ފޮތެއްގެ ބަނޑޭރިގަނޑުގައި ފޮރުވައިގެން ރާއްޖެއަށް ޑްރަގް އެތެރެކުރިކަމުގެ ތުހުމަތުގައި މީހަކު ބަންދުކޮށްފި

ފޮތެއްގެ ބަނޑޭރިގަނޑުގައި ފޮރުވައިގެން ރާއްޖެއަށް ޑްރަގް އެތެރެކުރުމުގެ ތުހުމަތުގައި މީހަކު ބަންދުކޮށްފިއެވެ.

މި މައްސަލައިގައި ހައްޔަރުކޮށްފައިވަނީ 20 އަހަރުގެ ދިވެހި ފިރިހެނެކެވެ.

އޭނާ ހައްޔަރުކޮށް އޭނާގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރު ކުރުމުން ކޯޓުން ވަނީ އޭނާ 10 ދުވަހަށް ބަންދު ކުރުމަށް އަމުރުކޮށްފައެވެ.

އޭނާގެ ބަންދުގެ މުއްދަތު ހަމަވާނީ 23 ޖެނުއަރީ 2024 ގައެވެ.

ކްރިމިނަލް ކޯޓުން ބުނީ، އޭނާގެ މައްޗަށް ތުހުމަތު ކުރެވޭ ކުށް އޭނާ ކުރިކަމަށް ކޮންމެވެސް މިންވަރެއްގެ ހެކި ޤަރީނާ ލިބިފައިވާކަމަށެވެ. އެގޮތުން އޭނާ ޕޯސްޓަށް ބަލައި ދިޔަ ފޮށިގަނޑެއްގެ ތެރޭގައި އޮތް ދެ ފޮތެއްގެ ބަނޑޭރިގަނޑުގައި ކޮންސީލްކޮށްފައި (ފޮރުވާފައި) ހުރި މަސްތުވާތަކެތި ކަމަށް ޝައްކު ކުރެވޭ އެއްޗެއް ފެނިފައިވާކަމަށް ކޯޓު އަމުރުގައި ބުނެފައިވެއެވެ.

އޭނާ ސީންގައި ބުނެފައިވަނީ އެއީ ރައްޓެއްސަކު ބުނެގެން އޭނާ ޙަވާލުވާން ދިޔަ ފޮށިގަނޑެއް ކަމަށެވެ.

ނަމަވެސް ދިވެހި ފުލުހުންގެ ޚިދުމަތުން ބުނެފައިވަނީ ފޮށިގަނޑުގެ ވެރިފަރާތް ހޯދުމަށް ފުލުހުންނަށް އެއްބާރުލުންދީގެން ހިންގާ ކޮންޓްރޯލް ޑެލިވަރީ އޮޕަރޭޝަން ހިންގުމަށް އޭނާ އެއްބާރުލުން ދީފައިނުވާކަމަށެވެ.

އޭނާ ބަންދުގައި ބަހައްޓަން އަމުރުކޮށްފައިވަނީ މުުޖުތަމައުގެ ސަލާމަތާއި ރައްކާތެރިކަމަށްޓަކައެވެ. ކްރިމިނަލް ކޯޓުގައި މި އަމުރު ނެރުއްވީ ގާޒީ އިބްރާހިމް ޛިހުނީއެވެ.

ކޯޓު އަމުރުން އެނގޭ ގޮތުގައި މި މައްސަލައިގައި ކިލޯއަކަށްވުރެ ގިނަ މަސްތުވާތަކެތި ހޯދިފައިވެއެވެ.

އޭނާ ވަނީ އޭނާގެ ސިއްޙީ މައްސަލަތަކެއް ހުރިކަމަށް ބުނެ އެކަމުގެ ލިއެކިއުންތައް ހުށަހަޅާފައެވެ.