ޓެކުހުގެ ދާއިރާގެ އެންމެ އުހުން މަޖިލީހަށް، ތިމަރަފުށީ ދާއިރާއަށް ޚިދުމަތް ކުރެއްވުމަށް ތަޖުރިބާގެ ބޭނުން ހިފާނެ
ފަތުހުﷲ ވިދާޅުވީ، ތިމަރަފުށީ ދާއިރާއަށް ވާދަ ކުރައްވަން ނިންމަވާފައިވާ ކަމަށް
ކުރީގެ ކޮމިޝަނާ ޖެނެރަލް އޮފް ޓެކްސޭޝަން ފަތުހުﷲ ޖަމީލް
ކުރިއަށް އޮތް ރައްޔިތުންގެ މަޖިލީހުގައި ތިމަރަފުށީ ދާއިރާއަށް ކުރިމަތިލައްވަން ނިންމަވާފައިވާކަމަށް ފޯމަރ ކޮމިޝަނަރ ޖެނެރަލް އޮފް ޓެކްސޭޝަން ފަތުހުﷲ ޖަމީލް ވިދާޅުވެއްޖެއެވެ.
އާދިއްތަ ދުވަހު ރާއްޖެޓީވީގެ ފަށާއިރު ޕްރޮގްރާމްގައި ފަތުހުﷲ ވިދާޅުވީ، ތިމަރަފުށީ ދާއިރާއަށް ވާދަ ކުރައްވަން ނިންމަވާފައިވާ ކަމަށެވެ. ފަތުހުﷲ ވާދަ ކުރައްވަނީ އެމްޑީޕީންނެވެ.
ޓެކްސްގެ ދާއިރާއިން ރާއްޖެއިން ދެވެން ހުރި އެންމެ މައްޗަކަށް ދެވިފައިވާއިރު، މަޤްސަދަކީ އެ ތަޖުރިބާގެ ބޭނުން ހިފައިގެން މަޖިލީހުގައި ޚިދުމަތް ކުރެއްވުންކަން ފަތުހުﷲ ފާހަގަ ކުރެއްވިއެވެ.
ފަތުހުﷲ ވިދާޅުވީ، މަޖިލީހަށް އިންތިޚާބުވެއްޖެނަމަ ކުރިން މަސައްކަތް ކުރެއްވި ދާއިރާގެ ތަޖުރިބާގެ ބޭނުން ހިފޭނެކަމުގެ ޔަޤީންކަން އެބައޮތް ކަމަށެވެ.
އޭގެ އިތުރުން، ރަށުގައި ހުރެގެން އާމްދަނީ ހޯދޭނެ ގޮތްތައް ހޯދައިދިނުމާއި، ތައުލީމާއި، ސިއްޙީ ދާއިރާއަކީ އިސްކަމެއް ދެއްވައިގެން މަސައްކަތް ކުރައްވާނެ ދާއިރާތައްކަން ފަތުހުﷲ ފާހަގަ ކުރެއްވިއެވެ.
ކޮމިޝަނަރ ޖެނެރަލް އޮފް ޓެކްސޭޝަންގެ މަޤާމަށް ފަތުހުﷲ ވަޑައިގަތީ މީރާގައި އެކިއެކި އިސްމަގާމުތަކެއް ފުރުއްވާފައެވެ. ޓެކްސް ނިޒާމް ތައާރަފް ކުރިއިރު، ޓެކްސާ ގުޅޭ ކަންކަމުގައި މީހުން ހޭލުންތެރި ކުރުމާއި، މީޑިއާތަކަށް މައުލޫމާތު ދެއްވުމުގައިވެސް ފަތުހުﷲ ވަނީ އިސްދައުރެއް އަދާކުރައްވާފަ އެވެ.
