މި ސީޒަނުގައި މާޒިޔާ ވަރަށް ތަފާތު، ޕްރެޝަރު އޮތީ އެ ޓީމަށް: ނިއުގެ ކޯޗު

މި ސީޒަނުގައި މާޒިޔާ ފެންނަނީ ވަރަށް ތަފާތުކޮށް ކަމަށާއި އެހެން ނަމަވެސް މާދަމާގެ މެޗުގެ ޕްރެޝަރު އޮތީ އެ ޓީމަށް ކަމަށް ނިއު ރޭޑިއަންޓް ސްޕޯޓްސް ކްލަބްގެ ކޯޗު އޮސްކާ ބްރޫޒޯން ބުނެފިއެވެ.

އެފްއޭއެމް ހައުސްގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަމުން ނިއުގެ ކޯޗު ބުނީ މާޒިޔާއިން ޕްރީ ސީޒަންގައި ކުޅުނު ބައެއް މެޗުތަކާއި އެ ޓީމު ލީގުގައި ކުޅުނު ފުރަތަމަ މެޗު ބެލި ކަމަށާއި އެ މެޗުތަކުން މިދިޔަ ސީޒަނާއި މި ސީޒަނުގައި އެ ޓީމުގެ ފަރާތުން ބޮޑު ތަފާތެއް ފެންނަމުންދާ ކަމަށެވެ. އޭނާ ބުނީ އެ ޓީމުގެ އެންމެ ކުރިޔަށް ކުޅެމުން އަންނަ ދެ ކުޅުންތެރިންނަކީ ކޮލިޓީ ދެ ކުޅުންތެރިން ކަމަށާއި މަސައްކަތްކުރާނީ މާޒިޔާއަށް ނުރައްކާ ކުރުމަށް ފުރުސަތު ނުދޭން ކަމަށެވެ.

އޭނާ ބުނީ މިދިޔަ ސީޒަނުގެ މާލޭ ލީގުގެ ޗެމްޕިއަނުންގެ ހައިސިއްޔަތުން މި މެޗާއި ކުރިމަތިލާއިރު ޕްރެޝަރު އޮތީ މާޒިޔާއަށް ކަމަށާއި އެހެން ނަމަވެސް މިއަހަރު ނިއުގެ އަމާޒަކީ މި މުބާރާތް ވެސް ކާމިޔާބުކުރުން ކަމަށެވެ. އޭނާ ބުނީ ކުރިޔަށް ދާނީ ކޮންމެ މެޗަކަށް ވަކިވަކިން ވިސްނައިގެން ކަމަށާއި އެގޮތުން މި މެޗާއި ވެސް ކުރިމަތިލާނީ މާޒިޔާގެ ކުޅުމަށް ވިސްނައިގެން ކަމަށެވެ.

މިދިޔަ ސީޒަނުގައި ރާއްޖޭގެ އެންމެ ކާމިޔާބު ޓީމުގެ ގޮތުގައި ނިންމާލި ނިއުއިން ވަނީ މި ސީޒަނުގައި ވެސް އެ ޓީމު ކުޅުނު ފުރަތަމަ މެޗުގައި 3-0 އިން ޓީސީ ސްޕޯޓްސް ކްލަބް ބަލިކޮށްފައެވެ. ނިއު އަދި މާޒިޔާ ބައްދަލުކުރާ ފޯރިގަދަ މެޗު ކުޅުމަށް ހަމަޖެހިފައިވަނީ މާދަމާ 21:00 ގައެވެ.