އަހަރެން ހުއްޓައި ކްލަބް ވޯލްޑްކަޕް ކާމިޔާބު ކުރަންޖެހޭ: ގާޑިއޯލާ

ދުނިޔޭގެ ޗެމްޕިއަން ކުލަބުތަކުގެ މެދުގައި ކުޅޭ ކްލަބް ވޯލްޑްކަޕް ފުޓްބޯޅަ މުބާރާތަކީ, އިނގިރޭސިވިލާތުގެ މެންޗެސްޓަރ ސިޓީން ކާމިޔާބު ކުރަންޖެހޭ މުބާރާތެއް ކަމަށް، ކޯޗު ޕެޕް ގާޑިއޯލާ ބުނެފިއެވެ.

އޭނާ މިހެން ބުނީ ސައޫދީ އަރަބިއްޔާގައި، ޖަޕާނުގެ އުރަވާ ރެޑް ޑައިމަންޑާ ދެކޮޅަށް ކުޅެންޖެހޭ މެޗުގެ ކުރިން ވާހަކަ ދައްކަމުންނެވެ.

ދުނިޔޭގެ އެންމެ މޮޅު ކޯޗުކަމަށް ގިނަ ބަޔަކު އިއްތިފާގުވާ ގާޑިއޯލާ ވަނީ ސްޕޭނުގެ ބާސެލޯނާގައި މި ތަށި ދެ ފަހަރު ކާމިޔާބުކޮށްފައެވެ. ނަމަވެސް އޭނާ ބުނީ ސިޓީއަށް މި ތަށި ހޯދައިދިނުމަކީ އޭނާގެ ހުވަފެނެއް ކަމަށް ބުނުމަކީ ދޮގަކަށް ނުވާނެކަމަށެވެ. އޭގެ ސަބަބަކީ އިނގިރޭސި ލީގުގައި ވާދަވެރި އެހެން ޓީމުތަކަށް ކަމަށްވާ މެންޗެސްޓަރ ޔުނައިޓެޑާއި، ލިވަޕޫލާއި، ޗެލްސީން މި ތަށި ކާމިޔާބުކޮށްފައިވުން ކަމަށެވެ.

2015 ވަނަ އަހަރު ސިޓީއާ ހަވާލުވިފަހުން މިދިޔަ ސީޒަނަކީ ގާޑިއޯލާގެ އެންމެ ކާމިޔާބު ސީޒަނެވެ. ސިޓީ ވަނީ ޕްރެމިއަރ ލީގާއި އެފްއޭކަޕް، އަދި ޗެމްޕިއަންސް ލީގާއި ޔޫރަޕިއަން ސުޕަރކަޕްވެސް ކާމިޔާބުކޮށްފައެވެ. މިހެންވެ ގާޑިއޯލާ ބުނީ މިވަގުތު އޭނާއަށް މަދުވަނީ ކުލަބު ވޯލްޑްކަޕުގެ ތަށި އެކަނި ކަމަށެވެ.

ކުލަބު ވޯލްޑްކަޕް މިހާރު ކުޅެނީ އެކި ބައްރުތަކުގެ ޗެމްޕިއަން ޓީމުތަކުގެ މެދުގައި ބާއްވާ މުބާރާތެއްގެ ގޮތުގައެވެ. ނަމަވެސް ފީފާއިން ވަނީ 2025 ވަނަ އަހަރުން ފެށިގެން މި މުބާރާތް 32 ޓީމުގެ މެދުގައި އެއް މަސްދުވަހުގެ މުއްދަތަށް ބާއްވަން ނިންމާފައެވެ. މިކަމާމެދު ގާޑިއޯލާ ބުނީ ބަދަލު ގެނައީ ފީފާއިން ކަމަށާއި، މިހެންވެ އެއީ އެންމެ ރަނގަޅު ނިންމުން ކަމަށް ބަލައި، ޓީމުތަކުން ޖެހޭނީ ސަޕޯޓް ދޭންކަމަށެވެ.