ފާއިތުވި 24 ގަޑިއިރު އެކަނިވެސް ޣައްޒާގައި 165 މީހުން ޝަހީދުކޮށްލައިފި
މިހާތަނަށް ހަމަލާތަކުގައި ޝަހީދުވި ފަލަސްތީން މީހުންގެ އަދަދު 21672 އަށް ވަނީ އަރާފައި
ފަލަސްތީނުގައި ހަމަލާ ދީފައިވާ ސަރަހައްދެއް
އިސްރާއީލުން ފަލަސްތީނަށް ދެމުންދާ ހަމަލާތަކުގައި ފާއިތުވި 24 ގަޑިއިރު އެކަނި ވެސް ޣައްޒާގައި 165 މީހުން ޝަހީދުކޮށްލައިފިއެވެ.
މީޑިއާ ރިޕޯޓްތައް ބުނާގޮތުން އިސްރާއީލުގެ ސިފައިން ވަނީ އަލްޒަވައިދާ އަށް ވެސް ބޮމުގެ ވަރުގަދަ ހަމަލާތަކެއް ދީފައެވެ. އަދި ޣައްޒާގެ މެދުތެރެއަށް އިސްރާއީލުން ދެމުންދާ ހަމަލާތައް އެ ޤައުމުން ދަނީ ވަރުގަދަކުރަމުންނެވެ. އިސްރާއީލުން ވަނީ ހަމަލާތައް އިތުރަށް ވަރުގަދަކުރާނެ ކަމުގެ އިންޒާރުވެސް ދީފައެވެ. އަދި އެތައް މަސްތަކަކަށް މިހާރު ކުރިއަށްދާ ފަލަސްތީން - އިސްރާއީލް ހަނގުރާމަ ދިގުދެމިގެން ހިނގައިދާނެކަމަށް ވަނީ ބުނެފައެވެ.
މިހާތަނަށް ހަމަލާތަކުގައި ނިޔާވި ފަލަސްތީން މީހުންގެ އަދަދު 21672 އަށް ވަނީ އަރާފައެވެ. އަދި 56165 މީހުންނަށް ވުރެ ގިނަ މީހުން ވަނީ ޒަޙަމްވެފައެވެ. ހަމަލާތަކުގެ ސަބަބުން ފަލަސްތީނުގައި އަސާސީ ޚިދުމަތްތަކާއި ޒަރޫރީ ކާނާ އާއި ބޯފެން ނުލިބި އެތައް ބަޔަކު ދަނީ ހާލުގައި ޖެހެމުންނެވެ.
ޣައްޒާގެ މުސްލިމުންނާ ދެކޮޅަށް ޔަހޫދީން ހިންގަމުންދާ ހަމަލާތަކާ ދެކޮޅަށް ބައިނަލްއަޤުވާމީ ޖަމިއްޔާ ޖަމާއަތްތަކުން އަޑު އުފުލަމުން ނަމަަވެސް، މި ހަމަލާތަކަށް މިހާތަނަށް ނިމުމެއް ނާދެއެވެ.
