ސްޕެއިންގެ ބާސެލޯނާގެ ކޯޗުކަމުން ވަކިވާން ޒަވީ ހެނާންޑޭޒް ނިންމި ނިންމުމަކީ، ލިބުނު ހައިރާންކަމެއް ކަމަށް އެ ޓީމުގެ ސްޕޯޓިން ޑައިރެކްޓަރު ޑެކޯ ވިދާޅުވެއްޖެ އެވެ.
އޭނާ މިހެން ވިދާޅުވީ، ޒަވީގެ ނިންމުމާ ގުޅޭ ގޮތުން މީޑިއާ އަކަށް ދިން އިންޓަވިޔުއެއްގަ އެވެ. ޒަވީ ވަނީ، މިހާރު ކުރިއަށްދާ ސީޒަނަށް ފަހު ބާސެލޯނާ ދޫކޮށްލަން ނިންމައިފަ އެވެ. ޒަވީ ބުނެފައިވާ ގޮތުގައި، އެއީ އޭނާގެ އަމިއްލަ ނިންމުމެކެވެ. އަދި އެ ނިންމުމުގައި ކުލަބުގެ އެއްވެސް އިސްވެރިޔެއްގެ ނުފޫޒެއް ނޯންނާނެ ކަމުގައި ވެސް އޭނާ ބުންޏެވެ.
އެކަމާ ގުޅޭ ގޮތުން ވާހަކަ ދައްކަވަމުން ޑެކޯ ވިދާޅުވީ، ޒަވީގެ ނިންމުމުން ލިބުނީ ބޮޑު ހައިރާންކަމެއް ކަމަށެވެ. ޑެކޯ ބުނި ގޮތުގައި އޭނާ އާއި، ބާސެލޯނާގެ އިސްވެރިން އަދިވެސް ތިބީ އެ ހައިރާންކަމުގެ ތެރޭގަ އެވެ. ޑެކޯ ފާހަގަކުރެއްވި ގޮތުގައި ބާސެލޯނާގެ ކުރިމަގު އެމީހުން ބިނާކުރަން ބޭނުންވީ ވެސް ޒަވީއާއެކު އެވެ. އަދި އެމީހުންގެ ހުރިހާ ޕްލޭނެއްގައި ވެސް ޒަވީ ހިމެނޭ ކަމުގައި އޭނާ ވިދާޅުވި އެވެ.
މީގެ އިތުރުން އޭނާ ވިދާޅުވީ ޒަވީގެ ނިންމުމަށް ފުރިހަމަ އަށް އިޙުތިރާމް ކުރާނެ ކަމަށެވެ. ޚާއްސަކޮށް ޒަވީ އަކީ ބާސެލޯނާގެ ޚިދުމަތްތެރިޔެއް ކަމަށް ވެސް އޭނާ ވިދާޅުވި އެވެ. ކުޅުންތެރިޔެއްގެ ގޮތުގައި ވެސް އަދި ކޯޗެއްގެ ގޮތުގައި ވެސް ޒަވީ ކޮށްފައި ވަނީ ވަރަށް ބޮޑު ޚިދުމަތެއް ކަމަށާއި، އަބަދު ވެސް ޒަވީ އަށް ފުރިހަމަ ކާމިޔާބަށް އެދޭ ކަމުގައި ވެސް ޑެކޯ ވިދާޅުވި އެވެ.
ބާސެލޯނާގެ ކޯޗުކަމާ 2021 ވަނަ އަހަރު ހަވާލުވި ޒަވީ ވަނީ، އޭނާގެ އިރުޝާދުގެ ދަށުން ބާސެލޯނާ އަށް ދެ ތައްޓެއް ވެސް ކާމިޔާބު ކޮށްދީފަ އެވެ.
