ރައީސް މުއިއްޒުގެ މި ސަރުކާރުގެ ސިޔާސަތުތަކަށް ފާޑުކިޔާތީ ށ. ޅައިމަގު ފެނަކަ ބްރާންޗުގެ ދެ މުވައްޒަފުން ސަސްޕެންޑުކޮށްފި އެވެ.

ފެނަކައިން ސަސްޕެންޑު ކޮށްފައި ވަނީ އެ ރަށު ފެނަކަ ބްރާންޗުގެ ސްޓޭޝަން މެނޭޖަރު، އާދަމް ރައުފް އާއި ޑެޕިއުޓީ ސްޓޭޝަން މެނޭޖަރު، މުހައްމަދު ޝަފީއު އެވެ. އެ ދެ މުވައްޒަފުން ވެސް ސަސްޕެންޑް ކޮށްފައި ވަނީ 30 ދުވަހުގެ މުއްދަތަކަށެވެ.

އެ ދެ މުވައްޒަފުން ސަސްޕެންޑު ކުރިކަން އަންގައި ފޮނުވި ލިޔުމުގައި ބުނެފައި ވަނީ އެމީހުން ސަސްޕެންޑު ކުރީ ބަލަމުންދާ މައްސަލައަކާ ގުޅިގެން ކަމަށެވެ. ނަމަވެސް އެ މުވައްޒަފުންނާއި ގުޅިގެން ތަހުގީގު ކުރަމުން ދަނީ ކޮން މައްސަލައެއް ކަމެއް އެނގިފައި ނުވެއެވެ.

އެ ދެމީހުން ސަސްޕެންޑު ކޮށްފައި ވަނީ މުސާރަ ހިނގާ ގޮތަށް ނަމަވެސް އިތުރު އެއްވެސް އެލަވަންސް އެއް ނުލިބޭ ގޮތަށް ކަމަށް މައުލޫމާތު ލިބިފައި ވެއެވެ.

ފެނަކަ ކޯޕަރޭޝަނުގެ މެނޭޖިންގ ޑިރެކްޓަރ މުޙައްމަދު އާރިފް ސޮއިކޮށް އޮގަސްޓު 19 ގައި ސްޓޭޝަން މެނޭޖަރު، އާދަމް ރައުފް އާއި ޑެޕިއުޓީ ސްޓޭޝަން މެނޭޖަރު، މުހައްމަދު ޝަފީއު އަށް ފޮނުވި ސިޓީގައި ބުނީ މައްސަލައެއް ތަހުގީގު ކުރަމުން ދާތީ މި މައްސަލައިގެ ތަހުގީގުގައި އިތުރަށް ބަލަން ޖެހޭ ކަންކަން ހުރުމުން ފެނަކަ ކޯޕަރޭޝަނުގެ މުވައްޒަފުންގެ ގަވާއިދު 2022 ގެ 40 ވަނަ މާއްދާގެ (ށ) އަށް ރިއާޔަތްކޮށް 20 އޮގަސްޓު 2025 އިން ފެށިގެން 30 ދުވަހުގެ މުއްދަތަށް މުސާރަ ލިބޭ ގޮތަށް ވަގުތީ ގޮތުން އޮފީހުގެ މަސައްކަތަށް ނިކުތުން މަނާ ކުރެވިފައިވާ ކަމަށެވެ.

ފަހަކަސް އައިސް ގިނަ އަދަދެއްގެ ފެނަކަ މުވައްޒަފުން ސަސްޕެންޑް ކުރަމުން އަންނަ ކަން ވަނީ ފާހަގެ ވެފައެވެ. އެގޮތުން ދާދި ފަހުން ވަނީ ވަކި ސަބަބެއް އެންގުމެއް ނެތި އއ. އަތޮޅު ކައުންސިލުގެ ސެކެރެޓަރީ ޖެނެރަލް (އެސްޖީ) ސަސްޕެންޑުކޮށްފަ އެވެ.

އއ. އަތޮޅުގައި އެމްޑީޕީން ހިންގާ ކެމްޕެއިންތަކުގައި ވެސް އިސްކޮށް އުޅުއްވާ މުހައްމަދު ޝަފީގު އެ މަގާމުން ސަސްޕެންޑުކުރީ މިދިޔަ ހޯމަ ދުވަހު އެވެ. އޭނާއަށް ފޮނުވާފައިވާ ސަސްޕެންޝަން ސިޓީގައިވާ ގޮތުން އޭނާ ސަސްޕެންޑުކުރީ އަންނަ މަހުގެ 17 ވަނަ ދުވަހުގެ ނިޔަލަށް މުސާރަ ލިބޭ ގޮތަށެވެ. އެކަމަކު ސަސްޕެންޑުކުރަނީ ސީދާ ކޮން މައްސަލައަކާ ގުޅިގެން ކަމެއް ބުނެފައެއް ނުވެ އެވެ.

މީގެ އިތުރުން ބ.ތުޅާދޫ ފެނަކައިގެ ވަގުތީ މެނޭޖަރުގެ ގިނަ މައްސަލަތަކެއް ފާހަގަ ކޮށް އޭނާ އާ ބެހޭ ގޮތުން ފެނަކަ އަށް ޕެޓިޝަން ހުށަހެޅި 5 މުވައްޒަފަކު ވަނީ ސަސްޕެންޑް ކޮށްފައެވެ. މި ފަސް މުވައްޒަފުން ވެސް ސަސްޕެންޑް ކޮށްފައިވަނީ މުސާރަ ލިބޭ ގޮތަށް އެއްމަސް ދުވަހުގެ މުއްދަތަ ށެވެ.