ފައިނަލުގައި ކުޅެން ހާލަންޑަށް ހުރަސްއަޅަނީ ގަވާއިދު

ފީފާ ކްލަބް ވޯލްޑްކަޕުގެ ގަވާއިދުގައިވާ ގޮތުން، މެންޗެސްޓާ ސިޓީގެ ފޯވަޑް އާލިން ހާލަންޑަށް ފައިނަލް މެޗުގައި ނުކުޅެވޭނެ ކަމަށް މީޑިއާތަކުން ބުނަން ފަށައިފިއެވެ.

ސައޫދީ އަރަބިއްޔާގައި ކުރިއަށްދާ މުބާރާތުގެ ފައިނަލްގައި، ހުކުރު ދުވަހު ބްރެޒިލްގެ ފުލުމިނޭޒީއާ ދެކޮޅަށް ނުކުންނަ ޓީމުގައި ހާލަންޑް ހިމެނޭނެކަމަށް ސިޓީގެ ކޯޗު ޕެޕް ގާޑިއޯލާ ހުރީ އުއްމީދުކޮށްގެންނެވެ.

ނަމަވެސް މުބާރާތުގެ ގަވާއިދުގައި ބުނެފައިވަނީ ފައިނަލް މެޗުގައި ކުޅެވޭނީ ސެމީ ފައިނަލް މެޗުގައި ޓީމު ލިސްޓުގައި ހިމަނާފައިވާ ކުޅުންތެރިންނަށް ކަމަށެވެ.

ސައޫދީ އަރަބިއްޔާއަށް ޓީމާއެކު ދިޔަނަމަވެސް، އަނިޔާގެ ސަބަބުން ހާލަންޑް ސެމީ ފައިނަލް މެޗަށް ނެގި ޓީމުގައި ހިމަނާފައެއްނުވެއެވެ. އަދި ކެވިން ޑެބްރޫނޭއާއި ޖެރޮމީ ޑޮކޫވެސް ޓީމުގައި ހިމަނާފައިނުވާތީ ފައިނަލް މެޗުގައެއް ނުކުޅެވޭނެއެވެ. ނަމަވެސް މިކަމާމެދު ސިޓީން އަދި ވަކިއެއްޗެއް ނުބުނެއެވެ.

ޖަޕާނުގެ އުރަވާ ރެޑް ޑައިމަންޑާ ދެކޮޅަށް ސިޓީން ނެރެފައިވަނީ ފޯވާޑެއްނެތި، އެޓޭކިން މިޑްފީލްޑަރުންގެ މައްޗަށް އެކުލަވާލި ޓީމެކެވެ.

ޗެމްޕިއަންސް ލީގުގެ ޗެމްޕިއަނުންގެ ގޮތުގައި މުބާރާތުގައި ކުޅެމުން އަންނަ ސިޓީގެ ކޯޗު ޕެޕް ގާޑިއޯލާ ބުނެފައިވަނީ މި މުބާރާތުގައި ކުޅުމަކީ އަބަދު ލިބޭނެ ފުރުސަތެއްނޫން ކަމަށާއި، މިހެންވެ ސިޓީން މި ފަހަރު ތަށި ހޯދަންޖެހޭ ކަމަށެވެ.