ބާސެލޯނާ ޖެހޭނީ ފެލިކްސް ގަންނަން، ލޯނަކަށް ނުދޭނެ

ބާސެލޯނާއަށް ކުޅެމުން އަންނަ އެތުލެޓިކޯ މެޑްރިޑުގެ ފޯވާޑް ޔާއޯ ފެލިކްސް ލޯނު އުސޫލުން ދޫނުކުރަން ނިންމައިފިއެވެ.

ބާސެލޯނާއިން ބޭނުންވަނީ އިތުރު އަހަރަކު ލޯނު އުސޫލުން ފެލިކްސް ޓީމުގައި ބެހެއްޓުމަށެވެ. ނަމަވެސް މިއީ އެތުލެޓިކޯއާ ބާސެލޯނާއާ ދެމެދު މިސީޒަން ފެށުމުގެ ކުރިން ވެވުނު އެއްބަސްވުމާ ޚިލާފު ކަމެކެވެ.

މި ސީޒަން ފެށުމުގެ ކުރިން، ލޯނު އުސޫލުން ފެލިކްސް ބާސެލޯނާއަށް ދޫކޮށްލީ އަންނަ ސީޒަނަށް އޭނާ ގަތުމަށް ޝަރުތުކޮށްފައެވެ. ނަމަވެސް ބާސެލޯނާގެ މާލީ ހާލަތު މިކަމަށް ތަންނުދޭތީ، އެ ކުލަބުން ބޭނުންވަނީ ލޯނު އުސޫލުން އަލުން ކުޅުންތެރިޔާ ހޯދުމަށެވެ.

ނަމަވެސް އެތުލެޓިކޯ މެޑްރިޑުން މިހާރު ވަނީ ޖެހިޖެހިގެން ދެވަނަ އަހަރެއްގައި މިކަން ނުކުރެވޭނެކަމަށް އަންގާފައެވެ. އަދި އޭނާ ގަތުމަށް ބާސެލޯނާ އުޒުރުވެރިވާނަމަ ފެލިކްސް އެހެން ކުލަބަކަށްވެސް ވިއްކާލަން އެކުލަބުން ތިބީ ތައްޔާރަށެވެ.

ފެލިކްސް މިހާރު ބާސެލޯނާގައި ރަނގަޅު ކުޅުމެއް ދައްކަމުން ދިއުމާއެކު އޭނާ ބޭނުންވަނީ ކުލަބުގައި ދެމިހުރުމަށެވެ.