ވެރިންނަށް މަރުހަބާ ދަންނަވަން ދަރިވަރުން ނެރެން ފަށައިފި

ސަރުކާރުގެ އިސްވެރިން ރަށްރަށަށް ކުރާ ދަތުރުތަކުގައި މަރުހަބާ ކިޔުމަށް ސްކޫލް ދަރިވަރުން ނެރުން މަނާކޮށްފައި އޮތް އޮތުން ނިމުމަކަށް ގެނެސް މި ސަރުކާރުން އަނެއްކާވެސް އެކަން ކުރަން ފަށައިފިއެވެ.

މިކަން ހާމަވެފައިވަނީ ރަސްމީ ދަތުރުފުޅުތަކެއް ކަމަށް ވިދާޅުވެ، ރައީސް ޑރ. މުހައްމަދު މުއިއްޒު މަޖިލިސް އިންތިހާބުގެ ކެމްޕޭނަށް ރަށްރަށަށް ވަޑައިގަންނަވާތީ، މަރުހަބާ ދެންނެވުމަށް ދަރިވަރުން ނެރެން ސްކޫލްތަކަށް އަންގާ، ސްކޫލްތަކުން ކޮށްފައިވާ އިއުލާންތަކުންނެވެ.

Advertisement

އެގޮތުން 3 މާޗްގައި ރައީސް މުއިއްޒު ރ. ދުވާފަރަށް ވަޑައިގަތުމަށް ހަމަޖެހިފައިވާތީ އެމަނިކުފާނަށް މަރުހަބާ ދެންނެވުމަށް ދަރިވަރުން ނެރުމަށް ދުވާފަރުގައި ހުންނަ ރ. އަތޮޅު މަދުރަސާއިން ނެރެފައިވާ ދެންނެވުމުގައި ވެއެވެ. އެ ދެންނެވުމުގައި ވަނީ ރައީސް ޑރ. މުހައްމަދު މުއިއްޒު އާދިއްތަ ދުވަހުގެ މެންދުރު ފަހު 1:00 ގައި ރަސްމީ ދަތުރުފުޅެއްގައި ރ. ދުވާފަރަށް ވަޑައިގަތުމަށް ހަމަޖެހިފައިވާތީ އެމަނިކުފާނުގެ އިސްތިގުބާލުގައި އެމަނިކުފާނަށް މަރުހަބާ ދެންނެވުމަށް އެ ސްކޫލުގެ އެންމެހާ ދަރިވަރުންނާއި، ބެލެނިވެރިން 1:00 ގައި ބަނދަރަށް ދުރުވުމަށެވެ.

އަދި ދަރިވަރުން ހާޒިރުވާނީ ރަސްމީ ޔުނީފޯމުގައި ކަމަށާއި، މަގާމްތަކަށް ހޮވިފައިތިބި ކުދިން ޝޭޝް އަޅައިގެންކަމަށެވެ.

ސްކޫލުގެ އެންގުމާއެއްގޮތަށް ރައީސް މެންދުރުގެ ހޫނުގަދަ ގަޑީގައި އެރަށަށް ވަޑައިގެންނެވި އިރު ސްކޫލުން ދެންނެވި ދެންވުމުގައިވާގޮތަށް ދަރިވަރުން ހޫނުގައި ރައީސްއަށް މަރުހަބާ ދެންނެވުމަށް ކޮޅަށް ތިބެންޖެހުނެވެ. ރައީސް އެރަށަށް ވަޑައިގެންނެވީ 1:15 އެހާކަންހާއިރުއެވެ.

ސަރުކާރުގެ އިސްވެރިން ރަށްރަށަށް ވަޑައިގަންނަވާ ދަތުރުތަކުގައި މަރުހަބާ ދެންނެވުމަށް ސްކޫލް ދަރިވަރުން ނެރުން މަނާކޮށްފައިވަނީ ކުރީގެ ރައީސް އިބްރާހިމް މުހައްމަދު ޞާލިހުގެ ވެރިކަމުގައެވެ. އެގޮތުން 2020 ވަނަ އަހަރު ރައީސް އޮފީހުގެ ތަރުޖަމާނު ކުރެއްވި ޓްވީޓެއްގައި ވިދާޅުވެފައިވަނީ ދައުލަތުގެ އިސް ވެރިން ރަށްރަށަށް ކުރައްވާ ދަތުރުފުޅުތަކުގައި މަރުޙަބާ ދެންނެވުމަށް، ރަށްރަށުގެ ސްކޫލް މަދަރުސާތަކުގެ ދަރިވަރުން، ނެރެގެން އެއްވެސް ޙަރަކާތެއް ހިންގުމަކީ، ސަރުކާރުން ތަރުޙީބުދޭ ކަމެއް ނޫން ކަމަށެވެ.

އަދި އެފަދަ އެއްވެސް ޙަރަކާތެއްގައި ސްކޫލް މަދަރުސާތަކުގެ ދަރިވަރުން ބައިވެރިކުރުމަށް، ރައީސުލްޖުމްހޫރިއްޔާގެ އޮފީހުންވެސް އަދި ސަރުކާރުގެ އެއްވެސް ވުޒާރާއަކުން ވެސް، އެއްވެސް ރަށެއްގެ ސްކޫލް މަދަރުސާއަކަށް، އަދި އެއްވެސް ކައުންސިލަކަށްވެސް އަންގައިފައި ނުވާނެ ކަމަށާއި، މި ފަދަ ޙަރަކާތްތަކުގައި، ރާއްޖޭގެ ސްކޫލް މަދަރުސާތަކުގެ ދަރިވަރުން ބައިވެރިނުކުރުމަށް، ދައުލަތުގެ ކަމާ ބެހޭ އެންމެހައި އިދާރާތަކަށް ރައީސް ޞާލިހް އިލްތިމާސްކުރައްވަވާ ކަމަށެވެ.

ނަމަވެސް ވެރިކަން ބަދަލުވެ ރައީސް މުއިއްޒު ކުރައްވާ ދަތުރުފުޅުތަކުގައި ވަކިން ހާއްސަކޮށް މިހާރު ކުރައްވާ ކެމްޕޭން ދަތުރުފުޅުތަކުގައި ސްކޫލް ދަރިވަރުން މަރުހަބާ ދެންނެވުމަށް ނެރެން އެޑިއުކޭޝަން މިނިސްޓްރީން ދަނީ އަންގަމުންނެވެ.