ޕްރެޝަރު އޮތީ އޮމާން އަށް، ގަތަރު ކޭމްޕުން މެޗަށް ފައިދާވާނެ: ގައުމީ ކޯޗު

އޭޝިއަން ކަޕް ކޮލިފައިންގެ ގްރޫޕް ސްޓޭޖުގައި ރާއްޖެ އަދި އޮމާން ބައްދަލު ކުރާ މެޗުގައި ޕްރެޝަރު އޮތީ އޮމާން އަށް ކަމަށް ގައުމީ ޓީމުގެ ކޯޗު ޑެރެން ސްޓެވާޓް ބުނެފި އެވެ.

ގަތަރަށް ފުރުމުގެ ކުރިން ނޫސްވެރިންނަށް މައުލޫމާތު ދެމުން ކޯޗު ބުނީ މުބާރާތައް ކޮލިފައިވާން އޮމާން ބޭނުންވާނެ ކަމަށެވެ. އެގޮތުން ކޮލިފައިންގައި ރާއްޖެ ފަދަ ޓީމެއް އަތުން ބަލިވާން އޮމާން ބޭނުންނުވާނެ ކަމަށާއި، އެޓީމު ކުޅޭނީ ޕްރެޝަރުގައި ކަމަށް ވެސް އޭނާ ބުންޏެވެ.

ކޯޗު ބުނީ ގަތަރުގައި ހަދާ ތަމްރީންތަކުން ފައިދާތަކެއް ލިބިގެންދާނެ ކަމަށާއި، ރަނގަޅު ދުވަސްތަކެއް ގަތަރުގައި ހޭދަކުރެވޭނެ ކަމަށް އުންމީދުކުރެވޭ ކަމަށެވެ. އެގޮތުން ކޮލިފައިން މެޗުގެ ކުރިން ފަލަސްތީން އަދި އޮމާން ބައްދަލު ކުރި މެޗު ބެލިކަން ފާހަގަ ކުރަމުން ކޯޗު ބުނީ އެ މެޗުން ކަންތައްތަކެއް ދަސްކުރެވިފައިވާ ކަމަށެވެ. އޭނާ ބުނީ އޮމާން މެޗުގައި ކުޅުންތެރިން ވިސްނައިގެން ކުޅެފިނަމަ ތަފާތު ފެންނާނެ ކަމަށް ގަބޫލު ކުރެވޭ ކަމަށެވެ.

ޖުމްލަ 23 ކުޅުންތެރިންނާއެކު ގައުމީ ޓީމުގެ ސްކޮޑު އެކުލަވާލާފައިވާއިރު، ސްކޮޑްގައި ނިއުރޭޑިއަންޓްގެ ނުވަ ކުޅުންތެރިޔަކު ހިމެނެއެވެ. މީގެ އިތުރުން ސްކޮޑްގައި މާޒިޔާގެ ހަ ކުޅުންތެރިއަކު ހިމެނޭއިރު، ޓީސީގެ ތިން ކުޅުންތެރިންނާއި، ގްރީން ސްޓްރީޓްގެ ދެ ކުޅުންތެރިންނާއި، ތިނަދޫގެ ދެ ކުޅުންތެރިންގެ އިތުރުން މިލަންދޫގެ ކުޅުންތެރިއަކު ވެސް ހިމެނެއެވެ.

ގައުމީ ޓީމު ގަތަރުގައި ކޭމްޕް ކުރުމަށް ފަހު އެނބުރި މާލެ ނައިސް ސީދާ ޓީމު ފުރާނީ މެޗު ކުޅުމަށް އޮމާން އަށެވެ. ރާއްޖެ އަދި އޮމާން ބައްދަލު ކުރާ މެޗު އޮންނާނީ އަންނަ މަހުގެ ފަސް ވަނަ ދުވަހެވެ. ރާއްޖެ ވަނީ އޭޝިއަން ކަޕް ކޮލިފައިންގައި ކުޅުނު ފުރަތަމަ މެޗުން ފަލަސްތީން އަތުން ބަލިވެފައެވެ. އެހެން ނަމަވެސް ރާއްޖެ ވަނީ ދެވަނަ މެޗުން ބޫޓާނާ ވާދަކޮށް މޮޅުވެފައެވެ.