އަންނަބީލް އިބްރާހީމް ހަބީބް ނުވަތަ ހުޅަނގުގޭ ހަބީބްގެ މަންމާފުޅަކީ އިބްރާހީމް ނޫރައްދީނުގެ ދޮންގޮމާ ނުވަތަ ކާށިދޫ ދޮން ގޮމާއެވެ.
ރާއްޖޭގެ ތާރީޚްގައި ފާހަގަ ކޮށްލެވިފައިވާ އަންނަބީލް އިބްރާހީމް ހަބީބަކީ އިންޑިއާ އާއި ސިލޯނުން ކިޔަވާ ވިދާޅުވެފައިވާ ތައުލީމީ ގޮތުން ފުންނާބު އުސް ބޭފުޅެކެވެ. އަންނަބީލް އިބްރާހީމް ހަބީބަކީ ހެވިކަމަށާއި ސިފައިންގެ އަސްކަރީ މަސައްކަތް އުނގެނިވަޑައިގެން ހުންނެވި ބޭފުޅެކެވެ.
ދެވަނަ ބޮޑު ހަނގުރާމައިގެ ތެރޭގައި އިނގިރޭސީންނާއެކު އަސްކަރީ ތަމްރީނު ހައްދަވާފައިވާ ޤާބިލް ބޭފުޅެއް ވެސް މެއެވެ.
އަންނަބީލް އިބްރާހީމް ހަބީބް މަޝްހޫރުވެފައިވާ އަނެއް ދާއިރާއަކީ ރާގު ހެއްދެވުމުގެ ދާއިރާއެވެ. އެގޮތުން ތަފާތު ރާގު ހެއްދެވުމާއި ރާގު ލިޔުއްވުމުގެ އިތުރުން ރާގު ފުންމަވާ އަދި ރާގު ވިދާޅުވި ބޭފުޅެކެވެ.
ސިފައިންގެ ބޭން ޕާޓީއަށް ޓްރޭނިންގ ދެއްވުމުގެ ބުރަ މަސައްކަތް އަންނަބީލް އިބްރާހީމް ހަބީބް އުފުއްލަވާފައި ވެއެވެ.
އަންނަބީލް އިބްރާހީމް ހަބީބަކީ އިނގިރޭސި، އުރުދޫ، ސިންގަޅަ އަދި ތަމަޅަ ބަސް ދެނެވަޑައިގަންނަވާ ބޭފުޅެކެވެ.
އަންނަބީލް އިބްރާހީމް ހަބީބް އަދާކުރެއްވި ސަރުކާރުގެ ވަޒީފާތަކުގެ ތެރޭގައި ސިފައިންގެ އޮފިސަރ ކަމާއި ސިފައިންގެ ވެރިޔާގެ ނައިބުކަން ހިމެނެއެވެ.
