އާސެނަލް އަދި ލެސްޓާ ސިޓީގެ ކުރިމަތި ލުމުން އިނގިރޭސި ޕްރިމިއާރ ލީގު މިރޭ ފަށަނީ!

އާސެނަލް އަދި ލެސްޓާ ސިޓީގެ ކުރިމަތިލުމުން އިނގިރޭސި ޕްރިމިއާ ލީގުގެ އާ ފުޓްބޯޅަ ސީޒަން މިރޭ ފެށިގެންދާނެއެވެ.

މިރޭ އިނގިރޭސި ޕްރިމިއާ ލީގުގެ އާ ސީޒަން ފެށޭ އިރު މިފަހަރުގެ ޓްރާންސްފާ މާކެޓްގައި މި ދެޓީމަށް ވެސް ވަނީ އިނގިރޭސި ބޮޑެތި ބަދަލުތަކެއް ގެނެސްފައެވެ. އެގޮތުން ގިނަ އަދަދެއްގެ އާ ކުޅުންތެރިންތަކެއް ގެނެސް ޓީމުތައް އިތުރަށް ވަނީ ވަރުގަދަކޮށްފައެވެ.

އެގޮތުން ސީޒަން ހުޅުވާ މެޗުގައި މިރޭ ވާދަކުރާ ލެސްޓާ ސިޓީ އަދި އާސެނަލްއަށް ވަނީ ކުޅުންތެރިން ގެނެސް ޓީމުގެ އެކި މަގާމުތައް ވަރުގަދަކޮށްފައެވެ. އެގޮތުން މި ފަހަރުގެ ސީޒަނަށް އާސެނަލްއިން ވަނީ އެޓީމުގެ ގޯލް ކީޕަރު ސަޒްނީ އަދި 10.3 މިލިއަން ޕައުންޑަށް އިޓަލީގެ ޔުވެންޓަސް އަށް ވިއްކާލުމަށް ފަހު ފްރާންސްގެ ލިޔޯންއަށް ކުޅެމުން އައި ހުނަރުވެރި ފޯވާޑް އެލެސެންޑަރ ލަކަޒޭޓް، 52 މިލިއަން ޕައުންޑުގެ ރެކޯޑް ފީއަކަށް އާސެނަލްއަށް ގެނެސްފައެވެ.

އަދި ހިލޭ ޓްރާންސްފާއެއްގެ ދަށުން ޔާޔާ ސަނޯގޯ ފްރާންސްގެ ޓޫލޫސް އަށް ދޫކޮށްލުމަށް ފަހު ސާލްކޭއަށް ކުޅެމުން އައި ސީޑް ކޮލަސެނިޗް ހިލޭ ޓްރާންސްފާގެ ދަށުން އާސެނަލްއަށް ވަނީ ގެނެސްފައެވެ.

މީގެ އިތުރުން އާސެނަލްއިން ދަނީ މިރޭ އެޓީމާ ދެކޮޅަށް ނިކުންނަ ލެސްޓާ ސިޓީގެ ވިންގާ ރިޔާދް މަހްރޭޒް ގެންނަން މަސައްކަތް ކުރަމުންނެވެ. އެގޮތުން އާސެން ވޭގާ ބުނެފައިވަނީ މަހްރޭޒް ގެނައުމުގެ މަސައްކަތް ކުޔިރައްދާ ކަމަށްބުނެފައެވެ.

މިރޭގެ މެޗަށް ލެސްޓާއާ ދެކޮޅަށް އާސެނަލް ނިކުންނައިރު އެޓީމު މިވަގުތު އޮތީ ރަނގަޅު ހާލަތެއްގައި ނޫންކަން ފާހަގަކޮށްލަން ޖެހެއެވެ. އެގޮތުން ޓީމުގެ މުހިންމު ގިނަ ކުޅުންތެރިންތަކެއް އަނިޔާގައި ތިބުމުގެ ސަބަބުން މިރޭ ލެސްޓާއާ ދެކޮޅަށް ނުކުޅެވޭނެއެވެ. އެގޮތުން މިރޭގެ މެޗުގައި ނުކުޅެވޭނެ ކުޅުންތެރިންގެ ތެރޭގައި އެލްކްސިސް ސަންޗޭޒް، މެސުޓް އޮޒިލް، މުސްތަފީ، ވިލްޝެއާ، ރަމްސޭ އަދި ކޮސައިންލީފަދަ ކުޅުންތެރިން ހިމެނެއެވެ.

މިރޭގެ މެޗާ ބެހޭގޮތުން ނޫސްވެރިންނާއި ވާހަކަދައްކަމުން އާސެނަލްގެ ކޯޗު އާސެން ވެންގާ ބުނެފައިވަނީ މިރޭގެ މެޗަށް މުހިނމު ގިނަ ކުޅުންތެރިން އަނިޔާގައި ތިބުމަކީ ކަންބޮޑުވާކަމެއް ކަމަށެވެ. އެހެން ނަމަވެސް މިރޭގެ މެޗުގައި ބޭނުންކުރާނީ މިވަގުތަށް އެންމެ ފިޓް އަދި އެންމެ ފޯމުގައި ތިބި ކުޅުންތެރިންކަމަށެވެ.

ލެސްޓާ ސިޓީއަށް ބަލާއިރު އެޓިމަށް ވެސް ވަނީ ބަދަލުތަކެއް ގެނެސްފައެވެ. އެގޮތުން ނިމިގެން ދިޔަ ސީޒަނުގައި އެޓީމަށް ކުޅުނު ބައެއް ކުޅުންތެރިން ވަނީ ކުލަބު ދޫކޮށް އެހެން ކުލަބުތަކަށް ބަދަލުވެފައެވެ. އެގޮތުން ލެސްޓާގެ ދެވަނަ ގޯލް ކީޕަރ ރޮބާޓް ޒީލާ ޖަރުމަނުގެ ސްޓޫގާޓްއަށް ބަދަލުވެފައިވާއިރު އެޓީމުގެ އެޓޭކިން މިޑްފީލްޑަރ ބާޓޮސް ކަޕުސްކާ ވަނީ ޖަރުމަނުގެ ފްރެއިބާގްއަށް ބަދަލުވެފައެވެ.

އަދި މައިކަލް ކެއިން އާއި މާސިން ވެސިލޯސްކީ ހިލޭ ޓްރާންސްފާގެ ދަށުން ދޫކޮށްލާފައިވާއިރު، ނިމިގެން ދިޔަ ސީޒަނުގައި މެނެޗެސްޓާ ސިޓީއަށް ކުޅުނު ކެލެޗި އިހެނަޗޯ އާއި ސްޕެއިންގެ ސެވިއްޔާއަށް ކުޅެމުން އައި ވިސެންޓޭ އިބޯރާ އާއި ހަލްސިޓީގެ ދެކުޅުންތެރިން ކަމަށްވާ ހެރީ މަގުއިރޭ އަދި އެޑިން ޖެކްޕޮވިޗް ވަނީ ލެސްޓާ ސިޓީއަށް ގެނެސްފައެވެ.

ލެސްޓާއަށް ބަލާއިރު އެޓީމުގެ އެއް ނަމްބަރ ގޯލް ކީޕަރ ކޭސްޕާ ސްމައިކަލްގެ އިތުރުން އޭންޑީ ކިންގް އަދި މެޑްޑީ ވެސް މިވަގުތު ތިބީ އަނިޔާގައެވެ. އާސެނަލްއާ ދެކޮޅަށް ކުޅޭ މެޗުގައި މިކުޅުންތެރިންނަށް ކުޅެވޭނެ ކަމާ މެދު ވަނީ ސުވާލު އުފެދިފައެވެ.

މިރޭ ލެސްޓާ އަދި އާސެނަލް ކުރިމަތިލާއިރު މި ދެޓީމު އެންމެ ފަހުން ބައްދަލުކޮށްފައިވަނީ މިއަހަރުގެ އެޕްރީލް 26 ވަނަ ދުވައެވެ. އާސެނަލްގެ އަމިއްލަ ދަނޑުގައި ކުޅުނު މި މެޗުން 0-1 ގެ ނަތީޖާއިން ކާމިޔާބުކޮށްފައިވަނީ އާސެނަލްއެވެ.

އިނގިރޭސި ޕްރިމިއާލީގުގެ އާ ސީޒަން ހުޅުވާ މެޗުގައި ލެސްޓާ އަދި އާސެނަލް ބައްދަލުކުރާއިރު މި މެޗު ފަށާނީ މިރޭ ރާއްޖޭ ގަޑިން 11:45 ގައެވެ.