މަސް މާރުކޭޓު ހަދަން މާލޭ ސިޓީ ކައުންސިލުން ދެ އެއްބަސްވުމެއް ހަދާފައި އެބައޮތް ކަމަށާއި އޭގެ ތެރެއިން ފަހު އެއްބަސްވުން ހަދާފައި އޮތީ ކާކު ނިންމައިގެން ކިހިނެއް ކަމެއް ވެސް ނޭނގޭ ކަމަށް މާލޭ މޭޔަރު އާދަމް އާޒިމް ވިދާޅުވެއްޖެއެވެ.

ސިޓީ ކައުންސިލްގެ ހަތަރުވަނަ ދައުރުގެ 208ވަނަ ޖަލްސާގައި އާޒިމް ވަނީ މަސް މާރުކޭޓު މަޝްރޫއުގެ އެންމެ ފަހުގެ މައުލޫމާތުތައް ކައުންސިލަރުންނާ ހިއްސާކުރައްވާފައެވެ. މޭޔަރު އާޒިމް ވިދާޅުވީ، މަޝްރޫއު ނުފެށިގެން އުޅެނީ ބޮޑު އޮޅުންބޮޅުން ގަނޑެއްގެ ތެރޭގައި އޮތުމުން ކަމަށެވެ.

އެގޮތުން، މަސް މާރުކޭޓު ހަދަން ދެވަނަ ބަޔަކަށް ހަވާލުކޮށްފައިވަނީ ކުރީގެ މޭޔަރު، ރައީސް ޑރ. މުހައްމަދު މުއިއްޒު ވެރިކަަމަށް އިންތިޚާބުވި ފަހުންނެވެ. އޭރު އާޒިމް ވެސް އިންތިޚާބެއް ނުވެއެވެ. އެހެންވެ، މިކަން ހިނގާފައިވަނީ ޓްރާންސިޝަން މުއްދަތުގައެވެ.

މޭޔަރު އާޒިމް ވިދާޅުވީ މަސް މާރުކޭޓުގެ ދެވަނަ އެއްބަސްވު ހަދާފައި އޮތީ ވަރަށް ބޮޑަށް ކައުންސިލަށް ގެއްލުންވާ ގޮތަށް ހެދިފައި އޮތް އެއްބަސްވުމެއް ކަމަށް ފާހަގަަކުރެވިފައިވާ ކަމަށާއި އެ އެއްބަސްވުމުގައި ސޮއިކުރައްވާފައިވަނީ އެތަނުގެ ލީގަލް ކައުންސެލް އަލީ ނަސީރު [ގާސިމް] ކަމުގަ އެވެ.

މަސް މާރުކޭޓު އަޅަން ފުރަތަމަ އެއްބަސްވުން ހަދާފައި އޮތީ 6.1 މިލިއަން ޑޮލަރަށެވެ. އެކަމަކު، ފަހުން އެ އެއްބަސްވުން އޮތީ 9.6 މިލިއަން ޑޮލަރަށް އެހެން ބަޔަކާ ހަވާލުކޮށްފައެވެ.

އާޒިމް ވިދާޅުވީ، 9.6 މިލިއަން ޑޮލަރަށް މަސް މާރުކޭޓު މަޝްރޫއު ހަވާލުކުރިއިރު އެ ފައިސާއަކީ ސިޓީ ކައުންސިލަށް ދެއްކެން އޮތް ފައިސާއެއް ވެސް ނޫން ކަމަށާއި، އާ އެއްބަސްވުމެއް ހަދަން ނިންމީ ކާކުތޯ ވެސް ސުވާލު އުފެދޭ ކަމަށެވެ.

އާޒިމް ވިދާޅުވީ ފަހުން ހެދި އެއްބަސްވުން ހަދާފައި ވަނީ މި ފައިސާ ނުދެއްކިއްޖެ ނަމަ މުޅި އިމާރާތް އެ އެއްބަސްވުން ހެދި ފަރާތަށް ލިބޭ ގޮތަށް ކަމަށާއި މިއީ ވަރަށް ދެރަކޮށް ވެފައި އޮތް ކަމެއް ކަމަށެވެ.

އާޒިމް ވިދާޅުވީ، ދެ އެއްބަސްވުމުގައި އޮތީ ވެސް އެއް ނަންބަރެއް ކަމަށާއި ދެވަނަ އެއްބަސްވުން ހެދީ ކިހިނެއްކަން ވެސް ލިޔެކިޔުންތަކުން ވެސް ފެންނަން ނެތް ކަމަށެވެ. އަދި މިގޮތަށް ކަންތައް ކޮށްފައި އޮތުމުން މީގެން އޮޅުބޮޅުން އަރާކަމަށާއި މަސް މާރުކޭޓު މަޝްރޫއު ލަސްވަނީ އެހެންވެގެން ކަމަށް އާޒިމް ވިދާޅުވި އެވެ.

އާޒިމް ވިދާޅުވީ މަސް މާރުކޭޓު އަޅާއިރު އެ ތަނުގައި ހުރި ގޮޅިތައް ވަގުތީ ގޮތުން ބަދަލުކުރަން ބޭނުންވާ ގޮޅިތައް ހަދަން ވެސް އެއްބަސްވުމުގެ ތެރޭގައި ހިމަނާފައިނުވާ ކަމަށާއި އެ ކަމަށް 200 އެއްހާ ގޮޅި ހަދަން ޖެހޭއިރު އެކަން ކުރަން ވެސް އޮތީ ވަކިން 2.1 މިލިއަން ރުފިޔާއަށް ހަވާލުކޮށްފައި ކަމަށެވެ.

މި މައްސަލައާއި ގުޅިގެން ގަލޮޅު އުތުރު ދާއިރާގެ ކައުންސިލަރު މުހައްމަދު ސައިފް ފާތިހު ވަނީ މާލޭ ސިޓީ ކައުންސިލުން ހަދާފައިވާ ހުރިހާ އެއްބަސްވުމެއް ހާމަކުރަން ގޮވާލައްވާފައެވެ.

މިހާރުގެ ރައީސް ޑރ. މުހައްމަދު މުއިއްޒުގެ މޭޔަރުކަމުގައި، ބިޑް ކޮމިޓީން 130،000 ރުފިޔާއަށް މަސް މާރުކޭޓު ކުއްޔަށް ދޭން ނިންމާފައި ވަނިކޮށް، އޭރު ކައުންސިލުން އެތަން 70،000 ރުފިޔާއަށް ކުއްޔަން ދިން މައްސަލައެއް ވަނީ ދާދި ފަހުން ފެންމަތިވެފަ އެވެ. އެހެން ނަމަވެސް މި ސަރުކާރުން ވަނީ އެކަން ދޮގުކޮށްފަ އެވެ.