އަހަރެންނަކީ ޖާދޫ ގަރެއް ނޫން: ޕޮސްޓެކޮގްލޫ

އޭނާ އަކީ ޖާދޫ ގަރެއް ނޫން ކަމަށް، އިނގިރޭސި ޕްރިމިއާ ލީގުގެ ޓޮޓެންހަމަށް އިރުޝާދު ދެމުން އަންނަ އަންގޭ ޕޮސްޓެކޮގްލޫ ބުނެފި އެވެ.

ޕޮސްޓެކޮގްލޫ މިހެން ބުނީ ލީގުގައި ވުލްވްސްއާ ދެކޮޅަށް ކުޅެ ޓޮޓެންހަމް ބަލިވި މެޗަށްފަހު ވާހަކަ ދައްކަމުންނެވެ. ސީޒަންގެ ކުރީ ކޮޅު ރަނގަޅު ނަތީޖާއެއް ނެރެމުން އައި ޓޮޓެންހަމްގެ ނަތީޖާތައް މިހާރު ވަނީ ދަށްވެފަ އެވެ. އަމިއްލަ ދަނޑުގައި ވުލްވްސްއާ ދެކޮޅަށް ކުޅުނު މެޗުން އެ ޓީމު ބަލިވީ 2-1 އިންނެވެ.

އެ މެޗަށްފަހު ވާހަކަ ދައްކަމުން ޕޮސްޓެކޮގްލޫ ބުނީ، އޭނާ އަކީ ފުޓުބޯޅަ ކޯޗެއް ކަމަށާއި، ޖާދޫ ހަދާ ޖާދޫ ގަރެއް ނޫން ކަމަށެވެ. އެކަން ފާހަގަކޮށް އޭނާ ބުނީ، މަސައްކަތް ކުރަމުން އަންނަނީ ޓޮޓެންހަމް އަކީ އެންމެ ރަނގަޅު ޓީމަށް ހެދުމަަށް ކަމަށެވެ. އަދި ޚާއްސަކޮށް، މި ސީޒަން ނިމެންވާއިރު، ރަނގަޅު އެއްޗެއް ބިނާ ކުރުމަކީ އެންމެ މުހިންމު އެއް އަމާޒު ކަމަށް ވެސް އޭނާ ބުންޏެވެ. އެކަމެއް ބަދަލު ނުވާނެ ކަމަށާއި، އެކަމުގައި މަސައްކަތް ކުރުމުގައި ދެމި ތިބޭނެ ކަމަށް ވެސް އޭނާ ވަނީ ބުނެފަ އެވެ.

މީގެ އިތުރުން އޭނާ ބުނީ މަސައްކަތް ކުރާނީ ގަދަ ހަތަރެއްގެ ތެރޭގައި އޮތުމަށް ކަަމަށާއި، އެހެން އަމާޒަކަށް ވިސްނާނީ އެއަށްފަހު ކަމަށެވެ. ޓޮޓެންހަމްގައި މިހާރު ތިބި ކުޅުންތެރިންނާއެކު، އެ ޓީމަށް އެކަން ކާމިޔާބު ކުރެވޭނެ ކަމަށާއި، ބޭނުން ވަނީ ހިތްވަރާއި، އަޒުމު ކަމަށް ޕޮސްޓެކޮގްލޫ ބުންޏެވެ. ވުލްވްސް މެޗަށްފަހު، ދެން ތައްޔާރު ވާނީ ކުރިއަށް އޮތް މެޗަށް ކަމަށާއި، ފަހަތް ބަލައިގެން ހޯދޭނެ ކާމިޔާބެއް ނެތް ކަމަށް އޭނާ ބުންޏެވެ.

މި ސީޒަންގެ މިހާތަނަށް ޓޮޓެންހަމުން ވަނީ 25 މެޗު ކުޅެފަ އެވެ. އޭގެ ތެރެއިން އެ ޓީމު ވަނީ 14 މެޗަކުން މޮޅުވެފަ އެވެ. ފަސް މެޗު އެއްވަރުވެފައިވާއިރު، ހަ މެޗަކުން ބަލިވެފައިވެ އެވެ. މިހާތަނަށް ލިބުނު 47 ޕޮއިންޓާއެކު އެ ޓީމު އޮތީ ފަސް ވަނައިގަ އެވެ. ހަމަ އެ އަދަދަށް މެޗު ކުޅެގެން، ހަތަރު ވަނައިގައި އެސްޓަން ވިލާ އަށް ލިބެނޫ 49 ޕޮއިންޓެވެ.