އަޔަން މޭން މާލެ އައުމުން ހޫނު މަރުހަބާއެއް ކިޔައިފި

ސައުތު އެފްރިކަން އަޔަން މޭން ޗެމްޕިއަންޝިޕްގައި ބައިވެރިވެ ރޭސް ނިންމި ފުރަތަމަ ދިވެހި އެތުލީޓު ޑރ. ހުސައިން ހަލީމް (ކުޑަ ހުސެން) މާލެ އައުމުން ހޫނު މަރުހަބާއެއް ކިޔައިފި އެވެ.

ބުދަ ދުވަހު ހެނދުނު ކުޑަ ހުސެން މާލެ އައުމުން އޭނާއަށް ވެލާނާ އިންޓަނޭޝަނަލް އެއާޕޯޓުން މަރުހަބާކީ އޭނާގެ އާއިލާ އާއި ކުޑަ ހުސެން އެކަޑަމީގެ މެމްބަރުންގެ އިތުރުން ކުޅިވަރުގެ ބައެއް އެތުލީޓުންނެވެ. އެގޮތުން އޭނާއަށް މަރުހަބާ ކިޔުމަށް އެއާ ޕޯޓުގައި ވަނީ "ދަ އޮންލީ އަޔަން މޭން އިން ދަ މޯލްޑިވްސް" ޖަހާފައިވާ ބެނާއެއް ވެސް ދަމާފަ އެވެ.

އަޔަން މޭން ރޭހެއްގައި މައިގަނޑު ގޮތެއްގައި ހިމެނެނީ ތިން އިވެންޓެވެ. އެއީ 3.8 ކިލޯ މީޓަރަށް ފެތުމާއި 180.2 ކިލޯ މީޓަރަށް ބައިސްކަލް ދުއްވުމުގެ އިތުރުން 42.195 ކިލޯ މީޓަރަށް ދުވުމެވެ. ފުލުފުލުން ނިންމަންޖެހޭ މި ރޭސްތައް އެއްކޮށް ނިންމަންޖެހޭ ވަގުތަކީ 17 ގަޑި އިރެވެ.

ކުޑަ ހުސެން މިރޭސް ނިންމާފައި ވަނީ 15 ގަޑި އިރާއި 23 މިނެޓުންނެވެ. އެއީ އޭނާގެ އޭޖް ކެޓަގަރީގައި ހިމެނޭ މީހުންގެ ތެރެއިން 295 ވަނައިގަ އެވެ. މި ރޭހުގައި ޖުމްލަ 2,100 މީހުން ބައިވެރިވި އެވެ.

ކުޑަ ހުސެން ބުނި ގޮތުން ނަމަ 17 ގަޑި އިރުގެ މި ދިގު ރޭސް ނިންމުމަކީ އާދައިގެ މީހަކަށް ކުރަން އެހާ ފަސޭހަ ކަމެއް ނޫނެވެ.

ކުޑަ ހުސެން އަކީ އަޔަން މޭން ރޭސް ފުރަތަމަ ނިންމި ދިވެހި އެތުލީޓެވެ. ދިވެހިންނަށް އެތައް ގޮތަކުން މިފަދަ ނަމޫނާ ދައްކަމުން އަންނަ ކުޑަ ހުސޭނަކީ މީގެ 27 އަހަރު ކުރިން 1989 ވަނަ އަހަރު ޕާކިސްތާނުގައި ބޭއްވި ސާފް ގޭމްސްގައި ބައިވެރިވެ ދުވުމުގެ ގައުމީ ފުރަތަމަ ރެކޯޑް ވެސް ގާއިމުކޮށްފައިވާ ފަރާތެވެ. އެހެން ނަމަވެސް މިހާރު އެ ރެކޯޑް ވަނީ އޭނާ އަތުން ބީވެފަ އެވެ.

އަޔަން މޭން ރޭހަކީ 1978 ވަނަ އަހަރު ހަވާއީގައި އުޅުނު އެކުވެރިންތަކެއްގެ މެދުގައި އުފެދުނު ދެބަސްވުމެއްގެ ތެރެއިން އުފަންވި ހަރަކާތެކެވެ.

މިހާރު މި މުބާރާތަކީ ދުނިޔޭގައި ބާއްވާ މުބާރާތްތަކުގެ ތެރެއިން އެންމެ ގިނަ މީހުންނަށް އެއްފަހަރާ ބައިވެރިވެވޭ އެންމެ ބުރަ އަދި ވާދަވެރި މުބާރާތެވެ.