުރުފުޅުގައި، އެ އަތޮޅު އެކުޅަހަށް ވަޑައިގެން އެ ރަށު ރައްޔިތުންނާ ބައްދަލު ކުރައްވައި ދެއްކެވި ވާހަކަ ފުޅުގައި ރައީސް އެ މެސެޖު އިއްވައިވައި ދެއްވީ އުކުޅަހު ތުއްތު ކުދިން ތަކެއްގެ ފަރާތުން ލިބިވަޑައިގެންނެވި ނޯޓު ކޮޅެއް ގައި އޮތް އެއްޗެއް ކަމަށް ވިދާޅުވެއެވެ.

އެ މެސެޖު އޮތް ގޮތަށް ކިޔަން ބޭނުންވާ ކަމަށް ވިދާޅުވެ، އެ ނޯޓު ކޮޅު ރައީސް މުޢިއްޒު ވަނީ ކިޔުއްވައިފަ އެވެ.

މިހެން ވިދާޅުވުމާއެކު ރައީސް ވިދާޅުވީ އެ ނޯޓު ކޮޅު އުކުޅަހު ކުޑަކުދިންގެ ފަރާތުން ލިބުނީ "އެ ވާހަކަ ދައްކަން ނިންމައިގެން ހުއްޓާ" ކަމަށެވެ.

އެ ނޯޓު ކޮޅުގައި ލިޔެފައިވާ ކަމަށް ރައީސް މުޢިއްޒު ވިދާޅުވީ، އެ ކުދިން ވެސް ބީޗަށް ދާން ބޭނުންވާ ކަމަށާއި، އެކަމަކު ގެސްޓުން އުޅެނީ އައްޗިކޮށް ކަމަށެވެ. އެގޮތުން ބީޗުގައި ވެސް، ރެސްޓޯރެންޓުގައި ވެސް އަދި މަގުމަތީގައި ވެސް ގެސްޓުން އައްޗިކޮށް އުޅޭ ކަމަށް ލިޔެފައިވާ ކަމަށް ރައީސް ވިދާޅުވި އެވެ. ގެސްޓުން އުޅެނީ އައްޗި ހެދުން ލައިގެން ކަމަށް ލިޔެފައިވާ ކަމަށް ވިދާޅުވެ، ރައީސް މުޢިއްޒު ވިދާޅުވީ އެ ނޯޓު ކޮޅުގައި ވަރަށް ރީތިކޮށް ކުރަހާފައި އޮތް ކަމަށެވެ.

އަޅުގަނޑު ހަމަ ތަން ކޮޅެއް ސިމްޕަލްކޮށް މިކަން ދަންނަވާލަން. މިކަން ވިސްނައިގެން މި ދަތުރުގައި މިދިޔަ ހުރިހާ ރަށެއްގައި މިކަން ފާހަގަވި އަދި އަޅުގަނޑު އެ ވާހަކަ ދައްކަން ވިސްނައިގެން ހުރި މައުޟޫއެއް މިއީ. މި ވާހަކަ ދައްކަން ނިންމައިގެން ހުއްޓައި، މި ރަށުގެ ކުޑަ ކުދިންގެ ފަރާތުން އަޅުގަނޑަށް ލިބުނު މެސެޖެއް އަޅުގަނޑު ކިޔާލާނަން. އަޅުގަނޑު އަތަށް ލިބުނު މެސެޖެއް. ހަމަ އޮތް ގޮތަށް ކިޔާލާނަން. ކޮއްކޮމެން ބޭނުން ބީޗަށް ދާން. އެކަމަކު ގެސްޓުން އުޅެނީ އައްޗިކޮށް. ބީޗުގައި ވެސް، ރެސްޓޯރެންޓުގައި ވެސް، މަގު މަތީގައި ވެސް ގެސްޓުން އުޅެނީ އައްޗި ހެދުން ލައިގެން. ވަރަށް ރީތިކޮށް ކުރަހާފައި އޮތް ކުރެހުމަކާ އެއްކޮށް ކުޑަ ކުދިން އަޅުގަނޑަށް ދިން މެސެޖެއް.

ރައީސް ޑޮކްޓަރު މުޙައްމަދު މުޢިއްޒު

މީގެ އިތުރުން ރައީސް މުޢިއްޒު ވިދާޅުވީ އެއީ އެމަނިކުފާނު ވެސް ދައްކަވާ ވާހަކަ ކަމަށެވެ. އަދި އަމިއްލަ ނަފުސަށް، އަމިއްލަ އަށް އޮޅުވާލަނީ ކޮން ކަމެއްތޯ ވިސްނަން ޖެހޭކަން ފާހަގަ ކުރައްވައި ރައީސް މުޢިއްޒު ވިދާޅުވީ، ލޯކަލް ޓުއަރިޒަމް ކުރިއަށް ގެންދާއިރު އިންތަކުގައި ހިފަހައްޓަން ޖެހޭ ކަމަށެވެ.

އަދި އިސްލާމް ދީނުގައި އަންގަވާފައިވާ ގޮތުގެ މަތިން މުއްސަނދިކަން ހޯދަން މަސައްކަތް ކުރުމުން، ބަރަކާތް ލައްވާނެ ކަމަށް ވެސް ރައީސް މުޢިއްޒު ވިދާޅުވި އެވެ. އެކަން ފާހަގަ ކުރައްވައި އެމަނިކުފާނު ވަނީ ލޯކަލް ޓުއަރިޒަމްގެ މަސައްކަތް ކުރަމުން އަންނަ ފަރާތްތަކަށް ފާޑު ވިދާޅުވެފަ އެވެ.

ރައީސް މުޢިއްޒު ވިދާޅުވީ ސިކުނޑި ތަރައްޤީ ނުވެ އެއްވެސް ތަރަައްޤީއެއް ނުހޯދޭނެ ކަމަށެވެ. ސިކުނޑި ތަރައްްޤީ ނުވެ ކިތަންމެ ބައިވަރު އިމާރާތްތަކެއް އެޅި ނަަމަވެސް، މަގުތަކެއް ހެދި ނަމަވެސް އަދި ސްލިޕްވޭ ތަކެއް އެޅި ނަމަވެސް އެއްވެސް ކަމެއް ޙާސިލު ނުވާނެ ކަމަށް ވެސް ރައީސް މުޢިއްޒު ވަނީ ވިދާޅުވެފަ އެވެ.