އޭނާގެ މުސްތަޤުބަލާ މެދު އިތުރަށް ދައްކާނެ އައު ވާހަކައެއް ނެތް ކަމަށް، ޖަރުމަނުގެ ބަޔާ ލެވަކޫސަނަށް އިރުޝާދު ދެމުން އަންނަ ސްޕެއިންގެ ޒަބީ އަލޮންސޯ ބުނެފި އެވެ.

އޭނާ މިހެން ބުނީ އިނގިރޭސި ޕްރިމިއާ ލީގުގެ ލިވަޕޫލް އަދި ޖަރުމަނުގެ ބަޔާން މިއުނިކުން ހޯދަން ބޭނުންވާ ކޯޗުންގެ ލިސްޓުގައި އޭނާގެ ނަން އޮތް ކަަމަށް ދެކެވޭ ވާހަކަތާ ގުޅިގެންނެވެ. މި ސީޒަނަށްފަހު ލިވަޕޫލްގެ ކޯޗުކަމުން ޔާގަން ކްލޮޕް އަދި ބަޔާންގެ ކޯޗުކަމުން ތޯމަސް ޓުޗެލް ވަނީ ވަކިވާން ނިންމައިފަ އެވެ. އެއާއެކު، އެ ދެ ކުލަބުން ވެސް އަންނަނީ އައު ކޯޗުން ހޯދުމުގެ މަސައްކަތް ކުރަމުންނެވެ.

އެކަމާ ގުޅޭ ގޮތުން ވާހަކަ ދައްކަމުން އުމުރުން 42 އަހަރުގެ އަލޮންސޯ ބުނީ، ބަޔާން ނުވަތަ ލިވަޕޫލާ ގުޅޭ ގޮތުން ދެކެވެމުން އަންނަ ވާހަކަތަކަށް، އޭނާ ބުނާނެ އިތުރު އައު ވާހަކައެއް ނެތް ކަމަށެވެ. އަލޮންސޯ ބުނީ މިވަގުތު އޭނާ އަކީ ލެވަކޫސަންގެ ކޯޗު ކަމަށާއި، އެއީ ޔަގީން ކަމެއް ކަމަށެވެ. ނަމަވެސް، މުސްތަޤުބަލާ ގުޅޭ ގޮތުން ވެސް ދައްކާނެ އައު ވާހަކައެއް ނެތް ކަމަށް އޭނާ ބުންޏެވެ. ބަޔާންގެ ފަރާތުން އޭނާ އަށް ހުށަހެޅުމެއް އޮތްތޯ ސުވާލު ކުރުމުން އަލޮންސޯ ބުނެފައި ވަނީ، އެކަމާ ގުޅޭ ގޮތުން ވެސް ދައްކާނެ އައު ވާހަަކައެއް ނެތް ކަމަށެވެ.

ރެއާލް މެޑްރިޑުގެ ޒުވާން އުމުރުފުރާގެ ޓީމުން 2018 ވަނަ އަހަރު ކޯޗިން ކެރިއަރު ފެށި އަލޮންސޯ، ލެވަކޫސަންގެ ކޯޗުކަމާ ހަވާލުވީ 2022 ވަނަ އަހަރު އެވެ. އެ ކުލަބާ ހަވާލުވެ އޭނާ އަންނަނީ ކާމިޔާބު މަސައްކަތްތަކެއް ކުރަމުންނެވެ. މި ސީޒަންގެ ޖަރުމަނު ލީގުގައި އެ ޓީމުން ރަނގަޅު ނަތީޖާތަކެއް ނެރެމުން އަންނައިރު، މިވަގުތު އެއް ވަނައިގައި އޮތީ ވެސް އެ ޓީމެވެ. އަނެއްކޮޅުން، މި ސީޒަންގެ ޖަރުމަނު ލީގުގައި ވެސް ހަމައެކަނި ބަލި ނުވެ އޮތް ޓީމަކީ ލެވަކޫސަން އެވެ.