"އޮޕަރޭޝަން ފަނާރު"ގެ ނަމުގައި ފަރުވާގެ ޚާއްސަ ޕްރޮގްރާމެއް ފަށައިފި
ޑްރަގް ކޯޓުން ފަރުވާއަށް ހުކުމްކޮށްފައިވާ 700 މީހުން އެބަތިބި
ފުލުހުން ކުރިއަށް ގެންދިޔަ އޮޕަރޭޝަނެއްގެ ތެރެއިން މަސްތުވާތަކެތި ކަމަށް ބެލެވޭ ތަކެތި ހޯދާފައި
ޑްރަގް ކޯޓުން ފަރުވާއަށް ހުކުމްކޮށްފައިވާ ފަރާތްތަކަށް އަމާޒުކޮށް "އޮޕަރޭޝަން ފަނާރު"ގެ ނަމުގައި ފަރުވާގެ ޚާއްސަ ޕްރޮގްރާމެއް ފަށައިފިއެވެ.
ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި ރައީސް އޮފީހުގެ އަންޑަރ ސެކްރެޓަރީ ފޯ ޕަބްލިކް ޕޮލިސީ، މުހައްމަދު ފިރުޒުލް އަބްދުﷲ ޚަލީލު ވިދާޅުވީ މަސްތުވާތަކެތީގެ މައްސަލައަކީ މުޖުތަމައުގެ ވަރަށް ބޮޑު ކަންބޮޑުވުމެއް ކަމަށާއި، އެކަމަށް ޚާއްސަ އިސްކަމެއްދީގެން މަސައްކަތް ކުރާނެ ކަމަށެވެ.
އެގޮތުން ކުރިއަށް ޑްރަގް ކޯޓުން ފަރުވާއަށް ހުކުމްކޮށްފައިވާ 700 ފަރާތަށް އަމާޒުކޮށް ''އޮޕަރޭޝަން ފަނާރު''ގެ ނަމުގައި ފަރުވާގެ ޚާއްސަ ޕްރޮގްރާމެއް ފަށާފައިވާ ކަމަށް ފިރުޒުލް ވިދާޅުވިއެވެ.
ޑްރަގް ކޯޓުން ފަރުވާއަށް ހުކުމްކޮށްފައިވާ ފަރާތްތަކަށް އަމާޒުކޮށް "އޮޕަރޭޝަން ފަނާރު"ގެ ނަމުގައި ޚާއްސަ ޕްރޮގްރާމެއް ފަށާފައިވާއިރު، ކުރީގެ ސަރުކާރުގައި ވެސް ވަނީ މަސްތުވާތަކެތީގެ ޝިކާރައަކަށް ވެފައިވާ މީހުން މުޖުތަމައުއަށް ނެރުމަށް ޚާއްސަ ޕްރޮގްރާމްތަކެއް ކުރިއަށް ގެންގޮސްފައެވެ. އެގޮތުން މެތަޑޯންގެ ފަރުވާ މުޅި ރާއްޖެއަށް ފުޅާކޮށް ފަރުވާ ދީފައިވެއެވެ. މިފަރުވާއާއި ގުޅޭގޮތުން އޭރު ނޭޝަނަލް ޑްރަގް އެޖެންސީ (އެންޑީއޭ) އިން ބުނެފައިވަނީ މެތަޑޯންގެ ޚިދުމަތާއެކު މަސްތުވާތަކެއްޗަށް އޮންނަ ޑިމާންޑް ކުޑަކުރެވިފައިވާކަން ފާހަގަކުރެވޭ ކަމަށާއި، ޖިނާއީ ކުދިކުދި ކުށްތަކަށް އަރައިގަތުން ވަރަށް ބޮޑަށް މަދު ކުރެވިފައިވާ ކަމަށް ފުލުހުން މައުލޫމާތުދޭ ކަމަށެވެ. އަދި ވައްކަމުގެ މައްސަލަތައް ވެސް މަދުކަމަށް ރިކޯޑުތަކުން ދައްކާ ކަމަށެވެ. އެހެންކަމުން މަސްތުވާތަކެތި ބޭނުންކުރާ މީހުން މުޖުތަމައުއަށް ނެރުމަށްޓަކައި ސިއްހީ އެޕްރޯޗަކުން މަސައްކަތް ކުރުމުން ނަތީޖާ ރަނގަޅު ކަމަށާއި، މުޖުތަމައުއަށް އެކަމުގެ ހެޔޮ އަސަރު ކުރާ ކަމަށް އެންޑީއޭއިން ބުނެއެވެ.
މެތަޑޯނަކީ ބޭހާއެކު ދެވޭ ފަރުވާއެކެވެ. ކައުންސެލިންއާއި އެޑިޔުކޭޝަންގެ އިތުރުން މިހާއަށް ދިރިއުޅުން ކުރިއަށް ގެންދެވޭ ގޮތަށް ގިނަ ސެޝަންތަކެއް މިޕްރޮގްރާމްގައި ކުރިއަށް ގެންދެއެވެ. މެތަޑޯންގެ ޑޯޒް ކުޑަކޮށް ފަށާ މަތިކުރަމުން ގޮސް އެ މީހަކާ ގުޅޭ މެއިންޓަނެންސް ޑޯޒް ދިނުމުން ބޭނުންކުރުން އެއްކޮށް ހުއްޓިގެންދެއެވެ.
