އަޒްމީންގެ އިތުބާރު ނެތް ކަމަށް ފާސްކުރި ޖަލްސާ، ވެލެންސިއާގެ ޤަވާއިދާ ޚިލާފު!

ކުލަބު ވެލެންސިއާގެ ޗެއާމަންކަމުން ޢަބްދުﷲ އަޒްމީން ވަކިކުރަން، އެކުލަބުގެ ހިންގާ ކޮމެޓީގެ ޖަލްސާ ބާއްވާފައި ވަނީ ކުލަބުގެ ޤަވާއިދާ ޚިލާފަށް ކަމަށް އަޒްމީން ވިދާޅުވެއްޖެ އެވެ.

ވެލެންސިއާގެ ނައިބު ރައީސް އިލްމާއު ހުސެއިން އިބްރާހިމް (މައު) އަދި ޑިރެކްޓަރ އޮފް ފައިނޭންސް ހަސަން ވަހީދު (ދޮނާ) އާދީއްތަ ދުވަހު ބޭއްވި ނޫސްވެރިންގެ ބައްދަލުވުމުއްގައި ވިދާޅުވީ، ވެލެންސިއާގެ ޗެއާމަންކަނުން އަޒްމީން ދުރުކުރަން، މިދިޔަ ޑިސެމްބަރު މަހުގެ 26 ވަނަ ދުވަހު ހިންގާ ކޮމެޓީން ފާސްކޮށްފައިވާ ކަމަށެވެ. އަަދި އަޒްމީންގެ އިތުބާރު ނެތް ކަމަށް ފަސް މެމްބަރަކު ވޯޓު ދެއްވާފައިވާ ކަމަށް ވެސް ވަނީ ވިދާޅުވެފަ އެވެ.

އެކަމާ ގުޅިގެން އާދީއްތަ ދުވަހުގެ ރޭ އަޒްމީން ނެރުއްވި ނޫސް ބަޔާނެއްގައި ވިދާޅުވީ، ވެލެންސިއާގެ ހިންގާ ޤަވާއިދުގެ 10 ވަނަ މާއްދާގެ ދަށުން ހެދިފައިވާ ހިންގާ ކޮމެޓީގެ ޤަވާއިދުގައި ބުނެފައި ވަނީ، ހިންގާ ކޮމެޓީގެ ޖަލްސާއެއް އެންމެ އަވަހަށް ވެސް ބޭއްވޭނީ އެކަމަށް އެދި މެމްބަރުން ޗެއާމަން އަށް ދެންނެވުމުން، މަދުވެގެން 24 ގަޑިއިރުގެ ތެރޭގައި ކަމަށެވެ. ނަމަވެސް، މައު އަދި ދޮނާ ވިދާޅުވި ފަދައިން، މިދިޔަ ޑިސެމްބަރު މަހުގެ 26 ވަނަ ދުވަހު ނުވަތަ އޭގެ ފަހުން ވެސް، ހިންގާ ކޮމެޓީގެ ބައްދަލުވުމެއް ބާއްވަން ވެލެންސިއާގެ އެއްވެސް މެމްބަރަކު އެދިފައިނުވާކަން އަޒްމީން ފާހަގަ ކުރެއްވި އެވެ.

މީގެ އިތުރުން ނޫސްވެރިންގެ ބައްދަލުވުމުގައި މައު ވިދާޅުވެފައި ވަނީ 26 ވަނަ ހިންގާ ކޮމިޓީ އެއްކުރަން އެދިފައި ވަނީ ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ރައީސް ބައްސާމް އަދީލްކަން ފާހަގަ ކުރައްވައި އަޒްމީން ވިދާޅުވީ، ބައްސާމަކީ ވެލެންސިއާގެ ހިންގާ ކޮމިޓީގެ މެމްބަރެއް ނޫން ކަމަށެވެ. ހަމަ އެހެންމެ، މައު އަށް ގުޅުއްވައި އަޒްމީން އިސްތިއުފާގެ ވާހަކަ ދައްކާފައިވާކަމަށް ބުނެ ދައްކަމުން ދަނީ ދޮގު ވާހަކައެއް ކަމަށް ވެސް އަޒްމީން ވިދާޅުވެފައިވެ އެވެ. އިތުރަށް އަޒްމީން ވިދާޅުވީ، ވެލެންސިއާގެ ޗެއާމަންކަމުގެ މަގާމުން އޭނާ އިސްތިއުފާ ދީފައިވާ ނަމަ، އިތުބާރު ނެތްކަމުގެ ވޯޓެއް ނަގަން ޖެހޭ ސަބަބެއް ސާފުނުވާކަމަށެވެ.

އަޒްމީންގެ އިތުބާރު ނެތް ކަމަށް ވެލެންސިއާގެ ހިންގާ ކޮމެޓީން ފާސްކޮށްފައިވާއިރު، އެ ކުލަބުގެ އެތެރޭގައި ވަނީ މައްސަލަ ޖެހިފަ އެވެ. އެގޮތުން ވެލެންސިއާގެ ތާއީދު ސިޓީ، ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ އިންތިޚާބުގައި ވާދަކުރައްވާ ދެ ކެންޑިޑޭޓުންގެ އަތުގައި އޮތް މައްސަލަ ވަނީ ފެންމަތިވެފަ އެވެ. ނަމަވެސް ވެލެންސިއާ އިން ވަނީ އެ ކުލަބުގެ ތާއީދު އޮތީ ޤައުމީ ޓީމުގެ ކުރީގެ ފޯވާޑް، އަދި އެފްއޭއެމްގެ ކުރީގެ ރައީސް އަޙްމަދު ޠާރިޤް (ޓޮމް) އަށް ކަމަށް ހާމަކޮށްފަ އެވެ. އަޒްމީން ސޮއި ކުރައްވައި، ވެލެންސިއާ އިން ވަނީ އެކަން އެފްއޭއެމްގެ އިލެކްޓޯރަލް ކޮމެޓީ އަށް ވެސް އަންގައިފަ އެވެ.