އޭދަފުށީ މެމްބަރު ސަލީމް ނެންގެވި ވިޔަފާރިވެރިން ކަސްޓަމްސް އަށް ވަގު އިންވޮއިސް ހުށަހަޅާ މައްސަލައަށް އޮޑިޓް އޮފީހުން ދިނީ އާދަޔާ ޚިލާފް ޖަވާބެއް!

ކަސްޓަމްސް އަށް ވިޔަފާރިތަކުން ހުށަހަޅާ އިންވޮއިސްތައް ހުށަހަޅަނީ ވަރަށް ބޮޑަށް އަގު ކުޑަކޮށްގެން ކަމުގައި އޭދަފުށީ ދާއިރާގެ މެމްބަރު އަހްމަދު ސަލީމް ވިދާޅުވެ މާލިއްޔަތު ކޮމިޓީގައި ދެއްކެވި ވާހަކަ އަށް އޮޑިޓް އޮފީހުން އާދަޔާ ޚިލާފް ޖަވާބެއް ދީފިއެވެ.

ރާއްޖޭގެ ބޮޑެތި ވިޔަފާރިވެރިންގެ ތެރޭގައި ހިމެނޭ ގާސިމް އިބްރާހިމް ރިޔާސަތު ބަލަހައްޓަވާ އަދި ކޮމިޓީގެ ނައިބު މުގައްރިރުގެ ގޮތުގައި އޭދަފުށީ ދާއިރާގެ މެމްބަރު އަހްމަދު ސަލީމް ހުންނަވާ ރައްޔިތުންގެ މަޖިލީހުގެ މާލިއްޔަތު ކޮމިޓީގައި އޮޑިޓަރ ޖެނެރަލްގެ އޮފީހުގެ މަސައްކަތްތަކާ ބެހޭ ގޮތުން ހޯމަ ދުވަހު ބޭއްވި ބައްދަލުވުމުގައި ވާހަކަ ދައްކަވަމުން ސަލީމް ވިދާޅުވީ، އޮޑިޓް އޮފީހުގައި މިހާރު ތިއްބެވި ބޭފުޅުންނަށް ވައްކަންތައް ހިނގަނީ ކިހިނެއް ކަމާއި، އޮޅުވާލަނީ ކިހިނެއްކަމާއި، އެކަންކަން ފޮރުވަނީ ކިހިނެއްކަން ވަރަށް ރަނގަޅަށް އެނގިވަޑައިގަންނަވާނެ ކަމަށެވެ.

ސަލީމް ވިދާޅުވީ ކަސްޓަމްސް އަށް "އިންވޮއިސް ރަނގަޅަށް ހުށަހަޅާ މީހުންވެސް އުޅޭ،" ކަމަށާއި ނަމަވެސް 99 އިން ސައްތަ މީހުން ކަސްޓަސްއަށް އަގު ހުށަހަޅަނީ އަގު ދަށްކޮށްގެން ކަމަށެވެ.

ފުޅާދާއިރާއެއްގައި ވިޔަފާރީ ކުރައްވާ މެމްބަރު ސަލީމް ވިދާޅުވީ، ކަސްޓަމްސް އަށް މުދަލުގެ އިންވޮއިސް ހުށަހަޅާ އިރު، އެއެއްޗެއްގެ އަސްލު އަގުގެ 30 ނުވަތަ 40 އިންސައްތަ ކުޑަ ކޮށްގެން ވެސް އިންވޮއިސް ހުށަހަޅާ ކަމަށެވެ.

ސަލީމް ވިދާޅުވީ ރަނގަޅަށް ހުށަހަޅާ އަގުތައް ކަސްޓަމްސްގެ ފަރާތްތަކަށް ވަރަށް ރަނގަޅަށް އެނގޭނެ ކަމަށެވެ. އަދި ނުއަގުގައި ހުށަހަޅާ މީހުންވެސް ވަރަށް ރަނގަޅަށް އެނގޭނެ ކަމަށެވެ.

ސަލީމް ވިދާޅުވީ ކަސްޓަމަށް ހުށަހަޅާ އަގުތައް ހަމަ އަގަށް ގެނެސްފިނަމަ ދައުލަތައް ލިބޭ އާމްދަނީ 1.5 ބިލިއަނާއި 2 ބިލިއަނާ ދެމެދުގެ އަދަދެއް އިތުރުވެގެން ދާނެ ކަމަށެވެ.

ކަސްޓަމުގެ ކަންކަމަށް ބަލާއިރު، އެތަނަކީ ވަރަށް ބޮޑު އާމްދަނީ އެއް ލިބޭ ތަނެއް ކަމަށާއި، ނަމަވެސް ކަސްޓަމްސް އަށް "ހުށަހަޅާ އިންވޮއިސްތަކުގެ އަގުތައް ހުންނަ ގޮތް އެބޭފުޅުންނަށް ވަރަށް ރަނގަޅަށް އެނގިވަޑައިގަންނަވާނެ،" ކަމަށާއި މިކަންތައްތައް އެންމެ ރަނގަޅަށް ނުބެލެނީ ކީއްވެގެންތޯ ސަލީމް ސުވާލު ކުރެއްވިއެވެ.

މެމްބަރު ސަލީމްގެ ސުވާލަށް ޖަވާބު ދެއްވަމުން އޮޑިޓް އޮފީހުގެ ލީގަލް ކައުންސެލް މުހައްމަދު ނަސީމް ވިދާޅުވީ، ކަސްޓަމްސް އަށް ހުށަހަޅާ އިންވޮއިސްތައް އޮޅުވާލާ ގޮތް ބޮޑަށް އެނގޭނީ ވިޔަފާރިވެރިންނަށް ކަމަށެވެ.

"ސަލީމްގެ ވަރަށް ތަޖުރިބާއާ އެކީ ކަންނޭގެ އެވިދާޅުވީ އަސްލު އެކަންތައްތައް" ނަސީމް ވިދާޅުވިއެވެ.