ފޮޑެންގެ ހެޓްރިކުން މެންޗެސްޓަރ ސިޓީ ދެވަނަ އަށް

ފިލް ފޮޑެންގެ ހެޓްރިކުން ބްރެޓްފޯޑް ބަލިކޮށް, މެންޗެސްޓަރ ސިޓީން ލީގު ތާވަލްގެ ދެވަނަ އަށް އަލުން ޖެހިލައިފި އެވެ.

ބްރެންޓްފޯޑްގެ ދަނޑުގައި ކުޅުނު މެޗު ސިޓީން ކާމިޔާބުކުރީ 3-1 ނެވެ. މެޗުގައި ސިޓީގެ ތިން ލަނޑުވެސް ޖެހީ ފޮޑެން އެވެ. ތިން ލަނޑުވެސް ޖެހީ 21 ވަނަ މިނިޓްގައި ބްރެޓްފޯޑުން ލީޑް ނަގާފައި ވަނިކޮށެވެ. އެއީ ނީލް މޯޕޭގެ ލަނޑުންނެވެ. ފޮޑެން ނަތީޖާ ހަމަހަމަ ކޮށްދިނީ ފުރަތަމަ ހާފްގެ އިތުރު ވަގުތުގައެވެ. ޑި ބުރޭނާ ތަނަވަސްކޮށްދިން ފުރުޞަތެއްގައި ލީޑް ނަގައިދިނީ ދެވަނަ ހާފްގެ ކުރީކޮޅު އެވެ. ހެޓްރިކް ހަދަން ފުރުޞަތު ތަނަަވަސްކޮށްދިނީ ހާލަންޑެވެ.

ތާވަލްގެ ދެވަނައިގައި ސިޓީ އޮތީ އެއްވަނައިގައި އޮތް ލިވަޕޫލަށްވުރެ މަދުން މެޗެއް ކުޅެގެން ދެ ޕޮއިންޓްގެ ފަރަގަކާއެކު އެވެ. އެހެންކަމުން ހޮނިހިރު ދުވަހު އެވަޓަން ބަލިކޮށްގެން ލީގު ތާވަލްގެ އެއްވަނަ އަށް ޖެހިލަން ސިޓީއަށް ފުރުޞަތު އޮންނާނެ އެވެ. ތިންވަނައިގައި އާސެނަލް އޮތީ ސިޓީއާ އެއް އަދަދަކަށް ޕޮއިންޓް ހޯދައިގެންނެވެ. ނަމަވެސް އާސެނަލް ވެސް ވަނީ ސިޓީއަށް ވުރެ އިތުރަށް މެޗެއް ކުޅެފައެވެ.