"ބިންވެރިޔާ" ސްކީމްގެ މަސައްކަތް ކުރިއަށްދޭ، ބިން ހިއްކޭވަރު ބެލުމަށްފަހު ރަޖިސްޓްރީ ހަވާލުކުރަމުންދާނެ- ފިރުޒުލް
21 ޖެނުއަރީ 2024 | އާދީއްތަ 02:39ގިރާވަރުން 54، ގުޅީފަޅުން 94 ހެކްޓަރު ހިއްކާފައިވޭ
ރައީސް އޮފީހުގެ އަންޑަ ސެކްރެޓަރީ ފޯ ޕަބްލިކް ޕޮލިސީ މުހައްމަދު ފިރުޒުލް އަބްދުﷲ ހަލީލު
މާލޭ ރައްޔިތުންނަށް ގޯތިދޭން ކުރީގެ ސަރުކާރުން ފެށި "ބިންވެރިޔާ" ސްކީމްގެ މަސައްކަތް ކުރިއަށްދާ ކަމަށާއި ބިން ހިއްކޭވަރު ބެލުމަށް ފަހު ރަޖިސްޓްރީ ހަވާލުކުރަމުންދާނެ ކަމަށް ރައީސް އޮފީހުގެ އަންޑަ ސެކްރެޓަރީ ފޯ ޕަބްލިކް ޕޮލިސީ މުހައްމަދު ފިރުޒުލް އަބްދުﷲ ހަލީލު ވިދާޅުވެއްޖެއެވެ.
ހޮނިހިރު ދުވަހުގެ ރޭ ބޭއްވި ބިންވެރިންގެ ސައްލާގައި ވާހަކަދައްކަވަމުން ފިރުޒުލް ވިދާޅުވީ ގޯތިތައް އާއްމުންނާއި ހަވާލުކުރުމަށްޓަކައި ހަތަރު ކަމެއް ކުރައްވާނެ ކަމުގެ ޔަގީންކަން ރައީސް ދެއްވާ ކަަމަށެވެ. އޭގެ ތެރޭގައި ހިމެނެނީ ގޯތިދޭން ކަނޑައެޅި ތަންތަނަށް ބިން އިތުރުކުރުމުގެ މަސައްކަތް އަދި އެ ތަންތަނުގެ އަސާސީ އިންފްރާސްޓްރަކްޗަރ ގާއިމްކުރުމާއި، ދަތުރުފަތުރުގެ ނިޒާމު ގާއިމްކުރުން އަދި ގޯތިތަކުގެ ރަޖިސްޓްރީ މީހުންނާ ހަވާލުކުރުން ކަމަށް ފިރުޒުލް ވިދާޅުވިއެވެ.
ފިރުޒުލް އިތުރަށް ވިދާޅުވީ މިހާތަނަށް އައި އިރު ގިރާވަރުން 54، ގުޅީފަޅުން 94 ހެކްޓަރު ހިއްކާފައިވާ ކަމަށެވެ. އޭނާ ވިދާޅުވީ ހިއްކާތަންތަނުގެ ދެމެދުގައި ފަސޭހަކަމާއި އެކު ދަތުރުކުރެވޭނެ އިންތިޒާމްތައް ވެސް ހަމަޖައްސާނެ ކަމަށެވެ. އަދި މިހާރު ވެސް މާލެ، ވިލިމާލެ، ގުޅީފަޅު އަދި ތިލަފުށި ގުޅާލުމަށް ތިލަމާލެ ބްރިޖުގެ މަސައްކަތް ކުރަމުންދާ ކަމަށް ވެސް ވިދާޅުވިއެވެ. އަދި ބިން މާއްދީ ގޮތެއްގައި ލިބުމަށްޓަކައި ފުރިހަމަ ވާން ޖެހޭ ކަންތައްތަކުގެ ތެރޭގައި ހިމެނޭ ލިޔުން ދޫކުރުމާއި ހިއްކަން ޖެހޭ ބައިތައް ފުރިހަމަ އަށް ހިއްކުމުގެ މަސައްކަތް ވެސް ކުރިއަށް ދާނެ ކަމުގެ ޔަގީންކަން ފިރުޒުލް ވަނީ ދެއްވާފައެވެ.
