ހުޅަނގު އައްސޭރިއަކީ ފަލަސްޠީނު ބައި ކުރެވިފައި އޮތް މައިގަނޑު 2 ސަރަޙައްދުގެ ތެރެއިން އެއް ސަރަޙައްދެވެ. އަނެއް ސަރަޙައްދަކީ ނިމޭނެ ދުވަހެއްގެ ކޮޅުމަތިވެސް ފެންނަން ނެތް ޤަތުލުޢާންމެއްގެ ޝިކާރައަކަށް ވެފައި އޮތް ޣައްޒާއެވެ. ހުޅަނގު އައްސޭރީއަކީ އިޒްރޭލާއި-ފަލަސްޠީނުގެ ދިގުލައި ގޮސްފައިވާ މައްސަލައިގެ ޙައްސާ ބިމެކެވެ. 5640 އަކަ ކިލޯމީޓަރުގެ ހުޅަނގު އައްސޭރީގެ އާބާދީގައި ފަލަސްޠީނު ރައްޔިތުންގެ ޢަދަދަކީ 2.7 މިލިއަނެވެ. ޣައިރު ޤާނޫނީ އިޒްރޭލުގެ 7 ލައްކައެއްހާ މީހުންވެސް ހުޅަނގު އައްސޭރީގައި ވަނީ އާބާދުވެފައެވެ. އޭގެ ތެރެއިން 2 ލައްކައަށް ވުރެ ގިނަ މީހުން ދިރިއުޅެމުން ދަނީ އިރުމަތީ ޤުދުސްގައެވެ.

ކިޔައި ދޭން މި އުޅެނީ ފަހަރެއްގައިވެސް ހުޅަނގު އައްސޭރީގެ ވަނަވަރެއް ނޫނެވެ. ނަމަވެސް ނިރުބަވެރި އިޒްރޭލުގެ ޚުދުމުޚުތާރު ކަމުގެ ދަލުގައި ހުޅަނގު އައްސޭރިވެސް ޖައްސާ، ނޭވާ ހާސް ކުރަމުން ދާ ގޮތުގެ ވާހަކައެވެ. ނިރުބަވެރި ޔަހޫދީ އިޒްރޭލުން ހިފާފައިވާ ފަލަސްޠީނުގެ ހުޅަނގު އައްސޭރީގައި ޙައްޤުތައް ނިގުޅައިގަތުމުގެ ޖަރީމާތައް، އިޒްރޭލުން މެކުހަށް ޖަހާފައި ވާ ކަމަށް އދއިން ޑިސެމްބަރ 28 ވަނަ ދުވަހު ޝާޢިއު ކުރި ރިޕޯޓެއް ވަނީ ބުނެފައެވެ. ހުޅަނގު އައްސޭރީގައި ދިރިއުޅެމުންދާ ފަލަސްޠީނުގެ ރައްޔިތުންނާ ދެކޮޅަށް އިޒްރޭލުން ހިންގަމުންދާ ޖަރީމާތައް ހުއްޓާލުމަށްވެސް އދއިން ވަނީ ރިޕޯޓްގައި ގޮވާލާފައެވެ. މި އިންޒާރުގެ ރަނގަބީލުގެ އަޑު ކިތަންމެ ގަދައެއް ކަމަކު، ގިނަވާނީ "ނުއިވޭ" ކަންފަތްތަކެކެވެ.

އިންސާނީ ޙައްޤުތަކާ ބެހޭ އދގެ ހައިކޮމިޝަނަރުގެ އޮފީހުން ތައްޔާރު ކޮށްފައި ވާ ރިޕޯޓް ބުނާ ގޮތުގައި، އޮކްޓޯބަރ 7 ވަނަ ދުވަހުން ފަށައިގެން އެކަނިވެސް އިޒްރޭލުން ވަނީ ހުޅަނގު އައްސޭރީގައި ފަލަސްޠީނުގެ 300 މީހެއްގެ ފުރާނަ ދުއްވާލާފައެވެ.

އިންސާނީ ޙައްޤުތަކާ ބެހޭ އދގެ ހައިކޮމިޝަނަރު ވޯލްކަރ ޓަރކް ވިދާޅުވީ، ހުޅަނގު އައްސޭރީގައި ފަލަސްޠީނުގެ ރައްޔިތުންނާ ދެކޮޅަށް ކޮންމެހެން ބޭނުން ކުރަން ނުޖެހޭ މިންވަރަށް ނުވަތަ ނިސްބަތުން ގަދަ ބާރެއް އިޒްރޭލުން ބޭނުން ކުރަމުންދާ ދިއުމަކީ "އިންތިހާއަށް ކަންބޮޑުވަނިވި" ކަމެއް ކަމަށެވެ.

މަދުވެގެން 105 މީހަކު މަރާލި ކަމަށް ބެލެވޭނީ، ރެފިއުޖީ ކޭމްޕްތަކުގައި ނުވަތަ އާބާދީ  ބައިބޯ ސަރަހައްދުތަކުގައި ވައިގެ ހަމަލާތަކެއް ދީގެން ނުވަތަ އެހެންވެސް އަސްކަރީ އުކުޅުތަކެއް ބޭނުންކޮށްގެން އިޒްރޭލުން ހިންގި އަސްކަރީ އޮޕަރޭޝަންތަކުގައި ކަމަށް އދގެ ރިޕޯޓްގައި ބުނެފައިވެއެވެ. އަދި 8 މީހަކު މަރާލާފައި ވަނީ ހުޅަނގު އައްސޭރީގައި ވަޒަންވެރިވެގެން އުޅޭ ޔަހޫދީ އާބާދުގެ ބަޔަކު ކަމަށްވެސް އދގެ ރިޕޯޓްގައި ފާހަގަ ކޮށްފައި ވެއެވެ.

އޮކްޓޯބަރ 7 ވަނަ ދުވަހުގެ ކުރިއަށް ފާއިތުވެދިޔަ ދޮޅު އަހަރެއްހާ ދުވަހަކީވެސް ހުޅަނގު އައްސޭރިއަށް މާ އަމާން ދުވަސްތަކެއް ނޫނެވެ. އޭރުވެސް އިޒްރޭލުން ދިޔައީ ހުޅަނގު އައްސޭރީގައި އެކި ކަހަލަ ކުރިމަތިލުންތައް ހިންގަމުންނެވެ. ނަމަވެސް، ޣައްޒާ ކޮންޓްރޯލް ކުރާ ޙަމާސް ޖަމާޢަތުގެ ވަސް، މި ބިންމަތިން ފޮހެލަން ކަމަށް ބުނެ ޣައްޒާގައި ޤަތުލުޢާންމު ހިންގަން ފެށިފަހުން ހުޅަނގު އައްސޭރީގެ ޙާލަތު ވަނީ އިތުރަށް ގޯސްވެފައެވެ.

ހުޅަނގު އައްސޭރީގެ އާބާދީއަށް ބަލާއިރު 80 އާއި 85 ޕަސެންޓާ ދެމެދު މިންވަރެއް ހިއްސާ ކުރަނީ މުސްލިމުންނެވެ. ގިނައީ ސުންނީންނެވެ. 12 އާއި 14 ޕަސެންޓާ ދެމެދު ޔަހޫދީން ހިއްސާކުރާ އިރު، ބާކީ އޮތް ބަޔަކީ ނަޞާރާ ދީނާއި އަދިވެސް އިތުރު އެހެން ދީންތައް ޤަބޫލު ކުރާ މީހުންނެވެ.