ލެވަންޑޯސްކީ ބަޔާންގައި މަޑުކުރާނެ!

ޖަރުމަނުގެ ބަޔާން މިއުނިކަށް ކުޅެމުން އަންނަ ޕޮލެންޑްގެ ބައިނަލްއަގްވާމީ ފޯވާޑް ރޮބާޓް ލެވަންޑޯސްކީ އެ ޓީމުގައި މަޑުކުރާނެ ކަމަށް އެ ޓީމުން ބުނެފިއެވެ.

ބަޔާންގެ ވާދަވެރި ބޮރޫޝިއާ ޑޯޓްމަންޑް ދޫކޮށް 2014 ވަނަ އަހަރު ބަޔާންއަށް ބަދަލުވުމަށް ފަހު ލެވަންޑޯސްކީ އަންނަނީ އެ ޓީމުގައި މޮޅު ކުޅުމެއް ދައްކަމުންނެވެ. އެގޮތުން ބަޔާންއަށް ކުޅުނު 184 މެޗުގައި 142 ލަނޑު އޭނާ ޖަހާފައިވާއިރު އޭނާއަކީ ދުނިޔޭގެ އެންމެ މޮޅު ފޯވާޑުންގެ ތެރޭގައި ގުނާލެވޭ ކުޅުންތެރިޔެކެވެ. މި ސީޒަނުގައި ވެސް އުމުރުން 29 އަހަރުގެ ފޯވާޑްގެ ފަރާތުން ފެންނަމުންދާ މޮޅު ކުޅުމާއެކު އޭނާ ހޯދުމަށް ސްޕެއިންގެ ރެއާލް މެޑްރިޑްއިން މަސައްކަތް ކުރަމުންދާ ކަމަށް ރިޕޯޓުތައް ބުނެއެވެ.

ބަޔާންގެ ޗެއާމަން ކާލް ހެއިންޒް ރުމެނިގާ ނޫސްވެރިންނާއި ވާހަކަ ދައްކަމުން ބުނެފައިވަނީ އަންނަ ސީޒަނުގައި ވެސް ބަޔާންގެ ޖާޒީއިން ލެވަންޑޯސްކީ ފެންނާނެ ކަމުގެ ފުރިހަމަ ޔަގީންކަން އެބައޮތް ކަމަށާއި އިތުރު ގޮތެއް ހޯދަންވީ އެއްވެސް ސަބަބެއް އޭނާއަށް ނުފެންނަ ކަމަށެވެ.

ރުމެނިގާ ވަނީ 2008 ވަނަ އަހަރު ޗެލްސީއިން އެ ޓީމަށް ކުޅެމުން އަންނަ ފްރޭންކް ރިބެރީ ހޯދުމަށް ހުށަހެޅި ހުށަހެޅުން އަނބުރާ ފޮނުވާލި ގޮތުގެ ވާހަކަ ތަކުރާރުކޮށްފައެވެ. ރިބެރީ ހޯދުމަށް ޗެލްސީއިން 2008 ވަނަ އަހަރު 80 މިލިއަން ޔޫރޯގެ އިތުރުން އެ ޓީމަށް އޭރު ކުޅުނު ޕޯޗުގަލްގެ ޑިފެންޑަރު ހޯސޭ ބޮސިންގްވާ ވެސް ހުށަހެޅިއެވެ. އެހެން ނަމަވެސް ބަޔާންއިން އެ ހުށަހެޅުން އަނބުރާ ފޮނުވާލީ ރިބެރީ ނުވިއްކާނެކަން ކަށަވަރު ކޮށްދިނުމަށްފަހުއެވެ.

އެކަމާއި ގުޅިގެން ވާހަކަ ދައްކަމުން ރުމެނިގާ ބުނީ 2008 ވަނަ އަހަރު ރިބެރީ ހޯދުމަށް ޗެލްސީއިން ބޮޑު ހުށަހެޅުމެއް ހުށަހެޅި ކަމަށާއި އެހެން ނަމަވެސް އެދުވަހު ވެސް އެ ހުށަހެޅުމަށް ފުރަގަސްދީ އަނބުރާ ފޮނުވާލި ކަމަށެވެ. އަދި އެ ދުވަހުން ފެށިގެން ވެސް ފުޓްބޯޅައިގެ ދުނިޔެއަށް ބަޔާންގެ ކުޅުންތެރިޔަކު ހޯދުމަކީ އުނދަގޫ ކަމެއްކަން އެނގިގެން ދިޔަ ކަމަށެވެ. ބަޔާންއިން ކުޅުންތެރިން ވިއްކާނީ އެ ކްލަބްއިން ބޭނުންވެގެން ކަން ހުރިހާ ޓީމަކުން ވެސް ދަންނަން ޖެހޭ ކަމަށާއި ލެވަންޑޯސްކީއަކީ އެއްވެސް ހާލެއްގައި ވިއްކާނެ ކުޅުންތެރިޔެއް ނޫންކަން ސާފުކޮށްދޭން ބޭނުންވާ ކަމަށް ރުމެނިގާ ބުނެފައިވެއެވެ.

ބޯޑޯއަށް އަށް ކުޅެމުން އަންނަ ބްރެޒިލްގެ ޒުވާން ފޯވާޑް މެލްކޮމް ބަޔާންއަށް ގެންނަން އުޅޭ ކަމުގެ ވާހަކަތައް ރުމެނިގާ ވަނީ ދޮގުކޮށްފައެވެ. މެލްކޮމް ވަނީ ބަޔާންއަށް ކޮންމެވެސް ދުވަހަކުން ކުޅުމަކީ އޭނާގެ ހުވަފެނެއް ކަމަށް ބުނެފައިވެއެވެ. ހަމައެހެންމެ ބައެއް މީޑިއާތަކުން ވަނީ ލެވަންޑޯސްކީ އެ ޓީމު ދޫކޮށްލައިފިނަމަ މެލްކޮމް އެ ޓީމަށް ގެންނަން އުޅޭ ކަމަށް ވެސް ރިޕޯޓު ކޮށްފައެވެ. ރުމެނިގާގެ އިތުރުން ބަޔާންގެ ކޯޗުގެ މަގާމުގައި މިވަގުތު ހުރި ޖުޕް ހެއިންކޭސް ވެސް ވަނީ އެއީ ދޮގު ހަބަރުތަކެއް ކަމަށް ބުނެފައެވެ.

ބަޔާން މިއުނިކްގެ ފޯވާޑް ލައިނުގައި އެންމެ މުހިންމު ދައުރު އަދާކުރަމުން އަންނަ ލެވަންޑޯސްކީ ވަނީ އެ ޓީމާއެކު ތިން ފަހަރެއްގެ މަތިން ބުންޑެސްލީގާ ކާމިޔާބު ކޮށްފައެވެ. ހަމައެހެންމެ އޭނާ ވަނީ އެ ޓީމާއެކު ޖަރުމަނު ކަޕް އަދި ޖަރުމަނު ސުޕާ ކަޕް ވެސް ކާމިޔާބު ކޮށްފައެވެ. އޭނާއަކީ ބަޔާންއަށް އެންމެ ގިނަ ލަނޑު ޖަހައިދިން ޖަރުމަނަށް ނިސްބަތްނުވާ ކުޅުންތެރިޔާ ވެސްމެއެވެ.