ޖަރުމަނުގެ ބަޔާން މިއުނިކްގެ ކޯޗު، ތޯމަސް ޓުޗެލް އަށް ޕްރެޝަރު ބޮޑުވާން ފަށާފަައިވާ ކަމަށް މީޑިއާތަކުން ރިޕޯޓުކޮށްފި އެވެ.
ޖަރުމަނުގެ މީޑިއާތަކުގައި މިފަދައިން ރިޕޯޓުކޮށްފައި ވަނީ، ޖަރުމަނު ލީގުގައި ބަޔާންގެ ނަތީޖާތައް ދަށްވެފައި ވަނިކޮށެވެ. ލީގުގައި އެންމެ ފަހުން ވެސް ބަޔާން ކުޅުނު މެޗުން އެ ޓީމު ވަނީ ބަލިވެފަ އެވެ. އެއާއެކު، އެއް ވަނައިގައި އޮތް ބަޔާ ލެވަކޫސަނާ ދެމެދު އޮތް ފަރަގު ކުޑަނުކުރެވި، ލީގު ރޭހުގައި ބަޔާން ވަނީ ފަހަތަށް ސޮއްސާލައިފަ އެވެ.
ބަޔާންގެ ކޯޗުކަމާ ޓުޗެލް ހަވާލުވީ މިދިޔަ އަހަރުގެ މާޗު މަހުގެ ތެރޭގަ އެވެ. އެއީ، އޭނާގެ ކުރިން އެ މަގާމުގައި ހުރި ހޫލިއަން ނާގަލްސްމަން ވަކި ކުރުމަށްފަހު އެވެ. ބަޔާނުން ނާގަލްސްމަން ވަކިކޮށްފައި ވަނީ ވެސް، އެ ޓީމުގެ ނަތީޖާތައް ދަށްވުމުގެ ސަބަބުންނެވެ. އެއަށްފަހު، ކޯޗަކަށް ޓުޗެލް ހަމަޖައްސައި، އޭނާ އަށް ވަނީ ބޮޑު ޓާގެޓެއް ހާސިލު ކުރުމަށް ހަވާލުކޮށްފަ އެވެ. އެގޮތުން ޖަރުމަނު ލީގު ކާމިޔާބު ކުރުމާއި، ޔުއެފާ ޗެމްޕިއަންސް ލީގުގައި ރަނގަޅު ނަތީޖާއެއް ނެރުމަށް ވަނީ އެދިފަ އެވެ.
ނަމަވެސް، ޖަރުމަނު ލީގުގެ ރޭހުގައި ބަޔާން ފަހަތަށް ސޮއްސާލާފައިވާއިރު، ބަޔާންގެ އިސްވެރިންގެ ޕްރެޝަރު ޓުޗެލް އަށް ކުރިމަތިވާން ފަށާފައިވާ ކަމަށް މީޑިއާތަކުން ރިޕޯޓުކޮށްފައިވެ އެވެ. މީޑިއާތަކުގައި ބުނެފައިވާ ގޮތުން، ބަޔާންގެ އިސްވެރިން ޓުޗެލް އަށް ދެން ހަވާލު ކުރާނީ ކުރު މުއްދަތެއްގެ ތެރޭގައި ހާސިލު ކުރަން ބޭނުންވާ ކަންކަމެވެ. އެކަންކަން ހާސިލު ނުވެއްޖެނަމަ، ބަޔާންގެ ކޯޗުކަމުން އޭނާ ވަކި ކުރުމުގެ ވިސްނުން ކުލަބުގެ ވެރިން ގެންގުޅޭ ކަމަށް ވެސް ބުނެފައިވެ އެވެ. އެކަމާ ގުޅޭ ގޮތުން ބަޔާންގެ އިސްވެރިން އެކި ފަހަރު މަތިން ޓުޗެލްއާ ވާހަކަދައްކަމުން އަންނަ ކަމަށާއި، ޓުޗެލް ހުރީ ކަންކަން ބަދަލު ކުރުމަށް ބޭނުންވެފައި ކަމަށް މީޑިއާތަކުން ބުނެ އެވެ.
ޓުޗެލް ހަވާލުވީ ފަހުން މިހާތަނަށް ބަޔާން ކުޅެފައި ވަނީ 38 މެޗެވެ. އޭގެ ތެރެއިން އެ ޓީމު ވަނީ 25 މެޗުން މޮޅުވެފަ އެވެ. އަށް މެޗުން ބަލިވެފައިވާއިރު، ފަސް މެޗުން ވަނީ އެއްވަރުވެފަ އެވެ. މި ސީޒަންގެ ޖަރުމަނު ލީގުގައި ބަޔާން ވަނީ މިހާތަނަށް 17 މެޗު ކުޅެފަ އެވެ. އޭގެ ތެރެއިން 13 މެޗުން މޮޅުވެފައިވާއިރު، ދެ މެޗުން ވަނީ ބަލިވެފަ އެވެ. އަނެއް ދެ މެޗު ވަނީ އެއްވަރުވެފަ އެވެ. މިހާތަނަށް ލިބުނު 41 ޕޮއިންޓާއެކު ބަޔާން ދެ ވަނައިގައި އޮތްއިރު، އެއް ވަނައިގައި ލެވަކޫސަނަށް ލިބެނީ 48 ޕޮއިންޓެވެ.
