ނާޞިރު ހޮސްޕިޓަލުގެ މޯގްގައި ވަގުތުކޮޅެއް...ހަނދާނުން ފޮހެނުލެވޭނެ އެތައް މަންޒަރަކާއި އަޑުތަކެއް!

ނިރުބަވެރި އިޒްރޭލުން، ނަސްލު ދޮވެލުމުގެ ވަރުގަދަ ޤަތުލުޢާންމެއް ހިންގަމުން ދާ ޣައްޒާގެ ކޮންމެ ހިސާބަކަށް ބަލައިލި ކަމުގައި ވީ ނަމަވެސް ފެންނަނީ ހިތްފަޅައިގެން ދާ ފަދަ މަންޒަރުތަކެކެވެ. ޢުދުވާންތަކަށް 70 އެތައް ދުވަހެއް ފާއިތުވެގެން ދިޔައިރުވެސް މިއިން އެއްވެސް މަންޒަރަކަށް ދުނިޔޭގެ ލޯތައް އާދައެއް ނުވެއެވެ. ސަބަބެއް ނެތިއެއް ނޫނެވެ. ޣައްޒާއިން ފެންނަ މަންޒަރުތަކަކީ، އަދުގެ 21 ވަނަ ޤަރުނުގައި އިންސާނުންތަކަކަށް ކުރިމަތިލާން ޖެހިދާނެއޭވެސް ބަޔަކު ހީކުރި ފަދަ މަންޒަރުތަކެއް ނޫނެވެ.

ޣައްޒާގެ ދެކުނުގައި ހުންނަ ނާޞިރު ހޮސްޕިޓަލުގެ މޯގް، ނުވަތަ ޤަބުރު ފިނިކުރާ ކޮޓަރީގެ މަންޒަރުތަކެއް ހިއްސާކޮށްލެވޭތޯ ބަލާނަމެވެ. އެޔެއް މިޔެއް ބެލުމެއް ނެތި، އެއްގަމާއި، ކަނޑާއި ވައިގެ މަގުން ޔަހޫދީން ދެމުންދާ ޢުދުވާނީ ޙަމަލާތަކުގައި މި ދުނިޔެ ދޫކުރާ މީހުންގެ ހަށިތައް ހުދު ކަފުނުގައި ނިވާ ކުރުމުގެ މަސައްކަތް ކުރިއަށް ދާ ތަނަކީވެސް އެއީއެވެ.

މޯގްގައި ތިބި ޖަމާޢަތްތެރިންނަށް މިއީ ބުރަ ދުވަސްވަރެކެވެ. މުވައްޒަފުންގެ ޢަދަދު ވަނީ ރެކޯޑް މިންވަރަކަށް މަދު ވެފައެވެ. ނުވިތާކަށް، މަރުވެފައި ވާ މީހުންގެ މަޢުލޫމާތު އެއް ކުރުމުގައިވެސް ބޮޑެތި ގޮންޖެހުންތަކަކާ ވަނީ ކުރިމަތިލާން މަޖުބޫރުވެފައެވެ. ހަށިގަނޑަށް ބަލައިލުމަށް ފަހު އެއި ކާކުގަން ދެނެނުގަނެވޭ މީހުންނާއި، ލައިގެން ހުރި އަންނައުނުގެ އެއްވެސް ހިސާބެއްގައި، ނުވަތަ ހަށިގަނޑުގެ އެއްވެސް ހިސާބެއްގައި އެއީ ކާކުކަން އަންގައިދޭ ލިޔެކިޔުމެއް ނެތް މީހުންނަކީ ކޮން ބައެއްކަން ދެނެގަތުގައި މޯގްގެ މުވައްޒަފުން އުފުލަމުން ދާ ބުރައަކީ ބަޔާންކުރަން ދަތި ތަކުލީފެކެވެ.

އެވަރުން އަދި ނިމުނީއެއް ނޫނެވެ. ޢުދުވާންތަކުގައި ބައެއް މީހުންގެ ހަށިތައް ވަނީ ބުރިބުރިވެ، އެޔެއް މިޔެއް ވަކި ނުވާ ވަރުވެފައެވެ.

ކަށުކަމާ ކެމީގެ ކަންކަމާއި، ޖަނާޒާގެ ކަންކަމާ ހިސާބަށް ގެންދެވެނީ އެއީ ކާކުގެ ހަށިގަނޑެއްކަން ދެނެގަނެވޭ ހިސާބުން އެކަންޏެވެ. ނުވަތަ ޢާއިލާއަކުން ހަށިގަނޑާ ޙަވާލުވާ ހިސާބުންނެވެ. އިޒްރޭލުން ހިންގަމުންދާ ޤަތުލުޢާންމުގައި މި ދުނިޔެ ދޫކުރާ މީހެއްގެ ލިސްޓަށް އެމީހެއްގެ ނަން އިތުރު ކުރެވެނީވެސް އެހާ ހިސާބުންނެވެ.

ބާކީ ހުރި ހުރިހާ ހަށިތައް ރައްކާ ކުރަނީ މޯގްގެ އައިސްއަލަމާރީގައެވެ. އެތައް ހަފުތާއެއް ވަންދެން އެ އައިސްއަލަމާރީގައި ހަށިތައް ހުރެއެވެ.

ޣައްޒާ ކޮންޓްރޯލް ކުރާ ޙަމާސް ޖަމާޢަތުން ހިންގާ ޞިއްޙަތާ ބެހޭ ވުޒާރާގެ ތަފާސް ހިސާބުތަކަށް ބަލާއިރު، އިޒްރޭލުގެ ޤަތުލުޢާންމުގައި މި ދުނިޔެ ދޫކުރި މީހުންގެ ޢަދަދު 20000 އަށް އަރައެވެ. ޢުދުވާނީ ޙަމަލާތަކުގައި ބިމާ ހަމަކޮށްފައިވާ ޢިމާރާތްތަކުގެ ބައިތަކުގެ ދަށުގައި އެތައް ހާސް ޤަބުރެއް ވާނެ ކަމަށްވެސް އެ ވުޒާރާއިން ބުނެއެވެ. މި ޢުދުވާންތަކުގައި ދުނިޔެ ދޫކުރި މީހުންގެ ލިސްޓަށް ބަލާއިރު، 70 ޕަސެންޓް ހިއްސާ ކުރަނީ އަންހެނުންނާއި ކުޑަކުދިން ކަމަށްވެސް ޣައްޒާގެ ޞިއްޙަތާ ބެހޭ ވުޒާރާއިން ބުނެއެވެ.

މޯގްގައި މަސައްކަތް ކުރާއިރު އެ އުފުލަންޖެހޭ ނަފުސާނީ ތަކުލީފުތަކުގެ ވާހަކަ ދައްކާ ކޮޅުން ލާކަށް ނެތެވެ.

ޙަމާސް ޖަމާޢަތް ނެތިކޮށްލާނެ ކަމަށް ބުނެ ޔަހޫދީން ހިންގަން ފެށި ޤަތުލުޢާންމުގައި ޢާންމު ރައްޔިތުންގެ ފުރާނަ ދުއްވަމުން ދާ މައްސަލައަށް ބައިނަލްއަޤުވާމީ ސަމާލުކަން ވަނީ ހުއްޓިފައެވެ.

ޣައްޒާގައި ހިންގާ ގިނަ ހޮސްޕިޓަލުތަކުގައި މިއަދު އެކަށީގެންވާ ގޮތެއްގައި ޚިދުމަތް ދެވޭކަށް ނެތެވެ. އެތައް ސަތޭކަ ޑޮކްޓަރުންނަކާއި ޞިއްޙީ ޚިދުމަތްތެރިންނެއްވެސް ޢުދުވާންތަކުގައި މި ދުނިޔެ ދޫކޮށްފިއެވެ. މުޢާޞަލާތީ ޚިދުމަތްތަކަށް ވަނީ ބުރޫއަރާފައެވެ. ހޮސްޕިޓަލުތަކަށް ބޭނުންވާ ތެލާއި ކަރަންޓުގެ ސަޕްލައިވެސް އެހާމެ ދައްޗެވެ. އަނިޔާ ލިބި، ޒަޚަމްވާ މީހުންނަށް ފަރުވާ ކުރަންވެސް ހޮސްޕިޓަލުތައް ވަނީ ނުކުޅެދިފައެވެ. ޣައްޒާގެ އުތުރުގައި މިވަގުތު އެންމެ ހޮސްޕިޓަލެއްވެސް ނެތް ކަމަށް ދުނިޔޭގެ ޞިއްޙަތު ޖަމިއްޔާ (ޑަބްލިއުއެޗްއޯ)އިން ވަނީ ހާމަކޮށްފައެވެ.

ނާޞިރު ހޮސްޕިޓަލުގެ މޯގްގައި މިވަގުތު މަސައްކަތް ކުރަމުންދާ ޓީމަކީ ބައިނަލްއަޤުވާމީ އެއްބައެއްވަންތަ ކަމުގެ ރީތި މިސާލެކެވެ. އެ ޓީމުގައި ޣައްޒާގެ ޑޮކްޓަރުންނާއި ޞިއްޙީ އޮފިޝަލުންގެ އިތުރުން ދުނިޔޭގެ އެކި ކަންކޮޅުތަކުން ހިލޭ ސާބަހަށް ޣައްޒާއަށް ދަތުރު ކޮށްފައި ވާ ޢިލްމުވެރިންނާއި، އެކްޓިވިސްޓުންނާއި ދަރުމައަށް މަސައްކަތް ކުރާ މީހުން ހިމެނެއެވެ.