ގެދޮރުވެރިޔާ ފްލެޓު މައްސަލައިގައި ބޭއްވި ކޮމިޓީއަށް ވަޒީރު ހާޒިރެއް ނުވި، މެމްބަރުންގެ އިންތިހާ ކަންބޮޑުވުން
ސަރުކާރު ކޯލިޝަންގައި ހިމެނޭ މެމްބަރުންވެސް ވަނީ ވަޒީރު އެހެން އެކަން ކުރެއްވީ ގަސްތުގައިކަމަށް ބެލެވޭކަމަށް ވިދާޅުވެފައި
މަޖިލީހުގެ ޕެޓިޝަން ކޮމިޓީ
ގެދޮރުވެރިޔާ ފްލެޓު މައްސަލައިގައި ބޭއްވި ކޮމިޓީއަށް ހައުސިންގް މިނިސްޓަރު އަލީ ހައިދަރު ވަޑައިނުގެންނެވުމުން މެމްބަރުން އެކަމުގެ ކަންބޮޑުވުން ފާޅު ކުރައްވައިފިއެވެ.
ކޮމިޓީގެ އެޖެންޑާގައި އޮތީ ގެދޮރުވެރިޔާ ސްކީމްގެ ދަށުން ފްލެޓު ލިބޭނެކަމަށް ގެޒެޓު ކުރެވިފައިވާ އެންމެހާ ފަރާތްތަކާއި، އަދި ކަމުގެ މަސްލަޙަތު އޮތް އެންމެހައި ފަރާތްތަކުގެ ފްލެޓުތައް ބާތިލު ނުކުރުމަށް އެދި ހުށަހެޅިފައިވާ ޕެޓިޝަނާ ގުޅޭގޮތުން ހައުސިންގ މިނިސްޓްރީގެ ބޭފުޅުންނާ ބައްދަލު ކުރެއްވުމެވެ.
މި މައްސަލައާ ގުޅިގެން ކޮމިޓީން މިނިސްޓްރީއަށް ސިޓީ ފޮނުވީ 9 ޖުލައިގައެވެ. އެ ސިޓީގައި ބަޔާންކޮށްފައިވަނީ މި މައްސަލައާ ގުޅުންހުރި ފަރާތްތަކާ ބައްދަލުކުރަން ބޭނުންވާ ކަމަށެވެ.
އޭގެ ޖަވާބުގައި 14 ޖުލައިގައި މިނިސްޓްރީން ފޮނުވި ސިޓީގައި މިނިސްޓަރުގެ އަމިއްލަ އެދިލެއްވުމުގެ މަތިން ވަނީ މިނިސްޓަރާއި އިތުރު ބޭފުޅުން ވަޑައިގަންނަވާނެކަމަށް ވިދާޅުވެފައެވެ.
އެހެންނަމަވެސް ކެބިނެޓު މީޓިންގ 11:00 އަށް ނިމިފައި ނުވާކަމަށް ވިދާޅުވެ ވަޒީރު ވަޑައިގެންފައެއް ނުވެއެވެ.
މިނިސްޓަރު ވަޑައިނުގަންނަވާކަން އެނގިގެން ދިޔައީ މެމްބަރުން ކޮމިޓީއަށް ވަޑައިގެން އިދާރީ މޭޒުން ކަންކަން ސާފު ކުރުމުންކަމަށް ވައިކަރަދޫ ދާއިރާގެ މެމްބަރު ހުސައިން ޒިޔާދު ވިދާޅުވިއެވެ.
ޒިޔާދު ވިދާޅުވީ، ރައީސް އޮފީހުގައި ކެބިނެޓު ބައްދަލުވުމެއް އޮތްނަމަ އެކަންވެސް ދުރާލާ އެނގިވަޑައިގަންނަވާނެ ކަމަށާއި، އަދި ވަޑައިނުގެންނެވޭނަމަ ކޮމިޓީއަށް މައުލޫމާތު ދިނުމަށް ކުރަންޖެހޭ ކަންކަން ވަޒީރު އިންތިޒާމު ކޮށްދޭން ޖެހޭނެ ކަމަށެވެ.
މަޖިލީހަށް ހާޒިރުވާން ޖެހޭކަން ވަޒީރަށް އެނގިވަޑައިގަންނަވާނެ ކަން ފާހަގަ ކުރައްވައި ޒިޔާދު ވިދާޅުވީ، މަޖިލީހުގެ ޤަވާއިދުގައި ވަޒީރަކަށް ދޭން ޖެހޭ 5 ދުވަހުގެ މުއްދަތުވެސް ދެވިފައިވާ ކަމަށެވެ.
ޒިޔާދު ވިދާޅުވީ، ރައްޔިތުންނާ ގުޅުންހުރި ކަންކަމުގައި ވަޒީރު ފަހަތު ފަޔަށް ބުރަވާތަން ފެންނަމުންދާ ކަމަށާއި، މިއީ ވަރަށް ދަށު ދަރަޖައިގެ ކަމެއް ކަމަށެވެ.
ވަޒީރު މިކަމުގައި އަމަލު ކުރައްވާފައިވަނީ ނުހަނު ބޭއަދަބީކޮށް ކަމަށް ވެސް ޒިޔާދު ވިދާޅުވިއެވެ.
މި ކޮމިޓީގައި ވާހަކަ ދެއްކެވި ޕީއެންސީގެ ބައެއް މެމްބަރުންވެސް ވިދާޅުވީ، މިކަން ހިނގާ ދިޔައީ އެންމެ ރަނގަޅަކަށް ނޫން ކަމަށާއި، މަޖިލީހުގެ ޤަވާއިދުގައި ބުނާ މުއްދަތުވެސް ވަޒީރަށް ދެވިފައިވާ ކަމަށެވެ.
މިފަދަ ހައްސާސް މައްސަލައެއްގައި ވަޑައިނުގެންނެވުމަކީ އަދި ޖަވާބުދާރީ ނުވެވުމަކީ ކަންބޮޑުވުން އޮތް ކަމެއްކަމަށް ޕީއެންސީގެ މެމްބަރުންވެސް ކޮމިޓީގައި ވިދާޅުވިއެވެ.
އޭގެ އިތުރުން ސަރުކާރު ކޯލިޝަންގައި ހިމެނޭ މެމްބަރުންވެސް ވަނީ ވަޒީރު އެހެން އެކަން ކުރެއްވީ ގަސްތުގައިކަމަށް ބެލެވޭކަމަށް ވިދާޅުވެފައެވެ.
އޭގެ އިތުރުން، މިނިސްޓަރަށް ވަޑައިނުގެންނެވުނަސް ދެން ވަޑައިގަންނަވަން ތިއްބެވި ބޭފުޅުންނަށް ވަޑައިގެންނެވެން ޖެހޭނެކަމަށް މެމްބަރުން ވިދާޅުވިއެވެ.
މި ބައްދަލުވުމުގައި ކޮމިޓީން ވަނީ އަވަސް މުސްތަޤުބަލެއްގައި ބައްދަލުވުން ބޭއްވުމަށް ފާސްކޮށްފައެވެ. އަދި އެކަމުގައި ވަޒީރަށް ނަސޭޙަތް ދިނުމަށްވެސް މެމްބަރުން ލަފާ ދެއްވިއެވެ.
