އިދިކޮޅު ސިޔާސީ ޕާޓީތަކުގެ ޕާލިމެންޓްރީ މެމްބަރުންގެ ބައްދަލުވުމެއް ބާއްވައިފި
31 ޖުލައި 2017 | ހޯމަ 08:21މަޖިލީހުގެ ޖަލްސާ ވަނީ ނިންމާލާފައި
އިދިކޮޅު ސިޔާސީ ޕާޓީތަކުގެ ޕާލިމެންޓްރީ މެމްބަރުންގެ ބައްދަލުވުން
ރައްޔިތުންގެ މަޖިލީހުގެ އިދިކޮޅު ސިޔާސީ ޕާޓީތަކުގެ ޕާލިމެންޓްރީ މެމްބަރުންގެ ބައްދަލުވުމެއް ބާއްވައިފި އެވެ.
މިބައްދަލުވުމުގެ ރިޔާސަތު ބެލެހެއްޓެވީ ރައްޔިތުންގެ މަޖިލީހުގެ ހިންވަރު ދާއިރާގެ މެމްބަރު އަދި އެމްޑީޕީ ޕާލިމެންޓްރީ ގުރޫޕުގެ ލީޑަރު އިބްރާހިމް މުހައްމަދު ސޯލިޙްއެވެ.
ރައްޔިތުންގެ މަޖިލީހުގެ އެމްޑީޕީ، އަދާލަތު ޕާޓީ، ޖުމްހޫރީ ޕާޓި އަދި ރައީސް މައުމޫނު ފެކްޝަނަށް ތާއީދުކުރައްވާ މެމްބަރުން ބައިވެރިވެވަޑައިގެންނެވި މިބައްދަލުވުމުގައި މަޖިލިސް މެމްބަރުން ދެން އަމަލުކުރައްވާނެ ގޮތާއި މިއަދު ހުށަހަޅަން އޮތް ކުއްލި މައްސަލަ އާއި މަޖިލީހުގެ އިމްތިޔާޒަށް އަރައިގަތް މައްސަލަ މަޖިލީހުން ބޭރުކޮށްފައިވާ ކަމަށް އިބޫ ވިދާޅުވިއެވެ.
އިތުބާރު ނެތް ކަމަށް ރައްޔިތުންގެ މަޖިލީހުގެ 45 މެމްބަރުން ސޮއިކުރައްވާ މަޖިލީހަށް ހުށަހަޅާފައިވާ އަބްދުﷲ މަސީހު އެގޮނޑީގައި އިންނަވައިގެން މަޖިލީހުގެ ޖަލްސާ ކުރިއަށް ގެންދަން ބޭނުން ނުވާ ކަމަށާއި އިދިކޮޅު ފަރާތްތަކުން އަމަލު ކުރާނީ ހަމަ އެގޮތަށް ކަމަށް އިބޫ ވިދާޅުވިއެވެ.
މަޖިލީހުގެ މިއަދުގެ ޖަލްސާ ކުރިއަށް ގެންދިއުން ހުއްޓުވައި، ރިޔާސަތުގެ ގޮނޑި މަޖިލީހުގެ މާލަމުން ވަނީ ބޭރުވެސްކޮށްފަ އެވެ. ރިޔާސަތުގެ ގޮނޑި މަޖިލީހުގެ ގޯތިތެރޭގައި ބެހެއްޓި ނަމަވެސް، ރިޔާސަތުގެ ގޮނޑި ސެކިއުރިޓީން މަޖިލީހުގެ މާލަމަށް ފަހުން ވެއްދި އެވެ. ރިޔާސަތުގެ މޭޒުކައިރީގައި ގުޅިފައިވާ ޕާޓީތަކުގެ މެމްބަރުން އަތުރާލާފައިވާއިރު ސެކިއުރިޓީ އޮފިސަރުންގެ ގިނަ އަދަދެއްގެ އޮފިސަރުން ވެސް މާލަމުގައި ހަރަކާތްތެރިވެފައިވެއެވެ.
އޭގެ ފަހުން މަޖިލީހުގެ ރައީސް އަބްދުﷲ މަސީހް ޗެމްބަރަށް ވަޑައިގެންނެވުމާއި އެކު އިދިކޮޅު ފަރާތްތަކުންވަނީ އޭނާގެ އިސްތިއުފާއަށް ގޮވާފައެވެ. އަދި ރިޔާސަތުގައި އިންނަވައި މަޖިލީހުގެ މިއަދުގެ ޖަލްސާ ކުރިއަށް ނުގެންދަން މަސީހް ވަނީ ނިންމަވާފައެވެ.
