ސައުދީ ޕްރޯ ލީގުގައި އަލް ވެހްދާ ދެކޮޅަށް ކުޅުނު މެޗުން މޮޅުވެ، އަލް ހިލާލުން އެއް ވަނައިގައި ކުރިއަށް ޖެހިލައިފި އެވެ.

ލީގުގައި ހުކުރު ދުވަހުގެ ރޭ ކުޅުނު މެޗު އަލް ހިލާލުން ކާމިޔާބު ކުރީ 2-0 އިންނެވެ. މެޗަށް ނިކުތްއިރު ވެސް ލީގު ތާވަލްގެ އެއް ވަނައިގައި އޮތީ، މި ސީޒަންގައި މޮޅަށް ކުޅެމުން އަންނަ އަލް ހިލާލް އެވެ.

މެޗުގައި އަލް ހިލާލުން ވަނީ 20 ވަނަ މިނެޓުގައި ލަނޑު ޖަހައި، ލީޑު ނަގައިފަ އެވެ. އެ ޓީމަށް ލީޑު ނަގައިދިނީ ސައުދު އަބްދުލް ޙާމިދު އެވެ. އޭގެ ފަހުން ވެސް މެޗުގައި އިތުރު ލަނޑު ޖެހުމަށް އަލް ހިލާލުން ވަނީ ފުރުސަތު ތަނަވަސްކޮށްފަ އެވެ. ދެ ވަނަ ލަނޑެއް ޖެހުމަށް އެ ޓީމުން ކުރި މަސައްކަތް ކާމިޔާބުވީ މެޗުގެ 80 ވަނަ މިނެޓުގަ އެވެ. އެ ލަނޑު އެ ޓީމަށް ޖަހައިދިނީ ސާބިއާގެ ފޯވާޑް އެލެކްސެންޑާ މިޓްރޮވިޗް އެވެ. މިއީ އަލް ހިލާލަށް ބަދަލުވި ފަހުން އޭނާ އެ ޓީމަށް ޖަހައިދިން 23 ވަނަ ލަނޑެވެ. ސައުދީ ލީގުގައި އޭނާ ވަނީ 15 މެޗުން 15 ލަނޑު ޖަހައިފަ އެވެ.

މޮޅާއެކު އަލް ހިލާލް އެއް ވަނައިގައި އޮތީ މިހާތަނަށް ކުޅުނު 17 މެޗުން 47 ޕޮއިންޓާއެކު އެވެ. މި ސީޒަންގެ ލީގުގައި އެއްވެސް މެޗަކުން އެ ޓީމު ބަލިވެފައި ނުވާއިރު، ލީގުގައި މިހާތަނަށް ބަލި ނުވާ ހަމައެކަނި ޓީމަކީ ވެސް އަލް ހިލާލް އެވެ. ދެ ވަނައިގައި ވާދަވެރި އަލް ނަސްރު އޮތީ އެއް މެޗު މަދުން ކުޅެގެން 37 ޕޮއިންޓާއެކު އެވެ.