އިނގިރޭސި ޕްރިމިއާ ލީގުގައި މެންޗެސްޓަރ ސިޓީން، ޝެފީލްޑް ޔުނައިޓެޑާ ދެކޮޅަށް ކުޅޭ މެޗުގައި ވެސް އެ ޓީމަށް ކުޅެމުން އަންނަ ނޯވޭގެ އާލިން ހާލަންޑް އަދި ބެލްޖިއަމްގެ ކެވިން ޑި ބްރޭނާ އަށް ނުކުޅެވޭނެ ކަމަށް ކޯޗު ޕެޕް ގާޑިއޯލާ ބުނެފި އެވެ.

ލީގުގައި ސިޓީން ޝެފީލްޑް ޔުނައިޓެޑާ ދެކޮޅަށް ނިކުންނާނީ ހޮނިހިރު ދުވަހުގެ ރޭ އެވެ. ގާޑިއޯލާ ބުނީ އެ މެޗުގައި ވެސް އެ ދެ ކުޅުންތެރިންނަށް ނުކުޅެވޭނެ ކަމަށެވެ. އަނިޔާގެ ސަބަބުން ދެ ކުޅުންތެރިން ވެސް ކުޅުމުގަައި ދުރުގައި ތިބިއިރު، އެއީ ސިޓީ އަށް ކުރިމަތި ވަމުން އަންނަ ގޮންޖެހުންތަކެކެވެ.

އެންމެ ފަހުން ހާލަންޑް ސިޓީގައި ކުޅުނީ އިނގިރޭސި ޕްރިމިއާ ލީގުގައި އެސްޓަން ވިލާ އަތުން ބަލިވި މެޗުގަ އެވެ. އެ މެޗުގެ ފުރަތަމަ 11 ގައި ހިމެނިގެން، ފުރިހަމަ ވަގުތު ހަމަވަންދެން ހާލަންޑް ވަނީ ކުޅެފަ އެވެ. ނަމަވެސް، އޭގެ ފަހުން ސިޓީން ކުޅުނު އެއްވެސް މެޗެއްގައި އޭނާ ކުޅެފައެއް ނުވެ އެވެ. އެއީ އޭނާ އަށް ލިބުނު އަނިޔާ އިން މުޅިން އެއްކޮށް ރަނގަޅު ނުވާތީ އެވެ. ނަމަވެސް، އަނިޔާ އިން ރަނގަޅުވެ، ޑިސެމްބަރު މަހު އޭނާ ވަނީ ސިޓީގެ ފަރިތަކުރުންތަކަށް ނިކުންނަން ފަށައިފަ އެވެ. ގާޑިއޯލާ ބުނެފައި ވަނީ، ހާލަންޑަށް ކުޅެވެނެ ދުވަހެއް ޔަގީން ވާނީ، ގިނަ ކަންތައްތަކަށް ބެލުމަށްފަހު ކަމަށެވެ.

ސިޓީގެ މެދުތެރޭގައި އެންމެ މުހިންމު ދައުރެއް އަދާކުރަމުން އައި ޑި ބްރޭނާ އަށް އަނިޔާވީ، ކޮމިއުނިޓީ ޝީލްޑް މެޗުގަ އެވެ. އާސެނަލާ ދެކޮޅަށް ސިޓީން ކުޅުނު މެޗުގެ ދެ ވަނަ ހާފުގެ ވަކި ހިސާބަކުން ޑި ބްރޭނާ އަށް އަނިޔާވީއިރު، ވަގުތުން އޭނާ ވަނީ ބަދަލުކޮށްފަ އެވެ. އަނިޔާގެ ސަބަބުން ޑި ބްރޭނާ ވަނީ ސާޖަރީއެއް ވެސް ކޮށްފަ އެވެ. އެކަމުގެ ސަބަބުން ޑި ބްރޭނާ ކުޅުމާ ދުރުގައި ހުރިއިރު، ސިޓީ އަށް ވަނީ އެކަމުގެ އަސަރު ވެސް ކޮށްފަ އެވެ. އަނިޔާ އަށް ފަހު، ސިޓީގެ ފަރިތަކުރުންތަކަށް ޑި ބްރޭނާ ނިކުންނަން ފެށީ ގާތް ގަނޑަކަށް ހަތަރު މަސް ދުވަސް ވަންދެން ކުޅުމާ ދުރުގައި ހުރުމަށްފަހު އެވެ.

ޝެފީލްޑް ޔުނައިޓެޑު މެޗުގެ ކުރިން ވާހަކަ ދައްކަމުން ގާޑިއޯލާ ބުނީ ހާލަންޑް އަދި ޑި ބްރޭނާގެ އިތުރުން، އެ މެޗުގައި ޑޮކޫ އާއި ޖޯން ސްޓޯންސް އަށް ވެސް ނުކުޅެވޭނެ ކަމަށެވެ. މިވަގުތު ސިޓީ އޮތީ ލީގު ތާވަލްގެ ހަތަރު ވަނައިގަ އެވެ.