ޔުނިވަރސިޓީއާއި ގެދޮރު ބިމާ ހަމަކުރިއަސް، އެ ޒުވާން ހިތުގައި ޖަހަމުންދާ ޢަޒުމުގެ ވިންދު ވަނީ ވަރުގަދަ!

ތަޢުލީމީ ޙަޔާތަށް ފަށާ، ދުނިޔެ ތެރެއަށް ހިސާބަކަށް ލޯހުޅުވިލާ ހިސާބުން ފެށިގެންވެސް ގިނަ ކުދިންނަކީ 'ބޮޑު ވެގެން' ޚިދުމަތްތެރި ޝަޚްސަށް ވުމުގެ ފޮނި ހުވަފެންތައް ދެކެމުންދާ ކުދިންނެވެ. ބައެއް ކުދިންނަކީ ފަޔަރމަނުންނާއި ސިފައިންގެ މީހުންނެވެ. ފުލުހުންނާއި ޓީޗަރުންނެވެ. ޑޮކްޓަރުންނާއި ނަރުހުންނެވެ. ޢުމުރުން 5، 6 އަހަރުގެ ކުދިން ތިބި ކުލާހަކަށް ވަދެ ސުވާލު ކޮށްލައިފިނަމަ ހައްތަހާވެސް ޒިންމާދާރު ޚިދުމަތްތެރިންނެވެ.

އެފަދަ ހުވަފެންތަކެއް، އިންތިހާ ކުޑަ ދުވަހުއްސުރެ ދެކެމުން އައި އެކަކީ މެޑިސިންގެ ރޮނގުން ކިޔަވަމުން ދާ ފަލަސްޠީނުގެ ދަރިވަރު، އަސީލް އަބޫ ހަދަފްއެވެ.

ޑޮކްޓަރަކަށް ވުމަކީ އޭނާގެ އަބަދުގެވެސް ހުވަފެނެވެ. ނަމަވެސް، މިއަދު އޭނާގެ ޙަޔާތުގެ ކޮންމެ ދުވަހެއްވެސް ގުނަމުން ދަނީ ޣައްޒާގެ ރަފަޙުގައި ތޮއްޖެހިފައި އޮތް ރެފިއުޖީ ކޭމްޕެއްގައި ޖަހާފައި ހުރި އާދައިގެ ޓެންޓެއްގެ ތެރޭގައެވެ.

ޣައްޒާގެ އުތުރުގެ ސަރަޙައްދުގައި އޮންނަ ޣައްޒާ ސިޓީގައި އަސީލް ކިޔަވަމުން ދިޔަ އަލް-އަޒްހަރު ޔުނިވަރސިޓީގެ ކެމްޕަސްވެސް މިއަދު ނެތެވެ. ނިރުބަވެރި އިޒްރޭލުންގެ ޢުދުވާންތަކުގައި ބިމާހަމަކޮށް، ސުންނާފަތި ކުރީއެވެ.

އަސީލްއާ އެއްބަނޑު އެއްބަފާ 4 ކުދިން، ޢާއިލާ ގޮވައިގެން ޚާން ޔޫނިސްގައި ހުރި އެމީހުންގެ ގެއިން ނުކުމެ، ވަގުތީ ހިޔާވަހިކަމަށް ބަދަލުވީ ޣައްޒާގައި ޤަތުލުޢާންމު ފެށުމާ އެކުގައެވެ. ދުވަހުގެ ގިނަ ވަގުތު ފިލާވަޅު ދަސްކޮށް، މުޠާލިއާ ކުރުމުގައި ހޭދަ ކުރި އަސީލްއަށް މިއަދު މަޖުބޫރު ވެފައި އޮތީ ޢާއިލާއަށް ބޭނުންވާ ފެނާއި ކާބޯތަކެތި ހޯދުމަށް އަތްފުނާއަޅާށެވެ.

އިޒްރޭލުން ޣައްޒާގައި ހިންގަމުންދާ ޤަތުލުޢާންމަށް 4 މަސް ވާން ގާތްވެފައި ވާ އިރު، 2.3 މިލިއަން މީހުންގެ އާބާދީއެއް އޮތް ޣައްޒާގެ އާބަދީގެ 1 ޕަސެންޓް މީހުން ވަނީ މި ދުނިޔެއާ ވަކިކޮށްފައެވެ. ބާކީ އޮތް އާބާދީ އެކުގައި ހެން ތިބީ ރެފިއުޖީ ޙާލުގައި، ޣައްޒާގެ ދެކުނުގައި ތޮއްޖެހިފައެވެ. ބިނާވެށި ހަފުސްކޮށްފައި އޮތް ޣައްޒާގައި ކާބޯތަކެއްޗާއި ބޯފެން ލިބުން އިންތިހާ ދައްޗެވެ. ބޭސްފަރުވާގެ ކަންފުޅެއްވެސް ނެތޭ ބުނެވިދާނެއެވެ.

ޣައްޒާ ކޮންޓްރޯލް ކުރާ ޙަމާސް ޖަމާޢަތުގެ ވަސް މި ބިންމަތިން ފޮހެލާނެ ކަމަށް ބުނެ އިޒްރޭލުން ހިންގަމުންދާ ޤަތުލުޢާންމުގައި ފަލަސްޠީނުން މަރުވި މީހުންގެ ޢަދަދު މިހާރު ވަނީ 25000 އަށް ވުރެ މައްޗަށް އަރާފައެވެ. ޙަޤީޤީ ޢަދަދުތައް އުޅޭނީ އެއަށްވުރެވެސް މާ މަތީގައި ކަމީ، ޤަބޫލު ކުރަން ޖެހޭ ހިތި ޚަބަރެކެވެ.