ތިމާ ބޭނުންވާކަމެއް ހާސިލުކުރުމަށްޓަކައި ސަޅިބައިސާ ކެނޑުމަކީ ދުނިޔަވީ އާދައެކެވެ. އަދި ތިމާގެ އަމިއްލަ ހުއްޖަތްތައް ފުރިހަމަ ކުރުމަށްޓަކައި އެހެން މީހުންގެ އަގު ވައްޓާލަން މަސައްކަތް ކުރުމަކީވެސް ބަޔަކު ކޮށްއުޅޭ މުޑުދާރު އަމަލެކެވެ. މިކަން މިގޮތަށް ކުރަނީ ދެންތިބި މީހުންގެ އަގުވައްޓާލުމަށެވެ. އެއީ ދެރަ ބައެއްގެ ގޮތުގައި މީހުންނަށް ދެއްކުމަށްޓަކައެވެ. ތިމާއަކީ މާމޮޅު މީހެއްކަން މީހުންގެ ކުރިމަތީގައި ދެއްކުމަށެވެ.
ނަމަވެސް ބަޔަކު ކިޔާހާ އެއްޗެއް އަޑުއަހައިގެން ދިވެހީން އުޅުނު ޒަމާން މިހާރު ވަނީ ފަހަނައަޅާ ގޮސްފައެވެ. ޒަމާނާއެކު ދިވޭހީންވެސް ތަރައްގީވެއްޖެއެވެ. ކަންކަމުގައި ގޮތް ނިންމާއިރު ފަތިފުށް ރަނގަޅަށް ބަލައެވެ. މިހާރު މިފަދަ ވާހަކަތައް ދައްކާ މީހުން އާޚިރުގައި މުޖްތަމައުން ބަލައެއް ނުގަނެއެވެ. އޭގެ ބަދަލުގައި ގިނަ ފަހަރަށް ފެންނަނީ އެމީހެއްގެ އަގު ވެއްޓޭ މަންޒަރެވެ. ދެންތިބި މީހުން އެމީހާއަށް ހަޖޫޖަހަނީވެސް މަދު ފަހަރެއްގައެއް ނޫނެވެ.
މިފަހަރުވެސް ކަންދިމާވީ ހަމަމިހެންނެވެ. މާލެ ސިޓީ ކައުންސިލްގެ ހަތަރުވަނަ ދައުރުގެ 36 ވަނަ ރަސްމީ އާންމު ޖަލްސާގައި ޕީޕީއެމްގެ މެދު ހެންވޭރު ކައުންސިލް މެމްބަރު އާދަމް ރަމީޒު ވަނީ ބައެއް މިނިސްޓްރީތަކުގައި އޯޓިސްޓިކް ކުދިން އެބަތިބި ކަމަށާ، އެކަމާ މެދު ހައިރާން ނުވާކަމަށް ވިދާޅުވެފައެވެ. އެގޮތުން މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގެ ސްޓޭޓް މިނިސްޓަރުގެ މަގާމުގައި ހުންނެވި އަކުރަމް ކަމާލުއްދީނަކީ އޯޓިސްޓިކް ކުއްޖެއްކަމަށް ރަމީޒް ވިދާޅުވިއެވެ.
ސިޔާސީ މަންފާތައް ހާސިލުކުރުމަށް މިބީދައިން ވާހަކަދައްކާއިރު ވިސްނާލަންޖެހޭ ބައިވަރު ކަންތައް ހުންނާނެކަން އެންމެ ރަނގަޅަށް އެނގޭނީވެސް ހަމަ އެފަރާތްތަކަށެވެ. ކޮންމެ ނިޔަތެއްގައި ނަމަވެސް އެފަދައިން ވާހަކަދެއްކުމުން ދޭހަވާ އެއް ކަމެއް އެބައޮތެވެ. ކައުންސިލް މެމްބަރު ރަމީޒުގެ ކުރިމަތީގައި ޚާއްސަ އެހީއަށް ބޭނުންވާ ކުދިންނަކީ އެއްވެސް އަގެއްނެތް ބައެކެވެ. އެއީ މުޖުތަމައުގައި ބޭކާރު ބައެކެވެ. ނުވިތާކަށް މުޖުތަމައުން އެކުދިންނަކީ ބަލައިގަންނަން ޖެހޭ ބައެއްކަމަށް ގަބޫލު ނުކުރާހިނދު މިފަދަ ވާހަކައެއް ދައްކާނީ އެކުދިންނާމެދު ހަމްދަރުދީގެ ފުކެއްވެސް ނެތީމަތާއެވެ.
ކޮންމެއަކަސް މާލެ ސިޓީގެ ކައުންސިލް މެމްބަރުކަމަށް ރައްޔިތުން ވޯޓުލައިގެން ހޮވާފައިވާ މީހަކު މިފަދަ ގޮތަކަށް ވާހަކަ ދެއްކުމަކީ އެއްވެސް ހާލަތެއްގައި ބަލައިގަނެވޭނެ ކަމެއް ނޫނެވެ. ޚާއްސަ އެހީއަށް ބޭނުންވާ ފަރާތްތަކަކީވެސް މުޖުތަމައަށް ބޭނުންހުރި ބައެއްކަމާއި، އެފަރާތްތައްވެސް މުޖުތަމައުގައި ބައިވެރިކޮށް އެފަރާތްތަކަށް އަޅާލަން ޖެހޭނެކަން އަދުގެ ސަރުކާރުން އަދުގެ ސަރުކާރުން އަންނަނީ ވަރަށް ރަނގަޅަށް ދައްކަމުންނެވެ. ނަމަވެސް ކައުންސިލް މެމްބަރު ރަމީޒުފަދަ އިސް މަގާމުތަކުގައި ތިއްބެވި ބޭފުޅުން މިބީދައިން ވާހަކަދައްކަން ހަމަ ލަދުވެސް ނުގަންނަނީއެވެ.
މީގެ ދުވަސްކޮޅެއް ކުރިއަށް ޖެހިލާނަމެވެ. ހަނދާން ނެތޭހާ ދުރަކަށް ނޫނެވެ. މިދިޔަ އަހަރުގެ ޑިސެމްބަރު މަހު، އެޑިއުކޭޝަން މިނިސްޓްރީގެ ބަޖެޓުން ޚަރަދު ކޮށްގެން ވަނީ ނުކުޅެދުންތެރިކަން ހުންނަ ކުދިންނަށް ކަލާފާނު ސްކޫލުގައި ލިފްޓެއް ބަހައްޓާފައެވެ. ލިފްޓު ބޭނުންކުރުން ރަސްމީކޮށް ފައްޓަވައިދެއްވީ ނާއިބުރައީސް ފައިސަލް ނަސީމާއި އެޑިއުކޭޝަން މިނިސްޓަރު ޑރ. އާއިޝަތު އަލީއެވެ. މިކަންވެސް ބައެއް ސިޔާސީ ފަރާތްތަކަށްވީ ޖޯކަކަށެވެ.
ކުރީގެ ރައީސް އަބްދުﷲ ޔާމީނުގެ މައްޗަށް ކޮށްފައިވާ ހުކުމް ބާތިލުކުރުމާއެކު އިދިކޮޅު ކޯލިޝަނުން އެންމެ ފުރަތަމަ ބޭއްވި ޖަލްސާގައި އެމަނިކުފާނު ވަނީ މި ސަރުކާރުން މުޅިންވެސް ފެންނަނީ "ރިބަން ފަށް" ކަނޑާ މަންޒަރުކަމަށް ވިދާޅުވެފައެވެ. އެގޮތުން މިއަދުގެ ނާއިބުރައީސް ކުރައްވަނީ ކޮން މަސައްކަތެއްތޯ ސުވާލު ކުރައްވައި ރައީސް ޔާމީނު ވަނީ "ނުހަނު ބުރަކޮށް އުޅުއްވައި ލިފްޓެއް ހުޅުވައިދެއްވާފައިވާ" ކަމަށް ސަމާސާ ރާގެއްގައި ވިދާޅުވެފައެވެ. އަދި ކުދިންނަށް ރާއްޖޭގެ ތައުލީމީ ސިޔާސަތު ވިސްނައިދިނުމަށް ޕްރައިމަރީ ސުކޫލުތަކަށް ވަޑައިގަންނަވާ ވަޑައިގެންނެވުމަށްވެސް ރައީސް ޔާމީނު ވަނީ ޖޯކު ޖައްސަވާފައެވެ.
މިކަހަލަ ކިތަންމެ ވާހަކައެއް ދެއްކިދާނެއެވެ. އެކަންކަމުން ޔަގީންވާ އެއްކަމެއް އެބައޮތެވެ. އެއީ ސިޔާސީ މަންފާއެއް ހާސިލުކުރުމަށް މިފަދަ ބޭފުޅުން ކޮންމެފަދަ ވާހަކައެއްވެސް ދައްކަފާނެކަމެވެ. އަދި މިފަދަ ފަރާތްތަކުގެ ހިތުގައި ޚާއްސަ އެހީއަށް ބޭނުންވާ ކުދިންނަށް އެއްވެސްކަހަލަ ހަމްދަރުދީއެއް ނެތްކަމެވެ. އެފަރާތްތަކުން ބޭނުންވާނީ ކޮންމެހެނަކުންވެސް އެބޭފުޅުން ބޭނުންވާ މަގުސަދުތައް ހާސިލުކުރުމަށެވެ.
ޚާއްސަ އެހީއަށް ބޭނުންވާ ކުދިންނަކީ ދަށުދަރަޖައިގެ ބަޔަކަށްހަދައި، އެކުދިންނަށް މަލާމާތް ކުރުމަށްފަހު ކައުންސިލް މެމްބަރު ރަމީޒު ވަނީ އެކަމަށް މައާފަށް އެދިފައެވެ. ނަމަވެސް ސުވާލަކީ ހިތުހުރި އެއްޗެއް ގޮވާފައި މައާފަށް އެދުމުން ހުރިހާކަމެއް ހައްލުވާނެތޯއެވެ. އޭގެ ބަދަލުގައި ރައްޔިތުންނަށް ހާމަވެގެންދަނީ ބައެއް ފަރާތްތަކުގެ ވީދައިފައިއޮތް ފަތިފުށް ނޫންތޯއެވެ.
