ކެވިން ޑި ބްރޭނާ ސިޓީގެ ފަރިތަކުރުންތަކަށް ނުކުންނަށް ފަށައިފި

މެންޗެސްޓަރ ސިޓީ އަށް ކުޅެމުން އަންނަ ބެލްޖިއަމްގެ މިޑްފީލްޑަރު ކެވިން ޑި ބްރޭނާ އެ ޓީމުގެ ފަރިތަކުރުންތަކަށް ނުކުންނަން ފަށައިފިއެވެ.

ފީފާ ކުލަބު ވޯލްޑް ކަޕްގެ ސެމީފައިނަލް މެޗުގެ ކުރިން ސިޓީން ސައުދީ އަރަބިއްޔާގައި ކުރިއަށްގެންދިޔަ ފަރިތަކުރުންތަކަށް ޑި ބްރޭނާ ވަނީ ނުކުމެފައެވެ. އެ ޓީމުގެ ފަރިތަކުރުންތަކަށް ޑި ބްރޭނާ ނުކުމެފައިވަނީ، ލިބުނު އަނިޔާއެއްގެ ސަބަބުން ގާތްގަނޑަކަށް ހަތަރު މަހެއްހާ ދުވަހު ކުޅުމާ ދުރުގައި ހުރެފައެވެ. ސިޓީގެ މެދުތެރޭގައި އެންމެ މުހިންމު ދައުރެއް އަދާކުރަމުން އައި ޑި ބްރޭނާ އަށް އަނިޔާވީ، ކޮމިއުނިޓީ ޝީލްޑް މެޗުގައެވެ. އާސެނަލާ ދެކޮޅަށް ސިޓީން ކުޅުނު މެޗުގެ ދެ ވަނަ ހާފުގެ ވަކި ހިސާބަކުން ޑި ބްރޭނާ އަށް އަނިޔާވީއިރު، ވަގުތުން އޭނާ ވަނީ ބަދަލުކޮށްފައެވެ.

އަނިޔާގެ ސަބަބުން ޑި ބްރޭނާ ވަނީ ސާޖަރީއެއް ވެސް ކޮށްފައެވެ. އެކަމުގެ ސަބަބުން ޑި ބްރޭނާ ކުޅުމާ ދުރުގައި ހުރިއިރު، ސިޓީ އަށް ވަނީ އެކަމުގެ އަސަރު ވެސް ކޮށްފައެވެ. އަނިޔާ އަށް ފަހު ޑި ބްރޭނާ ފަރިތަކުރުންތަކަށް ނުކުންނަން ފެށި ނަމަވެސް، ރަސްމީކޮށް އޭނާ އަށް މެޗެެއް ކުޅެވޭނެ ދުވަހެއް ޔަގީންވެފައެއް ނުވެއެވެ. ނަމަވެސް، އަނިޔާ އަށްފަހު ޑި ބްރޭނާ އަލުން ކުޅެން ނުކުތުމަކީ، މިވަގުތު މާޔޫސްކަމެއްގެ ތެރޭގައި އޮތް ސިޓީ އަށް ލިބޭނެ ހިތްހަމަޖެހުމަކަށް ވާނެއެވެ.

މިދިޔަ ސީޒަނުގައި ސިޓީން ތިން ތަށި ކާމިޔާބު ކުރިއިރު، ޑި ބްރޭނާ އަކީ މުހިންމު ދައުރެއް އަދާކުރި ކުޅުންތެރިޔެކެވެ. މިދިޔަ ސީޒަނުގައި އޭނާ ވަނީ ސިޓީ އަށް ކުޅެދިން 49 މެޗުގައި 10 ލަނޑު ޖަހައިފައެވެ.