ކްލޮޕާ ގުޅޭ ގޮތުން ކުރި ސުވާލަށް ޑެކޯގެ ސާފު ޖަވާބެއް ނެތް!

ސްޕެއިންގެ ބާސެލޯނާގެ ކޯޗުކަމަށް ގެންނަން ބޭނުންވާ ކެންޑިޑޭޓުންގެ ލިސްޓުގައި، ޖަރުމަނުގެ ޔާގަލް ކްލޮޕްގެ ނަން އޮތްތޯ ކުރި ސުވާލަށް ސާފު ޖަވާބެއް ދިނުމަށް، ބާސެލޯނާގެ ސްޕޯޓިން ޑައިރެކްޓަރު ޑެކޯ ދެކޮޅު ހައްދަވައިފި އެވެ.

ބާސެލޯނާގެ ކޯޗުކަމުގައި މިވަގުތު ހުރި ސްޕެއިންގެ ޒަވީ ހެނާންޑޭޒް ވަނީ، މި ސީޒަނަށް ފަހު އެ ކުލަބު ދޫކޮށްލަން ނިންމާފައިވާކަން އިއުލާން ކޮށްފަ އެވެ. ބާސެލޯނާ ދޫކޮށްލަން ޒަވީ ނިންމިއިރު، އޭނާގެ އިރުޝާދުގެ ދަށުން މި ސީޒަންގައި ބާސެލޯނާގެ ނަތީޖާތައް ދަށްވެފައިވާތީ، ޒަވީ އަށް ވަނީ ޕްރެޝަރު ބޮޑުވެފަ އެވެ.

މިވަގުތު ލިވަޕޫލް އަށް އިރުޝާދު ދެމުން އަންނަ ކްލޮޕް ވަނީ، މި ސީޒަނަށްފަހު ލިވަޕޫލް ދޫކޮށްލަން ނިންމައިފަ އެވެ. އަށް އަހަރަށް ފަހު ލިވަޕޫލް ދޫކޮށްލަން ނިންމި ނަމަވެސް، އޭނާގެ ކުރިމަގުގައި ނިންމާނެ ވަކި ގޮތެއް ކްލޮޕް ހާމަކޮށްފައެއް ނުވެ އެވެ. ނަމަވެސް، ކްލޮޕް ވަނީ، އިނގިރޭސި ޕްރިމިއާ ލީގުގެ ކުލަބަކާ ހަވާލު ނުވާނެ ކަމަށް ބުނެފަ އެވެ.

ބާސެލޯނާ އިން ގެންނަން ބޭނުންވާ ކޯޗުންގެ ލިސްޓުގައި ކްލޮޕް ހިމެނޭތޯ ނޫސްވެރިޔަކު ސުވާލު ކުރުމުން ޑެކޯ ވިދާޅުވީ، ކްލޮޕް އަކީ ތަޖުރިބާކާރު މޮޅު ކޯޗެއް ކަމަށެވެ. ނަމަވެސް ޑެކޯ ވިދާޅުވި ގޮތުގައި، މިއީ އެ ވާހަކަ ދައްކަން އެންމެ އެކަށީގެންވާ ނުވަތަ ރަނގަޅު ވަގުތެއް ނޫން ކަމަށެވެ. އިތުރަށް އޭނާ ވިދާޅުވީ، ބާސެލޯނާގެ ކޯޗަކަށް ގެންނަން ބޭނުންވާ ކެންޑިޑޭޓުންގެ ލިސްޓުގައި ގިނަ ނަންތަކެއް އޮތް ކަމަށާއި، ނަމަވެސް އެކަމާ މެދު ގޮތެއް ނިންމާނީ ފަހުން ކަމަށެވެ. ޑެކޯ ވަނީ ކްލޮޕާ ގުޅޭ ގޮތުން ސާފު ޖަވާބެއް ދެއްވުމަށް ދެކޮޅު ހައްދަވައިފަ އެވެ.

ބާސެލޯނާ އިން ގެންނަން ބޭނުންވާ ކޯޗުންގެ ލިސްޓުގައި އެ ޓީމުގެ ކުރީގެ ކޯޗު، މިހާރު ޕެރިސް ސެއިންޓް ޖާމަން (ޕީއެސްޖީ) އަށް އިރުޝާދު ދެމުން އަންނަ ލުއިސް އެންރީކޭގެ އިތުރުން، ބެލްޖިއަމް ޤައުމީ ޓީމުގެ ކުރީގެ ކޯޗު އަދި މިހާރު ޕޯޗުގަލް ޤައުމީ ޓީމުގެ ކޯޗު ރޮބާާޓޯ މާޓިނޭޒް އަދި ބަޔާން މިއުނިކާއި، ޖަރުމަނު ޤައުމީ ޓީމަށް ކުރިން އިރުޝާދު ދީފައިވާ ހަންސީ ފްލިކް ހިމެނޭ ކަމަށް ސްޕެއިންގެ މީޑިއާ ތަކުން ވަނީ ރިޕޯޓުކޮށްފަ އެވެ.