ދިވެހިބަހާއި ސަޤާފަތާއި ތަރިކަ އާއި ބެހޭ ވުޒާރާ އަށް އާޒިމާ ކުރިން ހުންނެވި މަޤާމް އޮޅިއްޖެ
ދައުލަތުގެ ވުޒާރާތަކާއި އިދާރާތަކުން ފަހަކައަށް އައިސް ހިއްސާ ކުރާ މައުލޫމާތުތައް ނުބަލާ ހިއްސާކުރާތީ އާއްމުން ދަނީ ފާޑުކިޔަމުން
އާޒިމާ ޝަކޫރު
ދިވެހިބަހާއި ސަޤާފަތާއި ތަރިކަ އާއި ބެހޭ ވުޒާރާ އަށް އާޒިމާ ޝަކޫރު ކުރިން ހުންނެވި މަޤާމް އޮޅިއްޖެއެވެ.
ދިވެހިރާއްޖޭގެ ކުރީގެ ބަންޑާރަ ނައިބު އަލްއުސްތާޛާ ޢާޒިމާ ޝަކޫރު ވަނީ ބުރާސްފަތި ދުވަހު އެ ވުޒާރާގެ ވަޒީރު އާދަމް ނަޞީރު އިބްރާހީމްގެ އަރިހަށް ޒިޔާރަތެއް ކުރައްވާފައެވެ.
އެ ޒިޔާރަތާއި ގުޅޭ ފޮޓޯ އެއް ހިސާކޮށް ބުނެފައި ވަނީ އާޒިމާ އަކީ ކުރީގެ އުއްތަމަ ފަނޑިޔާރު ކަމަށެވެ.
ފަހުން އެ ވުޒާރާއިން ވަނީ އެ ޓްވީޓް ޑިލީޓްކުރުމަށް ފަހު އައު ޓްވީޓެއް ކޮށްފައެވެ. އެ ޓްވީޓްގައިވާ މައުލޫމާތު ވަނީ އިޞްލާޙު ކުރެވިފައި ކަމަށާއި ކުރީގެ ޓުވީޓުގައި ލިޔުމުގެ ކުށެއް އޮތުމުން އެ ކުށަށް ނިހާޔަތަށް މަޢާފަށް އެދޭ ކަމަށް ވެސް ވަނީ ބުނެފައެވެ.
ދައުލަތުގެ ވުޒާރާތަކާއި އިދާރާތަކުން ފަހަކައަށް އައިސް ހިއްސާ ކުރާ މައުލޫމާތުތައް ނުބަލާ ހިއްސާކުރުމާއި ޓްވީޓްތަކާއި ވީޑިއޯތަކަށް އުނި އިތުރުގެންނަމުންދާތީ އާއްމުން ދަނީ ސަރުކާރަށް ފާޑުކިޔަމުންނެވެ. އަދި ދައުލަތުގެ އިދާރާތަކުގެ ސޯޝަލް މީޑިޔާ އެކައުންޓްތައް ބެލެހެއްޓުމުގައި މިހާރަށް ވުރެ ޒިންމާދާރުވާން ޖެހޭ ކަމަށް ވެސް އާއްމުން ދަނީ ބުނަމުންނެވެ.
ނިމިދިޔަ ހަފްތާގެ ތެރޭގައި ނައިބު ރައީސް ހުސައިން މުހައްމަދު ލަތީފް ޖެނީވާގައި ދެއްވި ތަގްރީރު ހިއްސާކުރުމަށް ފަހު އެ ތަގްރީރުގެ ލިންކް ހިމެނޭ ޓްވީޓް ޑިލީޓްކުރުމުން ވެސް ސަރުކާރަށް ވަނީ ފާޑުކިޔުން އަމާޒުވެފައެވެ. ފަހުން ސަރުކާރުން އެ ތަގްރީރު އާއްމުކުރީ ބައެއް އުނިކުރުމަށް ފަހުގައެވެ.
