3 މަހަށް ދިގުލައިގެން ގޮސްފައިވާ ޤަތުލުޢާންމެއްގެ ތެރޭގައި ކަސްތޮޅު އެޅިފައި އޮތް ފަލަސްޠީނުގެ ޣައްޒާއަށް އަމާޒުކޮށް، ނިރުބަވެރި އިޒްރޭލުން ދެމުންދާ ޙަމަލާތަކުން ކުޑަ ނަމަވެސް ދިފާޢެއް ލިބޭތޯ، ޣައްޒާގެ މަދު ޢާއިލާތަކެއް އެތަނެއްގައި ވަގުތީ ހިޔާވަހިކަން ހޯދަމުން ދާ އެއް ތަނަކީ، ޣައްޒާއާއި މިޞްރު ހިއްސާކުރާ ބޯޑަރު ސަރަޙައްދެވެ. މެދުކެނޑުމެއް ނެތި، ޔަހޫދީން ދެމުންދާ ޢުދުވާނީ ޙަމަލާޓަކުން ދިފާއުވުމަށް، ބޯޑަރާ ގާތްގަނޑަކަށް އެންމެ 500 އެއްހާ މީޓަރު ދުރުގައި ޢާއިލާތަކުން ދިރިއުޅެމުން ދަނީ އަމިއްލަ އަތުން ޓެންޓު ޖަހައިގެންނެވެ.

2.3 މިލިއަން މީހުންގެ އާބާދީއެއް އޮތް ޣައްޒާގެ އާބާދީގެ ގާތްގަނޑަކަށް 100 ޕަސެންޓް މީހުންނަކީ މިއަދު އުފަން ވަޒަނުގައި ރެފިއުޖީންނެވެ. އޭގެ ތެރޭގައި، އެއް ފަހަރަށް ވުރެ ގިނަ ފަހަރު، އެކި ހިޔާވަހިތަކަށް ބަދަލު ވާން މަޖުބޫރުވި މީހުންގެ ޢަދަދުވެސް އިންތިހާއެވެ. ވަގުތީ ހިޔާވައްސެކޭ ބުނި ކަމުގައި ވީ ނަމަވެސް އެއީ ބައު ސަތަރިގަނޑެކެވެ. ނޫނީ ކޮންމެވެސް ކަހަލަ ޕްލާސްޓިކު ކޮތަޅު ޒާތުގެ އެއްޗަކުން، ހާމަ ބިމުގައި ޖަހާފައިވާ ޓެންޓުތަކެކެވެ. 

ޣައްޒާ ކޮންޓްރޯލް ކުރާ ޙަމާސް ޖަމާޢަތަށް ޢަމާޒުކޮށްގެން ކަމަށް ބުނެ އިޒްރޭލުން ދެމުންދާ ޙަމަލާތަކުގައި މުޅި ޣައްޒާހެން މިއަދު އޮތީ ސުންނާފަތިކޮށްފައެވެ. ޢާންމުން ދިރިއުޅޭ ގެތަކާއި، ޢިމާރާތްތަކާއި، ޢުމްރާނީ ބިނާވެށި ފުނޑުފުނޑުކޮށްލާފައެވެ. އިންސާނަކަށް ވީތީ ލިބިދޭ ދިރިހުރުމުގެ ޙައްޤާއި، ދިރިއުޅުމުގެ އެންމެ އަސާސީ ޙައްޤުތަކުންވެސް ޣައްޒާގެ ވަޒަންވެރިން ވަނީ މަޚްރޫމުކޮށްފައެވެ. މުޅި ޣައްޒާ އޮތީ ބަނޑަށް ޖެހިފައެވެ. ބޯލާނެ ސާފު ފެންފޮދެއް ނެތެވެ. ފިނި މޫސުމުގެ ދުވަސްވަރެއް ކަމަކު ހަށިގަނޑު ނިވާކޮށްލެވޭނެ ފަދައެއްވެސް ނެތެވެ. ބޭސްފަރުވާ ކުރުމުގެ ނަޞީބެއް ނެތެވެ. މި ހުރިހާ ކަމަކާއެކު، ސާމީ ޢައްބާސް ފަދަ އެތައް ބަޔަކަށް މިއަދު މަޖުބޫރު ވެފައި ވަނީ އޭނާ ބުނި ގޮތުން ނަމަ، 'ރޮނގުގެ ނިމޭ ހިސާބަށް' ދިއުމަށެވެ. ކުރު ލަފުޒުތަކެއް ކަމަކު، ފުންމިން ވަޒަންކޮށްލަންވެސް ދަތި މާނައެއް އޮތް ބުނުމެކެވެ.

އިޒްރޭލަށް ޢަމާޒުކޮށްގެން ޙަމާސް ޖަމާޢަތުން އޮކްޓޯބަރ 7 ވަނަ ދުވަހު ދިން ޙަމަލާގެ ރައްދުގައި ކަމަށް ބުނެ ޔަހޫދީން ދެމުން ގެންދާ ނިރުބަވެރި ޙަމަލާތަކުގައި ފަލަސްޠީނުން މަރުވި މީހުންގެ ޢަދަދު 23000 އަށް އަރަނީއެވެ. އެއީ ކޮން ބައެއްކަން ދެނެގަނެވިފައި ވާ މީހުންގެ ޢަދަދުތައް އެކަންޏެވެ. ޢިމާރާތްތަކުގެ ދަށުގައި ތާށިވެ، މަރުވެފައި އަދިވެސް އެތައް ހާސް ބަޔަކު ވާނެ ކަމަށް ޣައްޒާގެ ކަމާ ބެހޭ ފަރާތްތަކުން ބުނެއެވެ.

ނިރުބަވެރި ޔަހޫދީން ބުނާ ގޮތުގައި އިޒްރޭލުގެ މަޤްޞަދަކީ ޙަމާސްގެ ވަސް މި ބިންމަތިން ފޮހެލުމެވެ. އަދި ޣައްޒާއިން ހަތިޔާރު ނައްތާލާ، ޣައްޒާގައި ފެތުރިފައި އޮތް ހައްދު ފަހަނަ އަޅާ ދިއުމުގެ ފިކުރަށް ނިމުން ގެނެސް، އޮކްޓޯބަރ 7 ވަނަ ދުވަހު ހިނގި ފަދަ ކަމެއް ތަކުރާރު ވިޔަ ނުދިނުމެވެ. އޮކްޓޯބަރ 7 ވަނަ ދުވަހު އިޒްރޭލަށް ދިން ޙަމަލާއަކީ އިޒްރޭލު ސިއްސުވާލި ޙަމަލާއެއް ކަމަށް ބުނާ އިރު، ޖާސޫސީ ދުނިޔޭގެ އެންމެ ނުފޫޒުގަދަ އެއް ބާރަށް އެކަން ނޭނގި އޮވެދާނެތޯ ސުވާލު އުފެދެއެވެ. ޢާންމުންގެ ބައެއްގެ ފުރާނަ ދިޔައަސް ހެޔޮކޮށް، ޣައްޒާ ހަފުސްކޮށް ނަސްލު ދޮވެލާނެ އުޒުރެއް ހޯދަން، އިޒްރޭލުގެ ނިރުބަވެރިންނަށް އެ ޙަމަލާގެ މަޢުލޫމާތު އެނގި ހުރެމެ، އެކަން ސިއްރު ކުރީ ނޫން ކަންވެސް ނޭނގެއެވެ.

ހުރިހާ ކޮޅަކުން ފިއްތާލާފައި އޮތް ޣައްޒާއަށް އަމާޒުކޮށް އެއްގަމާއި ވައިގެ މަގުން ޔަހޫދީން ދެމުންދާ ޙަމަލާތައް، ފަހަރަކަށް ވުރެ ފަހަރެއް ދަނީ ވަރުގަދަ ކުރަމުންނެވެ. ފަލަސްޠީނުގެ ޞިއްޙަތާ ބެހޭ އޮފިޝަލުން އާދީއްތަ ދުވަހު ހާމަކުރެއްވި ގޮތުގައި، އާދީއްތަ ދުވަހުގެ ކުރިއަށް ފާއިތުވެދިޔަ 24 ގަޑިއިރުގެ ތެރޭގައި އެކަނިވެސް ޔަހޫދީން ވަނީ ފަލަސްޠީނުން 111 މީހަކު މި ދުނިޔެއާ ވަކިކޮށް، 250 މީހަކު ޒަޚަމް ކޮށްފައެވެ.

ޣައްޒާގެ ރަށްވެހިން މިއަދު އުފުލަމުންދާ ތަކުލީފުތަކުގެ ވާހަކައަކީ، އެ ނޫން އެހެން އެއްވެސް ބަޔަކަށް ކިޔައިދެވޭނެ ވާހަކަތަކެއް ނޫނެވެ. 21 ވަނަ ޤަރުނުގެ އަދުގެ ދުނިޔޭގައި ބަޔަކަށް ކުރިމަތިލާން ޖެހިދާނެ ކަމަށް ބިރުވެރި ހުވަފެނެއްގައިވެސް ފެނިފައި ނުވާ ފަދަ ޙާލެއްގައި ޣައްޒާގެ ކުދިބޮޑު އެންމެން މިއަދު ދިރިއުޅެމުން އެ ދަނީ، ހަމަޖެހިލުމުގެ ނޭވާއެއް ލެވޭނެ ދުވަހެއްގެ ކޮޅުމަތިވެސް ފެންނަން ނެތް ޙާލުގައެވެ. ނިރުބަވެރިންގެ ޢުދުވާނީ ޙަމަލާއެއްގައި ފުރާނަ ގެއްލި ދިއުމާ ހަމައަށް ޣައްޒާގެ ކޮންމެ ރަށްވެއްސެއްގެ ކިބައިންވެސް ފެނިގެން ދަނީ އުފަން ފަސްގަނޑަށް އެ ހިތުގައި ދެވިފައި އޮތް މަތިވެރި މަޤާމެވެ. އަދި ހެއްދެވި ފަރާތުން އިރާދަ ކުރެއްވި މިންވަރަށް ޝުކުރުކޮށް، ކެތްތެރިވުމުގެ ލާމަސީލު ނަމޫނާއެވެ.