މި ނޫން ޙާލަތެއް ހަމަ ނެތެވެ. ހުސް ދޮގެވެ. މަކަރާ އޮޅުވާލުމެވެ. ރައްޔިތުން ގުނބޯ ހެއްދުމެވެ. މި އޮތީ އަނެއްކާ ވެސް އޭގެ ކަމެކެވެ.

މިދިޔަ މަހުގެ ފަސްވަނަ ދުވަހު ބޭއްވި ކެބިނެޓު ބައްދަލުވުމުގައި ނިންމުނު ކަންކަމާ ގުޅޭ މައުލޫމާތު ނޫސްވެރިންނަށް ދިނުމަށް، ނޫސްވެރިންގެ ބައްދަލުވުމެއް ރައީސް އޮފީހުގައި ބޭއްވުނެވެ. އޭގެ ފަހުން ބޭއްވެވި ބައްދަލުވުންތަކާ ޚިލާފަށް، އެ ނޫސްވެރިންގެ ބައްދަލުވުމުގައި އެދުވަހުގެ ނިންމުންތަކުގެ މައުލޫމާތު ދެއްވީ ޚުދު ރައީސް ޑރ. މުހައްމަދު މުއިއްޒު އެވެ.

އެ ދުވަހު ރައީސް މުއިއްޒު އެކި ކަންކަމުގެ މައްޗަށް އަލިއަޅުއްވައި ވާހަކަ ދައްކަވަމުން ގޮސް، ގާތްގަޑަކަށް އެންމެ ފަހު ކަމެއްގެ ގޮތުގައި ޢިއުލާނުކުރެއްވީ، ވިނަރެސް ފްލެޓްތަކާ ގުޅޭ ކަމެކެވެ. ވިދާޅުވީ ވިނަރެސް ފްލެޓްތަކުގެ ކުއްޔާއި ޑައުންޕޭމަންޓްގެ އަދަދު ކުޑަކުރުމަކީ އެމަނިކުފާނުގެ ވައުދުފުޅެއް ކަމަށެވެ. އެހާ ހިސާބުން އެކަން ނިންމެވި ގޮތް ރައީސް ވިދާޅުވެދެއްވިއެވެ.

ރައީސް އެދުވަހު ފާހަގަކުރެއްވި އެ ނިންމެވުމާއެކީ، ވިނަރެސް ފްލެޓްތައް ގަތް އެތައް ބަޔަކަށް ހިތްހަމަ ޖެހުން ލިބުނެވެ. އެވާހަކަތައް މީސްމީޑިޔާގައި ބަންޑުކޮންލީ އެ ހިސާބުންނެވެ.

މުޅި މައްސަލައަށް ފީނާލުމުގެ ކުރިން، ވިނަރެސް ފްލެޓްތަކުގެ ތަފްސީލަށް ބަލާލަމާ ހިނގާށެވެ. ކުރީގެ ރައީސް އަބްދުﷲ ޔާމީންގެ ސަރުކާރުގައި އަޅަން ފެށި މި ފްލެޓްތަކުގެ މަސައްކަތް ނިންމާލެވުނީ 20 ޖޫން 2022 ގައި އެވެ. މުޅި މަޝްރޫއުއަކީ، 13 ބުރީގެ 10 ޓަވަރެވެ. އެއީ 1،344 އެޕާޓްމެންޓެވެ. ޖުމްލަ އެޕާޓްމެންޓެއްގެ އަގު އުޅެނީ 2.5 މިލިއަނާއި 3.5 މިލިއަން ރުފިޔާގެ ދެމެދުގެ އަގެއްގައި އެވެ.

އެހާ ބޮޑު އަގެއް އެއްފަހަރާ ދެއްކުމުގެ ގާބިލުކަން އެންމެންގެ ކިބައިގައި ނުހުންނާނެތީވެ، އެތަންތަން ދިގު މުއްދަތަށް ބަހާލައިގެން ކުލި ދެއްކުމުގެ ފުރުސަތު އާބަންކޯ އިން ދިނެވެ. އެގޮތުން ހުޅުވާލި ދެ ގޮތަކީ، ފްލެޓުގެ އަގުގެ 15 ޕަސެންޓް ޑައުންޕޭމެންޓުގެ ގޮތުގައި ދައްކައިގެން 20 އަހަރުގެ ތެރޭގައި ތަނުގެ އަގު އަދާކުރުން ނުވަތަ،  20 ޕަސެންޓް ދައްކައިގެން އެޕާޓްމެންޓުގެ ކުލި 25 އަހަރަށް ބަހާލައިގެން އަގު އަދާކުރުމެވެ.

އެހެން ނަމަވެސް، އޭރު ދިގު މުއްދަތަކަށް ބަހާލައިގެން ފައިސާ ދައްކާ ފަރާތްތަކުގެ އަތުން ނަގާ އިންޓަރެސްޓު ރޭޓު ނުވަ ޕަސެންޓުގައި ހުރުމުން، އެ އަދަދު ހަ ޕަސެންޓަށް ވެސް މިދިޔަ ސަރުކާރުން ކުޑަކުރިއެވެ. އެއާއެކު، އާންމުކޮށް 25 އަހަރަށް ބަހާލައިގެން ފައިސާ ދައްކާ ފަރާތްތަކުގެ އަތުން 1.2 މިލިއަން ރުފިޔާ ވަރު ކުޑަވިއެވެ.

އޭރު، އެ ފްލެޓްތަކުގެ އަގު ބޮޑުވެގެން، ކުލި ކުޑަކުރުމަށް ގޮވާލައި، އެ ފްލެޓްތަކުގެ އަސްލު އަގު އެނގިވަޑައިގަންނަވާ ކަމަށް ވިދާޅުވެ ވެރިކަމަށް ވަޑައިގެންނެވީ ރައީސް މުއިއްޒުއެވެ. ކޮންމެ ފަދަ ބޭނުމެއްގައި ނަމަވެސް ނުވަތަ ނަމެއްގައި ނަމަވެސް، އެމަނިކުފާނު ކުލި ކުޑަކުރައްވައިފި ކަމަށް ވިދާޅުވިއެވެ.

އެހެން ނަމަވެސް ދަންނަވަންތޯއެވެ. އެ ދުވަހު ރައީސް މުއިއްޒު ދެއްވި، ފޮނި ހުވަފެން ނުވަތަ އެ ފޮނި އުންމީދު މިއަދު ވެސް އެ އޮތީ އުންމީދެއްގެ ގޮތުގައި އެވެ. ޙަގީގަތަކަށް ބަދަލެއް ނާދެއެވެ. ހަމައެކަނި ބަދަލު އައި ކަމަކީ، ރައީސް އެ ދުވަހު ނިންމެވި ޑައުން ޕޭމަންޓަށް އައި ބަދަލެވެ. ކުލި އެ އޮތީ އޮތްތަނުގައި އެވެ.

މި ފަހަރު، ރައީސް މުއިއްޒު އާންމުންނަށް އޮޅުވާލެއްވީ ކުލި ކުޑަކުރައްވާނެ ކަމަށް ވިދާޅުވެއެވެ. އާބަންކޯ އިން އެ ފަރާތްތަކާ އެކު އެއްބަސްވުންތައް ހަދަމުންދާ ފަރާތްތަކުން ބުނާ ގޮތުން، އެ އެއްބަސްވުންތަކުގައި ކުލި ކުޑަކުރި ކަމަށް ބުނެފައެއް ނެތެވެ. އަދި ކުޑަ ކުއްޔެއްގެ ވާހަކައެއް ވެސް ނެތެވެ. އެ ސުވާލުކުރުމުން އާބަންކޯ އިން ދޭ ޖަވާބަކީ ރައީސް އޮފީހުން ރަސްމީކޮށް، ކުލި ކުޑަކުރުމާ ގުޅޭ ވާހަކައެއް އެ ކުންފުންޏަށް އަންގާފައި ނެތް ކަމަށެވެ.

އެކަމުގައި ރައީސް އޮފީހުން ދިން ޖަވާބަކީ، ރައީސް އެ ދުވަހު ވިދާޅުވި ނިންމެވުން ބަދަލެއް ނުވާ ވާހަކައެވެ. އެހެން ނަމަވެސް އެކަން އެހެން ނުހިނގާ ސަބަބެއް ރައީސް އޮފީހަކަށް ބުނެނުދެވެއެވެ.

ކޮންމެއަކަސް، ރައްޔިތުން މިއަދު ތިބީ ވަރަށް ބޮޑަށް ހިތްހަމަނުޖެހިފައެވެ. މި ސަރުކާރަށް އިތުބާރެއް ނުކުރެއެވެ. މިހާރުގެ އިދިކޮޅުގައި އޮތް އެމްޑީޕީން ބުނަމުންދާ ގޮތަށް، ރައްޔިތުންނަށް އޮޅުވާލުމެއްގެ ތެރޭގައި ވެރިކަމަށް އައި ބަޔަކު، އަދި ވެސް މި އުޅެނީ އެގޮތުގައި އެވެ. މިއީ ހަމަ މިއަދުގެ ޙާލަތަކީތާއެވެ.