މާލެ ސިޓީގެ ބޭކަރީއެއްގެ ޝެފަކު ތައްޔާރުކުރި ކާއެއްޗަކަށް ފާޑުކިއުމުން، ފާޑުކީ މީހާއަށް ޙަމަލާދިން މައްސަލައެއްގައި އެ ޝެފް 7 އަހަރަށް ޖަލަށްލުމަށް ކްރިމިނަލް ކޯޓުން ޙުކުމްކޮށްފިއެވެ.

މި މައްސަލައިގައި ދައުލަތުން ދައުވާކޮށްފައިވަނީ ބަންގްލަދޭޝް ރައްޔިތެއްކަމަށްވާ މޮހައްމަދުލް ޙަސަންގެ މައްޗަށެވެ. އޭނާގެ މައްޗަށް ދައުލަތުން ކުރަނީ ނުރައްކާތެރި ހާނިއްކައެއްވާގޮތަށް ތޫނު އެއްޗެއް ނުވަތަ ހަތިޔާރެއް ބޭނުންކޮށްގެން މާރާމާރީ ހިންގުމުގެ ކުށުގެ ދައުވާއެވެ.

އޭނާގެ މައްޗަށް މި ދައުވާކޮށްފައިވަނީ 6 ޑިސެމްބަރު 2020 ވަނަ ދުވަހު އިތުރު ބިދޭސީއަކާ މާރާމާރީ ހިންގައި އޭނާގެ އަތުގައި އޮތް ވަޅިއަކުން އެމީހާއަށް ޙަމަލާދިން މައްސަލައެއްގައެވެ.

މި މައްސަލައިގެ ދައުވާލިބޭ ފަރާތަކީ މާލޭގެ ބޭކަރީއެއްގައި ޝެފް އިންޗާޖެއްގެ ގޮތުގައި މަސައްކަތް ކުރި ފަރާތެކެވެ. އޭނާ މާރާމާރީ ހިންގާފައިވަނީ އެ ބޭކަރީގެ ޕްރޮޑަކްޝަން މެނޭޖަރުގެ މަޤާމުގައި ހުރި ބިދޭސިއަކާއެވެ.  

އޭނާ ދައުވާއަށް އިންކާރުކޮށްފައިވާތީ ދައުލަތުން ވަނީ އޭނާއާ ދެކޮޅަށް ޝަފަހީ އަދި ކިތާބީ ހެކި ހުށަހަޅާފައެވެ. އޭނާގެ ފަރާތުން ބުނެފައިވަނީ ދިފާއުގައި ހުށަަހަޅާނެ ހެއްކެއް ނެތްކަމަށެވެ.

މި މައްސަލައިގައި އަނިޔާވި ފަރާތް ޝަރީއަތުގެ މަޖިލީހުގައި ދިން ހެކިބަހަށް ބަލާއިރު، ޙާދިސާ ހިނގަން މެދުވެރިވީ ދައުވާލިބޭ ފަރާތް ތައްޔާރުކުރި ކާއެއްޗެއް ކަމުނުގޮސްގެން މެނޭޖަރެއްގެ ހައިސިއްޔަތުން އޭނާ ދައުވާލިބޭ ފަރާތް ގާތު އެ ވާހަކަ ދެއްކުމުގެ ސަބަބުންކަން އެނގެއެވެ.

އެ ވާހަކަ ދެއްކުމުން އެކަމާ ހިތްހަމަނުޖެހިގެން ދައުވާލިބޭ ފަރާތް ވަނީ ޕާން ކަފާ ވަޅިއަކުން އޭނާއަށް ޙަމަލާދީފައެވެ.

އެ ޙަމަލާގެ ސަބަބުން އޭނާގެ ބޮލުގެ އެއްފަޅިން ލޭ އައިކަމަށާއި، އޭނާ ސަލާމަތްކޮށްދިނީ އެވަގުތު އެތަނުގައި ތިބި މުވައްޒަފުންކަމަށްވެސް އޭނާ ހެކިބަސްދެމުން ބުނެފައިވެއެވެ.

މި މައްސަލައިގައި ހުށަހެޅިފައިވާ ހެކި ޤަރީނާއަށް ބަލައި ޝަރީއަތުން ވަނީ އޭނާގެ މައްޗަށް އުފުލާފައިވާ ދައުވާ އެކަށީގެންވާ ޝައްކެއް ނެތް މިންވަރަށް ސާބިތުވާކަމަށް ކަނޑައަޅުއްވާފައެވެ.

އަދި ކުށުގެ އުޤޫބާތެއްގެ ގޮތުން އޭނާ 10 އަހަރުގެ މުއްދަތަކަށް ޖަލަށް ލުމަށާއި، ޖިނާއީ އިޖުރާއަތުގެ ޤާނޫނުގެ 186 ވަނަ މާއްދާއަށް ރިއާޔަތްކުރާއިރު އޭނާ ތަންފީޒު ކުރަންޖެހޭ އަދަބަކީ 7 އަހަރާއި 25 ދުވަސްކަމަށް ޝަރީއަތުން ވަނީ ޙުކުމް ކޮށްފައެވެ.

ކްރިމިނަލް ކޯޓުގައި މި މައްސަލަ ބެއްލެވީ ގާޒީ އިބްރާހިމް އިޙްސާންއެވެ.