އިސްރާއީލް އިން ޣައްޒާގައި ހިންގަމުން އަންނަ ހަނގުރާމައާ ގުޅިގެން، ފަލަސްޠީނުގެ މިނިވަން ދައުލަތް ޤަބޫލު ކުރުމަށް އިތުރު ޤައުމު ތަކެއް ތާއީދު ލިބެމުންދާއިރު، ސައުދީ އަރަބިއްޔާ އާއި ފްރާންސް އިން ދެ ދައުލަތުގެ ޙައްލު ހޯދުމަށް އިތުރަށް މަގު ފަހި ކުރުމަށް މަސައްކަތް ފަށައިފި އެވެ.

އެމެރިކާގެ ނިއު ޔޯކުގައި ހުންނަ އދ ގެ މައި މަރުކަޒުގައި ހޯމަ ދުވަހު އޮންނަ ސަމިޓުގައި ގިނަ ޤައުމު ތަކެއްގެ ލީޑަރުން ބައިވެރިވެ ވަޑައިގަންނަވާއިރު، ދެ ދައުލަތުގެ ހައްލަކަށް މަގު ފަހި ކުރުމަށް މަޝްވަރާ ކުރުމަށް ވަނީ ހަމަ ޖެހިފަ އެވެ.

އެ ސަމިޓުގައި ބައެއް ޤައުމު ތަކުން ފަލަސްޠީނުގެ މިނިވަން ދައުލަތް ރަސްމީކޮށް ބަލައި ގަތުމަށް ނިންމާފައިވާއިރު، އިސްރާއީލް އާއި އެމެރިކާ އިން އެ ސަމިޓު ބޮއިކޮޓް ކުރާނެ ކަމަށްް، އިސްރާއީލް އިން އދ އަށް ކަނޑައަޅާފައި ހުންނަ އެމްބެސެޑަރު ޑެނީ ޑެނޮން ވަނީ ވިދާޅުވެފަ އެވެ. އޭނާ ވިދާޅުވެފައި ވަނީ، މި ފަދަ ސަމިޓެއް ބޭއްވުމަކީ މައްސަލަ އަށް އެހީތެރިވާނެ ކަމެއް ނޫން ކަމަށާއި، އެއީ ޓެރަރިޒަމް އަށް ހިތްވަރު ދިނުން ކަމަށެވެ.

ފްރާންސްގެ ރައީސް އިމަނުއެލް މެކްރޮން ހޯސްޓު ކުރައްވާ އެ ސަމިޓާ ދެކޮޅަށް އިސްރާއީލް އިން އަޅާނެ ފިޔަވަޅު ތަކުގެ ތެރޭގައި ވެސްޓް ބޭންކުގެ ބައެއް އެނެކްސް ކުރުމާއި، ފްރާންސްއާ ދެކޮޅަށް ވަކި ފިޔަވަޅު ތަކެއް އެޅުން ހިމެނިދާނެ ކަމަށް އިސްރާއީލްގެ ބައެއް އިސްވެރިން ވަނީ ހާމަކޮށްފަ އެވެ.

އެމެރިކާ އިން ވެސް ބުނެފައި ވަނީ، އިސްރާއީލްއާ ދެކޮޅަށް ފިޔަވަޅު އަޅާ ފަރާތްތަކަށް ނޭދެވޭ ނަތީޖާތަކާ ކުރިމަތިލާން ޖެހޭނެ ކަމުގެ އިންޒާރު ދީފަ އެވެ. އޭގެ ތެރޭގައި ސަމިޓު ބާއްވާ ފްރާންސްއާ ދެކޮޅަށް ވެސް ފިޔަވަޅު އެޅުން ހިމެނިދާނެ ކަމަށް ބުނެ ވަނީ އިންޒާރު ދީފަ އެވެ.

އިނގިރޭސިވިލާތާއި، ކެނެޑާ، އޮސްޓްރޭލިއާ އަދި ޕޯޗުގަލް އިން އާދީއްތަ ދުވަހު ވަނީ ފަލަސްޠީނުގެ މިނިވަން ދައުލަތް ރަސްމީކޮށް ބަލައިގެންފަ އެވެ. މީގެ އިތުރުން ފްރާންސް އާއި އިތުރު އެހެން ފަސް ޤައުމަކުން ހޯމަ ދުވަހު އޮންނަ ސަމިޓުގައި ފަލަސްޠީނުގެ މިނިވަން ދައުލަތް ރަސްމީކޮށް ބަލައި ގަތުމަށް ވަނީ ހަމަޖެހިފަ އެވެ.

އިސްރާއީލް އާއި އެމެރިކާ އިން ސަމިޓާ ދެކޮޅު ހަދާފައިވާއިރު، ސަމިޓުގައި ބައިވެރިވާ ފަލަސްޠީނުގެ ވަފުދަށް ވިސާ ނުދޭން އެމެރިކާ އިން ވަނީ ނިންމައިފަ އެވެ. އެކަމުގެ ސަބަބުން، ފަލަސްޠީނުގެ ރައީސް މަޙުމޫދު އައްބާސް އަށް ސަމިޓުގައި ބައިވެރިވެވޭ ގޮތް ވަނީ ނުވެފަ އެވެ. އޭގެ ބަދަލުގައި އދ އިން ނިންމާފައި ވަނީ ވީޑިއޯ ކޮންފަރެންސް މެދުވެރިކޮށް ސަމިޓުގައި ވާހަކަ ދެއްކެވުމުގެ ފުރުސަތު އައްބާސް އަށް ދިނުމަށެވެ.

ފްރާންސް އާއެކު ސަމިޓު ހޯސްޓު ކުރާ ސައުދީ އަރަބިއްޔާގެ ވަލީ އަޙުދު މުޙައްމަދު ބިން ސަލްމާން ވެސް ސަމިޓުގައި ބައިވެރިވެ ވަޑައިގަންނަވާނީ ވީޑިއޯ ކޮންފަރެންސް މެދުވެރިކޮށެވެ. ނަމަވެސް، ފްރާންސްގެ ރައީސް މެކްރޮން ސަމިޓުގައި ބައިވެރިވުމަށް އެމެރިކާ އަށް ވަޑައިގަންނަވާނެ އެވެ.

ސަމިޓާ ގުޅޭ ގޮތުން ވާހަކަ ދައްކަވަމުން ފަލަސްޠީނުގެ ފޮރިން މިނިސްޓަރު ވަރްސެން އަޣާބެކިއަން ޝާހިން ވިދާޅުވެފައި ވަނީ، މުޅި ދުނިޔޭގައި ވެސް ފަލަސްޠީނުގެ ދައުލަތް ބަލައި ގަތުމުގެ ވާހަކަ ހަރު އަޑުން ދައްކަމުން އަންނަ ކަމަށާއި، މިހާރު ޖެހޭނީ އެކަން ހަގީގަތަކަށް ހެދުމަށް އަޅަން ޖެހޭ ފިޔަވަޅުތައް އަޅަން ކަމަށެވެ.