އަލްވަރޭޒް އުފަން ދުވަސް ފާހަގަކުރީ ދެ ލަނޑު ޖަހާ، ސިޓީ މޮޅުކޮށްދީގެން

އުފަން ދުވަހު ދެ ލަނޑު ޖަހައިގެން އަލްވަރޭޒް, މެންޗެސްޓަރ ސިޓީ މޮޅުކޮށްދީފި އެވެ.

އިނގިރޭސި ޕްރިމިއަރ ލީގުގައި ބާންލީ އަތުން 3-1 ން މެންޗެސްޓަރ މޮޅުވި މެޗުގައި ސިޓީގެ ފުރަތަމަ ދެ ލަނޑު ޖެހީ 24 ވަނަ އުފަން ދުވަސް ފާހަގަކުރި އާޖެންޓީނާގެ ހޫލިއަން އަލްވަރޭޒް އެވެ. އޭނާ ދެ ލަނޑު ވެސް ޖެހީ ފުރަތަމަ ހާފްގައެވެ. މެޗުގެ މޮޅު ކުޅުންތެރިއަކީ ވެސް އަލްވަރޭޒް އެވެ. ސިޓީގެ ތިންވަނަ ލަނޑު ދެވަނަ ހާފްގެ ފުރަތަމަ މިނެޓުގައި ޖެހީ ރޮޑްރީ އެވެ. ބާންލީގެ ހަމައެކަނި ލަނޑު މެޗުގެ އިތުރު ވަގުތުގައި ޖެހީ އަލް ޑަހިލް އެވެ.

މެޗުން މޮޅުވުމުގެ އިތުރުން ސިޓީއަށް ލިބުނު އެންމެ ބޮޑު ހިތްހަމަޖެހުމަކީ ޑިސެމްބަރު ހަވަނަ ދުވަހު އަނިޔާވި ފޯވާޑް ހާލަންޑް އެނބުރި އައުމެވެ. ހާލަންޑް ކުޅެން ނުކުތީ ކެވިން ޑި ބުރޭނާގެ ބަދަލުގައި މެޗުގެ 71 ވަނަ މިނެޓުގައެވެ. ބާންލީ އަކީ ސިޓީގެ ކުރީގެ ކެޕްޓަން ކޮމްޕެނީ އިރުޝާދުދޭ ޓީމެވެ.

މެޗުން މޮޅުވިޔަސް ސިޓީ އަދި އޮތީ ލީގު ތާވަލްގެ އެއްވަނައިގައި އޮތް ލިވަޕޫލަށްވުރެ ފަސް ޕޮއިންޓް ފަހަތުގައެވެ. އެކަމަކު މެޗުގެ އަދަދު ހަމަކުރާއިރު ފަރަގު ދެ ޕޮއިންޓަށް ކުޑަކުރުމުގެ ފުރުޞަތު ސިޓީއަށް އެބައޮތެވެ. ސިޓީ ދެވަނައިގައި އޮތީ 21 މެޗުން 46 ޕޮއިންޓާއެކު އެވެ. އެއްވަނައިގައި ލިވަޕޫލް އޮތީ 22 މެޗުން 51 ޕޮއިންޓާއެކު އެވެ.