އދ ގެ ޚާއްސަ ރެފައުޓާ ފްރާންސެސްކާ އަލްބަނީސްއާ ދެކޮޅަށް ދަތި ކުރުމުގެ ފިޔަވަޅު އަޅަން އެމެރިކާ އިން ނިންމައިފި އެވެ. 

މިއީ އިސްރާއީލް އިން ޣައްޒާގައި ހިންގަމުން އަންނަ ހަނގުރާމަ ކުށްވެރިކޮށް، އިސްރާއީލަށް ފާޑު ކިޔަމުން އަންނާތީ އޭނާއާ ދެކޮޅަށް އެމެރިކާ އިން އަޅާފައިވާ ފިޔަވަޅެވެ.

އެކަން ހާމަކޮށްފައި ވަނީ އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ އެވެ. ރޫބިއޯ ވިދާޅުވީ، އަލްބަނީސް މަަސައްކަތް ކުރަނީ އެމެރިކާ އާއި، އިސްރާއީލާ ދެކޮޅަށް ބައިނަލްއަޤުވާމީ ކްރިމިނަލް ކޯޓުން ފިޔަވަޅު އަޅަން ކަމަށެވެ. އަދި އެމެރިކާ އާއި އިސްރާއީލާއި، އަދި އެ ދެ ޤައުމާ ގުޅުން އޮންނަ ކުންފުނިތަކާ ދެކޮޅަށް ފިޔަވަޅު އެޅުމަށް ކަމަށް ވެސް ވިދާޅުވި އެވެ.

އެހެންވެ، އެމެރިކާ އިން އަލްބަނީސްއާ ދެކޮޅަށް ފިޔަވަޅު އަޅަން ނިންމާފައިވާ ކަމަށް ރޫބިއޯ ވަނީ ހާމަ ކޮށްފަ އެވެ.

އިޓަލީ އަށް ނިސްބަތްވާ އަލްބަނީސް ވަނީ އިސްރާއީލް އިން ޣައްޒާގައި ހިންގަމުން ދަނީ ނަސްލު ނައްތާލުމުގެ ކެމްޕެއިނެއް ކަމަށް ވިދާޅުވެފަ އެވެ. އަދި ޤައުމުތަކުން އިސްރާއީލާ އެކު ހަތިޔާރުގެ ވިޔަފާރި އާއި އެހެނިހެން ގުޅުންތައް މެދު ކަނޑާލުމަށް ވެސް އަލްބަނީސް ވަނީ ގޮވާލައްވައިފަ އެވެ.

އަލްބަނީސްއާ ދެކޮޅަށް ފިޔަވަޅު އަޅަން އެމެރިކާ އިން ނިންމުމާ އެކު، އޭނާ ވިދާޅުވީ ޢަދުލު އިންސާފުގެ މަގުގައި ޚަރުދަނާކަމާ އެކު ދެމި ހުންނާނެ ކަމަށެވެ. އަދި އެމެރިކާގެ އެ ނިންމުމަކީ މާފިޔަ ސްޓައިލްގެ ބިއްރު ދެއްކުމުގެ އުކުޅެއް ކަމަށް ވެސް އޭނާ ވިދާޅުވި އެވެ.

އެމްނެސްޓީ އިންޓަނޭޝަނަލްގެ ސެކްރެޓަރީ ޖެނަރަލް އަގްނެސް ކަލަމާޑް ވިދާޅުވެފައި ވަނީ، އަލްބަނީސްއާ ދެކޮޅަށް އަޅާފައިވާ ފިޔަވަޅުތަކުގެ އަސަރު ކުޑަ ކުރުމަށް ހުރިހާ ސަރުކާރަކުން ވެސް މަސައްކަތް ކުރާނެ ކަމަށެވެ.

އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުން ވަނީ އދގެ އިންސާނީ ހައްގުތަކުގެ ކައުންސިލާ އެކު ގޮތް ގުޅުން މެދު ކަނޑާލައިފަ އެވެ. އަދި ފަަަލަސްޠީނުގެ ރެފިއުޖީންނަށް އެހީވާ ޔޫއެންއާރުޑަބްލިއުއޭ އަށް ދެމުން އައި މާލީ އެހީތެރިކަން ވެސް ވަނީ މެދު ކަނޑާލައިފަ އެވެ.

އަލްބަނީސްއާ ދެކޮޅަށް ފިޔަވަޅު އަޅަން އެމެރިކާ އިން ނިންމުމުން، ބައިނަލްއަޤުވާމީ ޖަމިއްޔާތަކާއި، އިދާރާ ތަކުން އަންނަނީ އެކަމަށް ފާޑު ކިޔަމުންނެވެ.