ފަލަސްޠީނުގައި އުފެދުނު ދާޚިލީ ހަމަނުޖެހުންތަކަކަށް ފަހު، ޙަމާސް ޖަމާޢަތުން 2007 ވަނަ އަހަރު ޣައްޒާގެ ކޮންޓްރޯލް ނެގި ފަހުން، މިދިޔަ 16 ވަރަކަށް އަހަރަކީވެސް ޣައްޒާއަށް މާ ތިޔާގި ދުވަސްތަކެއް ނޫނެވެ. ފަލަސްޠީނުގެ ބިންތަކަށް ވެރިވެގަނެ، މުޅި ސަރަޙައްދު މުށްދަށު ލުމަށް ދަހިވެތި ވެފައި އޮތް ޔަހޫދީ އިޒްރޭލާއި، ޣައްޒާއާ ބޯޑަރު ހިއްސާ ކުރާ މިޞްރުގެ އިތުރުން، ފަލަސްޠީނުގެ މައި ސަރުކާރުންވެސް ޣައްޒާ ފިއްތާލީއެވެ.

ދުނިޔޭގެ އެންމެ ބޮޑު، އަނގަމަތި ހާ ޖަލުގެ ގޮތުގައި ސިފަ ކުރާ ޣައްޒާގައި 2.3 މިލިއަނެއްހާ މީހުން، އިންތިހާ ދަތި ޙާލުގައި، އެހެން ނަމަވެސް، ލިބުނު އެއްޗަކުން ފުއްދާލައިގެން ދިރިއުޅުމައިގެން ކުރިއަށް ދަނިކޮށް، ނިރުބަވެރި އިޒްރޭލުން މީގެ 4 މަހެއްހާ ދުވަސް ކުރިން ހިންގަން ފެށި ޤަތުލުޢާންމުގައި މުޅި ޣައްޒާ އެފުށް މިފުށަށް ޖަހައިފިއެވެ. ޣައްޒާގެ އުފެއްދުންތެރިކަމުގެ ނިސްބަތް ނުވަތަ ޖީޑީޕީ، ޤަތުލުޢާންމުގެ ކުރިން ހުރި މިންވަރުތަކާ ހިސާބަށް ގެންދިއުމަށް އެކަނިވެސް 'އެތައް 10 އަހަރެއް' ހޭދަ ވާނެ ކަމަށް، ވިޔަފާރިއާ ބެހޭ އދގެ އިދާރާއިން ޢާންމު ކުރި ރިޕޯޓްގައި ބުނެފައި ވެއެވެ. އެއީވެސް، މިހާރުން މިހާރަށް ޤަތުލުޢާންމުގައި ސިއްކަ ޖަހައިފިނަމައެވެ.

އދގެ ކޮންފަރެންސް އޮން ޓްރޭޑް އެންޑް ޑިވަލޮޕްމަންޓް (ޔޫއެންސީޓެޑް) އިން ބުނާ ގޮތުގައި، ޤަތުލުޢާންމާއެކު ޣައްޒާގެ ޖީޑީޕީ، 24 ޕަސެންޓް ދަށްވެ، އިޤްތިޞާދު ހީނަރުވެ، ޖީޑީޕީއިން އަހަރެއްގެ މައްޗަށް ބޮލަކަށް ޖެހޭ ނިސްބަތްވެސް 21 ޕަސެންޓް ވަނީ ދަށްވެފައެވެ.

ޣައްޒާއަށް ދެމުންދާ ޢުދުވާނީ ޙަމަލާތައް ހުއްޓާލާ، އާރާސްތު ކުރުމުގެ މަސައްކަތް މިހާރުން މިހާރަށް ފަށައިފި ނަމަ، 2002 އާއި 2007 ވަނަ އަހަރާ ދެމެދު ހޯދި އިޤްތިޞާދީ ކުރިއެރުންތަކާ އެއް ފަންތިއެއްގައި، އިޤްތިޞާދީ ކުރިއެރުމުގެ ދުވެލި، 0.4 ޕަސެންޓްގައި ބެހެއްޓޭނީ، ނުވަތަ ޤަތުލުޢާންމުގެ ކުރިން، ޣައްޒާގެ ޖީޑީޕީ ހުރި ހިސާބަށް ވާސިލު ވެވޭ ވަރު ވާނީ، 2092 ވަނަ އަހަރުގައި ކަމަށް، ވިޔަފާރިއާ ބެހޭ އދގެ އިދާރާއިން ވަނީ ބުނެފައެވެ.

ހުރިހާ ކަމެއްވެސް އެންމެ ފުރިހަމައަށް ހިނގަމުން ދާ ނަމަ، ޣައްޒާގެ ޖީޑީޕީ ކުރި އަރާ ދިއުމުގެ ނިސްބަތް އުޅޭނީ އަހަރަކަށް ބަލާނަމަ 10 ޕަސެންޓްގައި ކަމަށާ، 2006 ވަނަ އަހަރު ޣައްޒާއަށް ފިއްތުންތައް ކުރިމަތިވާން ފެށި ދުވަސްވަރުގެ ކުރިން، ޖީޑީޕީއިން ބޮލަކަށް ޖެހުނު މިންވަރާ އެއް ހަމައަކަށް އެ ނިސްބަތް ގެންދެވެނީ 2035 ހާ ހިސާބުގައި ކަމަށްވެސް އދއިން ވަނީ ބުނެފައެވެ.

2014 ވަނަ އަހަރަކީވެސް އިޒްރޭލުގެ ވަރުގަދަ ޢުދުވާންތަކެއް ޣައްޒާއަށް އަމާޒު ކުރި އަހަރެކެވެ. އެ ފަހަރުގެ ޙަމަލާތަކުގައި ޣައްޒާއަށް ލިބުނު ގެއްލުމުގެ އަގު އެކަނިވެސް 3.9 ބިލިއަން ޑޮލަރަށް އަރައެވެ. އެހެންކަމުން، މިހާރު ހިންގަމުންދާ ޤަތުލުޢާންމުގައި ޣައްޒާއަށް ކުރިމަތިވެފައި އޮތް ގެއްލުމުގެ އަގު ވަޒަން ކުރަންވެސް ދައްޗެވެ.

ސިލްސިލާ ގޮތެއްގައި އިޒްރޭލުން ކުރިމަތިކުރާ ފިއްތުންތަކާއި ފުރައްސާރައިގެ ސަބަބުން، ޤަތުލުޢާންމުގެ ކުރިންވެސް، ޣައްޒާގެ އިޤްތިޞާދު އޮތީ ހީނަރުވާ އަތަށް އަޅާފައެވެ. 2023 ވަނަ އަހަރުގެ ފުރަތަމަ 3 މަސްދުވަހުގެ ތެރޭގައި، ޣައްޒާގެ އިޤްތިޞާދު ހީނަރުވި ނިސްބަތް އުޅުނީ 4.5 ޕަސެންޓްގައި ކަމަށް ޔޫއެންސީޓެޑްއިން އަންދާޒާ ކުރެއެވެ.

ޣައްޒާގެ އާބަދީގެ 3 ބައިކުޅަ 2 ބައި މީހުންނަކީ އިންތިހާ ފަޤީރު ކަމުގެ ޙާލުގައި ދިރިއުޅޭ މީހުންނެވެ. ޤަތުލުޢާންމާއެކު، މިއަދު މުޅި އާބާދީ އޮތީ ރެފިއުޖީންނަށް ވެފައޭ ދެންނެވުމަކުން ގޯހެއް ނެތެވެ. ޣައްޒާގައި ވަޒީފާ އަދާ ކުރެވޭ ޢުމުރަށް ބަލާއިރު، 45 ޕަސެންޓް މީހުންނަކީ ވަޒީފާއެއް ނެތް މީހުންނެވެ. މި ދެންނެވި ޤަތުލުޢާންމުގެ ކުރިން، ޣައްޒާގެ ޙާލަތު އޮތް ގޮތެވެ.

ޔޫއެންސީޓެޑްއިން ހާމަ ކުރި ގޮތުގައި، މިދިޔަ ޑިސެމްބަރު މަހު، ޣައްޒާގައި ވަޒީފާއެއް ނެތް މީހުންގެ ނިސްބަތް ވަނީ 79.3 ޕަސެންޓަށް އިތުރުވެފައެވެ.