ސައުދީ ޕްރޯ ލީގުގެ އަލް ޝަބާބާ ހަވާލުވާން އުޅޭ ކަމަށް ދެކެވޭ ވާހަކަތައް، ޕޯޗުގަލްގެ ހޯސޭ މޮރީނިއޯ ދޮގު ކޮށްފި އެވެ.

އުމުރުން 60 އަހަރުގެ ތަޖުރިބާކާރު ކޯޗު މިހާރު ހުރީ، އެއްވެސް ވަޒީފާއެއްގައެއް ނޫނެވެ. އޭނާ އެންމެ ފަހުން ހުރީ އިޓާލިއަން ލީގުގެ ރޯމާގެ ކޯޗުކަމުގަ އެވެ. އެ ޓީމުގެ ކޯޗުކަމާ މޮރީނިއޯ ހަވާލުވީ 2021 ވަނަ އަހަރުގެ ޖުލައި މަހުގެ ތެރޭގަ އެވެ. ނަމަވެސް، ދާދި ފަހުން ރޯމާ އިން ވަނީ އެ ޓީމުގެ ކޯޗުކަމުން މޮރީނިއޯ ވަކިކޮށްފަ އެވެ. އެއީ، އޭނާގެ އިރުޝާދުގެ ދަށުން މި ސީޒަންގައި އެ ކުލަބުގެ ނަތީޖާތައް ދަށްވުމުންނެވެ.

ރޯމާގެ ކޯޗުކަމުން މޮރީނިއޯ ވަކި ކުރުމާއެކު، ސައުދީ ލީގަށް އޭނާ ބަދަލުވާން އުޅޭ ކަމުގެ އަޑުތަކެއް ވެސް ފެތުރުނެވެ. އެގޮތުން، ސައުދީ ލީގުގެ އަލް ޝަބާބުގެ ކޯޗުކަމާ ހަވާލުވާން އޭނާ އަށް ހުށަހެޅުމެއް ލިބުނު ކަމަށާއި، އެ ހުށަހެޅުން އޭނާ ޤަބޫލު ކުރާނެ ކަމަށް އޮތީ މީޑިއާ ރިޕޯޓުތައް ބުނެފަ އެވެ. ނަމަވެސް، މޮރީނިއޯ ވަނީ އެކަން ދޮގު ކޮށްފަ އެވެ. އޭނާ ބުނީ، އަލް ޝަބާބުގެ ކޯޗުކަމާ ހަވާލު ނުވާނެ ކަމަށާއި، ސައުދީ ލީގަށް ދިޔުމުގެ ޝައުޤުވެރިކަމެއް އޭނާގެ ނެތް ކަމަށެވެ. މީގެ ކުރިން ވެސް މޮރީނިއޯ ބުނެފައިވާ ގޮތުން، ސައުދީ ލީގުގެ ހުށަހެޅުން އޭނާ އަށް ލިބުނެވެ. ނަމަވެސް، އެ ފަހަރު ވެސް އޭނާ ނިންމީ އެ ހުށަހެޅުން ޤަބޫލު ނުކުރުމަށެވެ.

ބެންފީކާ އިން 2000 ވަނަ އަހަރު ކޯޗިން ކެރިއަރު ފެށި މޮރީނިއޯ ވަނީ ޔޫރަޕުގެ ބޮޑެތި ކުލަބުތަަކަށް އިރުޝާދު ދީފަ އެވެ. އޭގެ ތެރޭގައި އިނގިރޭސި ޕްރިމިއާ ލީގުގެ ޗެލްސީ، މެންޗެސްޓަރ ޔުނައިޓެޑު، ޓޮޓެންހަމް، ސްޕެއިންގެ ރެއާލް މެޑްރިޑު، އިޓާލިއަން ލީގުގެ އިންޓަ މިލާން އަދި ރޯމާ ފަދަ ކުލަބުތައް ހިމެނެ އެވެ. އެ ކުލަބުތަކާއެކު އޭނާ ވަނީ ގިނަ ކާމިޔާބީތަކެއް ވެސް ހޯދައިފަ އެވެ. މޮރީނިއޯ އަކީ ދުނިޔޭގައި ތިބި އެންމެ މޮޅެތި ކޯޗުންގެ ތެރޭގައި ހިމެނޭނެ ކޯޗެކެވެ.