25 ރުފިޔާ އަށް މަސް ގަތުމަކީ ސަރުކާރަށް ކެރިކުޅަދާނަ ވެގެންވާ ކަމެއް ނޫން ކަމަށާއި މަސް ގަންނަ އަގު 25 ރުފިޔާ އަށް ބަދަލުކުރުމުގެ އަޑު މަސްވެރިންގެ ފަރާތުން އިވިވަޑައިގަންނަވާފައިނުވާ ކަމަށް މިނިސްޓަރ އޮފް ފިޝަރީޒް އެންޑް އޯޝަން ރިސޯސަސް އަޙްމަދު ޝިޔާމް ވިދާޅުވެއްޖެއެވެ.

ޝިޔާމް މިހެން ވިދާޅުވީ ރައްޔިތުންގެ މަޖިލީހުގެ ދާންދޫ ދާއިރާގެ މެންބަރު ޔަޢުޤޫބު ޢަބްދުالله، ޝިޔާމާއި ކުރައްވި ސުވާލަށް ޖަވާބުދެއްވަމުންނެވެ. މެންްބަރު ޔައުޤޫބު ސުވާލުކުރެއްވީ އެމްޑީޕީ ސަރުކާރުން މަސްވެރިންނަށް ހެޔޮ ބަދަލު ގެނައުމުގެ ސިޔާސަތުގެ ދަށުން މަހުގެ އަގު 17 ރުފިޔާ އިން 25 ރުފިޔާ އަށް ބޮޑުކުރި ނަމަވެސް، މި ސަރުކާރުން އެއްވެސް ވަރަކަށް މަހުގެ އަގު ކުޑަކުރުމުގެ ވިސްނުން ގެންގުޅޭތޯއެވެ.

ޖަވާބުގައި ޝިޔާމް ވިދާޅުވީ ނިމިދިޔަ އެމްޑީޕީގެ ސަރުކާރުން މަސްވެރިންގެ އަތުން މަސް ގަންނަ އަގު ބޮޑުކޮށްފައި ވަނީ ސިޔާސީ ބޭނުމެއްގައި ކަަމަށާއި އެކަމުގައި އެ ސަރުކާރުގެ އިހުލާސްތެރި ނިޔަތެއް އޮތް ކަމަށް ކުރިން ވެސް މިހާރުވެސް ޤަބޫލު ނުކުރައްވާ ކަމަށެވެ. އެ ބަދަލު ގެނައީ 16 ސެޕްޓެމްބަރ 2023ގައި ކަމަށާއި އެއީ ރިޔާސީ އިންތިޚާބުގެ ދުވަސްވަރު ނިންމި ސިޔާސީ ނިންމުމެއް ކަމަށް އޭނާ ވަނީ ތަކުރާރުކޮށް ވިދާޅުވެފައެެވެ. އަދި މަސްވެރިން ބޭނުންވަނީ މަހުގެ އަގު ބޮޑުކުރުން ނޫންކަމަށާއި މަހުގެ އަގު ހަމައަށް ލިބުން ކަމަށް ވެސް ޝިޔާމް ވިދާޅުވިއެވެ.

މީގެ އިތުރުން މި ސަރުކާރުން ވައުދުވީ މަހުގެ އަގު 20 ރުފިޔާ އަށް ވުރެ ދަށް ނުކުރުމަށް ކަމަށް ވެސް ޝިޔާމް ވިދާޅުވިއެވެ. އެގޮތަށް ސަރުކާރުން ވައުދުވީ ދުނިޔޭގެ ބާޒާރުގައި މަހުގެ އަގު ހުރިގޮތާއި، މިފްކޯގެ ހިންގުމަށް ބަދަލު ގެނައުމުގެ ވިސްނުން ހުރުމުން ކަމަށް ޝިޔާމް ވިދާޅުވިއެވެ. އޭރު މަސް ބޭރުކުރާ ބާޒާރުގައި މަހުގެ އަގު ހުރީ 1450 ޑޮލަރަށް ޓަނެއްގައި ކަމަށާއި ދިވެހި ފައިސާއިން ބަލާނަމަ އެއީ 22 ރުފިޔާ 40 ލާރިއަށް ކިލޯއެއް ކަމަށް ޝިޔާމް ވިދާޅުވިއެވެ.

17 ރުފިޔާ އަށް ގަންނަމުން އައި މަސް 25 ރުފިޔާ އަށް ބަދަލުކުރުމަކީ މިފްކޯގެ ހިންގުމުގެ ޚަރަދާ ނުލާވެސް 2 ރުފިޔާ 60 ލާރީގެ ގެއްލުމުގައި މަސް ގަންނަން ނިންމި ނިންމުމެއް ކަމަށް ޝިޔާމް ވިދާޅުވިއެވެ. އަދި މިފްކޯގެ ހިންގުމުގެ ޚަރަދު 35 އިންސައްތަ ކަމަށް ބެލި ނަމަވެސް، މަސް ގަންނަން ޖެހެނީ 11 ރުފިޔާގެ ގެއްލުމުގައި ކަމަށާއި އެއީ ދައުލަތުގެ އާމްދަނީ މިވަގުތު ހުރިގޮތުން ދިވެހި ދައުލަތަށް ބޮޑު ބުރައަކަށް ވާނެ ކަމަށް ޝިޔާމް ވިދާޅުވިއެވެ. އެކަން އެގޮތަށް ކުރާ ނަމަ 2024ގައި 1.1 ބިލިއަން ރުފިޔާ މަސް ގަންނަން ސަބްސިޑީގެ ގޮތުގައި ހޭދަކުރަން ޖެހޭނެ ކަމަށް ޝިޔާމް ވަނީ ވިދާޅުވެފައެވެ.