މުޒާހަރާތަކުގައި މަސްވެރިން ބައިވެރިވާން ޖެހޭ، އެ ނޫން ގޮތަކަށް ހައްގެއް ނުލިބޭނެ: ނާޒިލް
ރައީސް މުއިއްޒަކީ އިންތިހާއަށް ދޮގު ހައްދަވާ ބޭފުޅެއް
މުޒާހަރާގައި ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ވާހަކަދައްކަވަނީ
ރައީސުލްޖުމްހޫރިއްޔާ ޑރ.މުހައްމަދު މުއިއްޒު މަސްވެރިންނަށް ވައުދުވެވަޑައިގެންނެވި ގޮތަށް އަމަލު ކުރަމުން ނުދާ ކަމަށާއި، މުޒާހަރާތަކުގައި މަސްވެރިން ބައިވެރިވާންޖެހޭ ކަމަށް ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ވިދާޅުވެއްޖެއެވެ.
ހުކުރު ދުވަހުގެ ރޭ ކުރިއަށް ގެންދިޔަ އެމްޑީޕީ ކުއްލި އެއްވުމުގައި ވާހަކަ ދައްކަވަމުން މެންބަރު ނާޒިލް ވިދާޅުވީ ރައީސް މުއިއްޒަކީ އިންތިހާއަށް ދޮގު ހައްދަވާ ބޭފުޅެއް ކަމަށާއި، ރިޔާސީ އިންތިޚާބުގެ ކެމްޕޭން ދުވަސްވަރުން ފެށިގެން މިއަދާއި ހިސާބަށް އެމަނިކުފާނު ގެންދަވަނީ ދޮގު ހައްދަވަމުން ކަމަށެވެ.
މަސްވެރިންނަށް ރައީސް މުއިއްޒު ވެވެވަޑައިގެންނެވި ވައުދުފުޅުތަކަށް އިޝާރާތް ކުރައްވައި މެންބަރު ނާޒިލް ވިދާޅުވީ މަސްވެރިންނަށް ހަމަ އަގަށް ފައިސާ ނުދެވޭ ކަމަށާއި، ޑޮލަރުން ވެސް ފައިސާ ނުދެވޭ ކަމަށެވެ.
މެންބަރު ނާޒިލް ވިދާޅުވީ ކުރީ ސަރުކާރުން ފައިސާއަށް ހިޔާނާތްތެރިވެފައިވާކަން ބުނެ، މަސްވެރިންނަށް ފައިސާ ނުދީ ގާތްގަނޑަކަށް 3 މަސް ދުވަހު ހިފަހައްޓާލައި، މަސްވެރިންނަށް ދަތިކޮށްފައިވާ ކަމަށެވެ. އެދުވަހު ވެސް މަސްވެރިންނަށް ފައިސާ ލިބިގެންދިޔައީ އެމްޑީޕީ މެންބަރުން މަސްވެރިންނާއެކު ނުކުމެ ކުރި މުޒާހަރާތަކުގެ ސަބަބުން ކަމަށް މެންބަރު ނާޒިލް ވިދާޅުވިއެވެ. އަދި ވިދާޅުވީ މިހާރު މަސްވެރިންނަށް ބާނާ މަހަށް ފައިސާ ދެމުންދަނީ ބޭންކް އޮފް މޯލްޑިވްސްއިން ދަރަންޏަށް ފައިސާ ނަގައިގެން ކަމަށާއި، މިގޮތަށް މިކަން އަބަދު ނުހިނގާނެ ކަމަށެވެ.
އެހެންކަމުން މަސްވެރިންގެ ހައްގު ހޯދުމަށް އަދި ރައީސް މުއިއްޒު ވައުދުވެވަޑައިގެންނެވި ގޮތަށް ކަންކަމަށް ކަންކަން ހަމަޖެއްސުމަށް އެމްޑީޕީން ކުރަމުންދާ މި މުޒާހަރާތަކުގައި މަސްވެރިން ބައިވެރިވާންޖެހޭ ކަމަށް މެންބަރު ނާޒިލް ވިދާޅުވިއެވެ.
މީގެ އިތުރުން މެންބަރު ނާޒިލް ވިދާޅުވީ މަސްވެރިންގެ އަތުން މަސް ގަތުމަށްފަހު ރާއްޖެއިން ބޭރަށް މަސް ފޮނުވައި، ލިބޭ ޑޮލަރު ސަރުކާރުން ނަގަމުންދާ ކަމަށެވެ.
މިހާރު މަސްވެރިން ބަނާ މަހަށް ފައިސާ ދެމުންދަނީ ބޭންކް އޮފް މޯލްޑިވްސްއިން ދަރަންޏަށް ފައިސާ ނަގައިގެން. ދުވަސްކޮޅަކަށް ދެވިދާނެ. ދެން ވާނެ ގޮތެއް މަސްވެރިންނަށް އެހައި ސާފެއް ނޫން. މުއިއްޒު ވިދާޅުވި ގޮތަށް އަމަލުނުކުރާތީ މަސްވެރިން މި މުޒާހަރާއަށް ބައިވެރިވާންޖެހޭ. އަޅުގަނޑުމެން މިކުރި މަސައްކަތުން މިހާރު ވެސް އެލިބޭ އެއްޗެއް ލިބެނީ. މި އެމްޑީޕީ މީހުން މަސްވެރިންގެ ހައްގުގައި މިތާގައި ހުރި ފަޅުތެރޭގައި ހުރި ދޯނިތަކަށް އަރައި އެދެއްކި ވާހަކައާއި، އެކުރި ޑިމާންޑުތަކާއި ގުޅިގެން ލިބޭ އެއްޗެއް ލިބެނީ. އޭރު ވެސް ދެމުންދިޔައީ 20 ރުފިޔާ އާ ހިސާބަށް މަސްކިލޯއެއް ގަންނާނަމޭ. ކަންނެލި މަސްކިލޯއެއް 100 ރުފިޔާއަށް ގަންނާނަމޭ. ނުގަނޭ އެކަމަކު.ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް
މެންބަރު ނާޒިލް ވިދާޅުވީ މި ސަރުކާރަކީ މަސްވެރިންނަށް ހެޔޮ އެދޭ ސަރުކާރެއް ނޫން ކަމަށާއި، މިސަރުކާރާއެކު ރާއްޖެ ދަނީ ފަހަތަށް ކަމަށެވެ. ރައްޔިތުން އިތުރަށް ނިކަމެތިނުވެ، ދިވެހި ރައްޔިތުންގެ ހައްގުގައި މުޒާހަރާއަށް ނުކުންނަން ޖެހޭ ކަމަށް މެންބަރު ނާޒިލް ވިދާޅުވިއެވެ.
