ޣައްޒާގައި އިސްރާއީލުން ކުރަމުންދާ އިންސާނިއްޔަތާ ޚިލާފު ލޭއޮހޮރުވުމުގެ ހަނގުރާމައަށް މެކްޑޮނާލްޑްސްއިން ތާއީދުކުރާ ކަމަށް ބުނެ އެ ކުންފުނިން ހިންގާ ހަރަކާތްތައް ބޮއިކޮޓް ކުރުމުގެ ސަބަބުން މެދުއިރުމައްޗާއި އެނޫން ވެސް ގިނަ މާކެޓުތަކުން މެކްޑޮނަލްޑްސްގެ ފައިދާ ވަރަށްބޮޑަށް ދަށްވެފައިވާކަމަށް ރިޕޯޓްތަކުން ހާމަވެއްޖެއެވެ.

ބުރާސްފަތި ދުވަހު ލިންކްޑްއިންގައި މެކްޑޮނަލްޑްގެ ސީއީއޯ ކްރިސް ކެމްޕްޒިންސްކީ ކުރެއްވި ޕޯސްޓެއްގައި ވިދާޅުވީ ޣައްޒާ ހަނގުރާމައިގެ ސަބަބުން އޭނާގެ ކުންފުންޏަށް "މާނަހުރި ވިޔަފާރީގެ އަސަރުތަކެއް" ކުރިމަތިވެފައިވާ ކަމަށާއި އަދި އެ ބްރޭންޑާ ގުޅޭގޮތުން ދުނިޔޭގެ ކަންކޮޅުތަކުގައި ފަތުރަމުންދަނީ "އެސޯސިއޭޓެޑް ދޮގު މައުލޫމާތު" ތަކެއްގެ ގޮތުގައި އޭނާ ވަނީ ސިފަކުރައްވާފައެވެ.

އިސްރާއީލުން ފަލަސްތީނަށް ދެމުން ގެންދާ ހަމަލާތަކުގެ ސަބަބުން ކުރިމަތިވާ ނުރައްކާތަކާ ކުރިމަތިލާން ޖެހިފައިވަނީ ހަމައެކަނި މެކްޑޮނަލްޑްސްއަށް އެކަންޏެއް ނޫނެވެ. ހުޅަނގުގެ ބޮޑެތި ފުޑް ޗެއިންތަކުން އިސްރާއީލަށް ތާއީދު ކުރާކަން ހާމަކުރުމުން ބޮއިކޮޓް ކުރަން ވަނީ ގޮވާލައިފައެވެ.

އޭގެ ރައްދުގައި މެކްޑޮނަލްޑްސްގެ ސީއީއޯ ރޮއިޓާސްއަށް ވިދާޅުވީ މެކްޑޮނަލްޑްސް ފަދަ ބްރޭންޑްތަކާ ބެހޭ ގޮތުން ދޮގު މައުލޫމާތު ފެތުރުމަކީ މާޔޫސްކުރުވަނިވި އަދި ނުރަނގަޅު ވާހަކަތަކެއް ކަމަށެވެ.

"މުސްލިމް ގައުމުތައް ހިމެނޭ ގޮތަށް އަޅުގަނޑުމެންގެ ވިޔަފާރި ހިންގާ ކޮންމެ ގައުމެއްގައި ވެސް މެކްޑޮނަލްޑްސް ފަޚުރުވެރިކަމާ އެކު ތަމްސީލު ކުރަނީ އެ މީހުންގެ މުޖުތަމައުތަކަށް ހިދުމަތްކޮށް އެހީތެރިކަން ފޯރުކޮށްދިނުމަށް ކެނޑިނޭޅި މަސައްކަތް ކުރާ ލޯކަލް އޯނަރު އޮޕަރޭޓަރުން،" ސީއީއޯ އޭނާގެ ލިންކްޑްއިން ޕޯސްޓުގައި ވިދާޅުވެފައިވެއެވެ.

އިސްރާއީލަށް ތާއީދުކުރާ ކަމަށް ބުނާ ސްޓޭންޑާ އިދިކޮޅަށް އެކުންފުނި އޮތްކަން ހާމަކުރުމުގެ ގޮތުން ކެމްޕްޒިންސްކީ ވަނީ އޭނާގެ ކުންފުނީގެ ސްޓޭންޑް ހާމަކޮށްފައެވެ. "މެދުއިރުމަތީގެ ހަނގުރާމައިގެ ސަބަބުން އަސަރުކުރި މުޖުތަމައުތަކާއި އާއިލާތަކާ އެކު އަޅުގަނޑުމެން ދެމި އޮންނާނެ،" އޭނާ ލިޔުއްވާފައިވެއެވެ.

މެކްޑޮނަލްޑްގެ ފައިދާ ބޮޑުތަނުން ދަށްވެފައި މިވަނީ މިދިޔަ އޮކްޓޫބަރު މަހު އިސްރާއީލުގެ އިސްތިއުމާރީ ބާރުތަކުގެ މެމްބަރުންނަށް އެތައް ހާސް ކެއުމެއް ހަދިޔާކުރަން އާންމުކުރުމާ ގުޅިގެން މުސްލިމުންނާއި އެނޫން ވެސް ގައުމުތަކުގެ މެދުގައި އެކުންފުންޏާއި މެދު ނުރުހުން އުފެދިފައިވާ ދަނޑިވަޅެއްގައެވެ.

ޣައްޒާގައި ހިންގަމުންދާ އަނިޔާވެރި އިސްރާއީލުގެ ކެމްޕޭނަށް އެ ކުންފުނިން ތާއީދުކުރާ ކަމުގެ ޚަބަރު ލިބުމާއެކު މުސްލިމް ދުނިޔޭގެ އެހެން މެކްޑޮނަލްޑްގެ ފްރެންޗައިޒްތަކުން ވަނީ އެކަމާ ދެކޮޅުކަން ހާމަކޮށްފައެވެ.

މެލޭޝިއާގައި މެކްޑޮނަލްޑްސްގެ ލޯކަލް ބްރާންޗަކުން މިހާރުވެސް ދަނީ 1.3 މިލިއަން ޑޮލަރުގެ ގެއްލުމުގެ ބަދަލު ހޯދުމަށް ކޯޓަށް މައްސަލަވައްދާ ވަކާލާތުން ކުރަމުން ކަމަށްވާއިރު، އެ ކުންފުންޏާއިމެދު ހިންގަމުންދާ ގައުމީ ބޮއިކޮޓް ހަރަކާތެއް ހިންގަމުން ދާތީ، އިސްރާއީލަށް ތާއީދު ކުރުމުގައި އެ މީހުންގެ ބައިވެރިވުމެއް ނެތް ކަމަށް ބުނެ، އެ ތުހުމަތަކީ "ދޮގު އަދި އަބުރު ކަތިލާ" ތުހުމަތެއް ކަމަށް ސިފަކުރަމުންނެވެ.

އިސްރާއީލުން ފަލަސްތީނާ ދެކޮޅަށް ހިންގަމުންދާ ހަމަލާތަކުގައި އޮކްޓޯބަރު މަހުގެ ހަތް ވަނަ ދުވަހުން ފެށިގެން މިހާތަނަށް 22،600 އަށް ވުރެ ގިނަ މީހުން މަރުވެފައިވާއިރު، 57،910 މީހުން ވަނީ ޒަހަމްވެފައެވެ.

މަރުވި މީހުންގެ ތެރޭގައި ގިނައީ އާންމުންނާއި ކުޑަކުދިން ކަމަށް ވާއިރު، އިސްރާއީލުން ފަލަސްތީނާ ދެކޮޅަށް ކުރަމުންދާ އިންސާނިއްޔަތާޚިލާފު ހަނގުރާމައިގެ ނާތަހުޒީބު އަދި އަނިޔާވެރި ސިފަ އެކަމުގެ ސަބަބުން ދައްކުވައިދެއެވެ.